Kataposang mga Adlaw​—Sa Unsa?

SA basketbol, sa dihang ang anawnser moingon, “Last two minutes,” kana nagpasabot nga duha na lang ka minutos matapos na ang dula, ipahibalo na ang mananaog ug mamauli na ang mga tawo. Apan komosta kon dunay moingon, “Nagkinabuhi na kita sa kataposang mga adlaw”? Unsay ipasabot niana?

Ang mga terminong “kataposang mga adlaw” ug “panahon sa kataposan” dugay nang gigamit. (2 Timoteo 3:1; Daniel 12:4) Kapin sa 2,500 ka tuig kanhi, ang manalagna nga si Daniel gipakitaag mga panan-awon bahin sa mga kagamhanan sa kalibotan ug sa mga gubat nga mahitabo tali kanila hangtod sa “panahon sa kataposan.” Siya giingnan nga ang mga kahulogan niini tin-awon ra sa maong panahon. (Daniel 8:17, 19; 11:35, 40; 12:9) Si Daniel usab misulat: “Sa mga adlaw nianang mga haria ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino.”​—Daniel 2:44.

Gihisgotan ni Jesu-Kristo “ang kataposan” sa dihang iyang gitubag ang pangutana bahin sa “ilhanan sa [iyang] presensiya ug sa kataposan sa sistema sa mga butang.” (Mateo 24:3-42) Dayag nga si Daniel ug si Jesus nagtumong sa kataposang kahimtang, usa ka dakong kausaban nga makaapektar sa mga tawong nagkinabuhi sa yuta kaniadto ug karon. Si Daniel nagsulat bahin sa kataposan sa tanang kagamhanan sa yuta. Si Jesus naghisgot bahin sa “kataposan sa sistema sa mga butang.”

Angay ka bang maikag niini? Siyempre, kay kitang tanan nalangkit niini. Apan gibalewala lamang kini sa daghang tawo. Ang Bibliya nagtagna: “Sa kataposang mga adlaw adunay mangabot nga mga mabiaybiayon uban sa ilang mga pagbiaybiay, nga magpahiuyon sa ilang kaugalingong mga tinguha ug magaingon: ‘Hain na man kining gisaad nga presensiya niya? Aw, sukad sa adlaw nga ang atong mga katigulangan nangatulog sa kamatayon, ang tanang butang nagpadayon nga mao ra gayod sukad sa sinugdan sa kalalangan.’” (2 Pedro 3:3, 4) Oo, ang pipila nagtuo nga ang mga panghitabo kaniadto nagbalikbalik ra pagkahitabo, ug ang kinabuhi magpadayon ra gihapon nga dili matapos.

Aduna bay pamatuod nga kita nagkinabuhi na gayod sa gitawag sa Bibliya nga kataposang mga adlaw? Atong susihon.