Kataposang mga Adlaw​—Unsay Mosunod?

ANG pipila mahadlok nga maghunahuna bahin sa “kataposang mga adlaw.” (2 Timoteo 3:1) Sila naghunahuna nga lisod kanang mga panahona. Kon mao, nganong latas sa mga katuigan daghan man kaayo ang nahinam niini? Kay ang kataposang mga adlaw nagpaila usab nga moabot ang mas maayong mga panahon.

Si Sir Isaac Newton, pananglitan, kombinsido nga ang panahon sa kataposan mosangpot sa bag-ong panahon sa kalinaw ug kauswagan sa tibuok kalibotan ilalom sa Pagmando sa Gingharian sa Diyos sa Usa ka Libo ka Tuig. Siya miingon nga ang tagna sa Miqueas 4:3 ug Isaias 2:4, matuman nianang panahona: “Ilang pagasalsalon ang ilang mga espada nga mga punta sa daro ug ang ilang mga bangkaw nga mga galab. Dili sila mobakyaw sa espada, nasod batok sa nasod, ni makakat-on pa sila sa gubat.”

Sa dihang gihisgotan ni Jesus ang panahon sa kataposan, iyang giagda ang iyang mga sumusunod nga magmapositibo. Human hisgoti ang mga kalisdanan, kabalaka, ug kahadlok nga mokaylap sa dakong kasakitan, siya miingon: “Inigsugod pagkahitabo niining mga butanga, tindog nga tul-id ug ihangad ang inyong mga ulo, tungod kay ang inyong kaluwasan nagakaduol na.” (Lucas 21:28) Kaluwasan gikan sa unsa?

Kon Unsay Gisaad sa Diyos

Ang mga gubat, kaguliyang, kapintasan, ug gutom maoy pipila lamang sa mga kahimtang nga naghampak sa mga tawo karon ug milyonmilyon ang nagkinabuhi sa kahadlok ug kalisang. Naapektohan ka ba usab niini? Nan matikdi kon unsay gisaad sa Diyos:

“Sa dili na madugay, ug ang daotan mawala na . . . Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”​—Salmo 37:10, 11.

“Ang akong katawhan magapuyo sa malinawong puloy-anang dapit ug sa mga pinuy-anan sa bug-os nga pagsalig ug sa walay-pagkatugaw nga mga dapit-pahulayan.”​—Isaias 32:18.

“Gipahunong [ni Jehova] ang mga gubat hangtod sa kinatumyan sa yuta. Gibali niya ang busogan ug giputolputol ang bangkaw; ang mga karomata iyang gisunog sa kalayo.”​—Salmo 46:9.

“Sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila.”​—Miqueas 4:4.

“Aduna unyay dagayang lugas sa ibabaw sa yuta; sa tumoy sa kabukiran adunay pagsugwak.”​—Salmo 72:16.

“Kon bahin sa nagapatalinghog kanako, siya magapuyo sa kasegurohan ug dili matugaw sa kalisang sa katalagman.”​—Proverbio 1:33.

Bisan pag nagpuyo kita sa  dapit nga medyo malinawon, mahimong masakit ra gihapon kita ug mamatay. Kini usab mahanaw sa bag-ong kalibotan sa Diyos. Busa atong madahom nga makita nato pag-usab ang atong mga minahal sa kinabuhi nga nangamatay na. Matikdi kining mosunod:

“Walay pumoluyo nga moingon: ‘Ako masakiton.’”​—Isaias 33:24.

“Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”​—Pinadayag 21:4.

“Ingong kataposang kaaway, ang kamatayon pagawagtangon.”​—1 Corinto 15:26.

“Ang takna nagsingabot nga ang tanan nga anaa sa handomanang mga lubnganan makadungog sa tingog [ni Jesus] ug manggula.”​—Juan 5:28, 29.

Maanindot ang pagkasumaryo niini ni apostol Pedro sa dihang siya misulat: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.” (2 Pedro 3:13) Aron motunhay ang pagkamatarong sa tibuok yuta, kinahanglang hanawon ang mga tawo nga magdaot nianang kahimtanga. Sa susama hanawon usab ang mga nasod nga naggubatay ug nag-ulag daghang dugo tungod sa ilang hakog nga mga interes. Ang tanang yutan-ong pagmando pulihan sa pagmando sa Gingharian sa Diyos ilalom ni Kristo. Bahin niana nga pagmando, kita gipasaligan: “Sa kadagaya sa prinsipenhong pagmando ug sa pakigdait walay kataposan, ibabaw sa trono ni David ug ibabaw sa iyang gingharian aron kini matukod nga lig-on ug mapatunhay kini pinaagi sa hustisya ug pinaagi sa pagkamatarong, sukad karon ug hangtod sa panahong walay tino. Ang kasibot mismo ni Jehova sa mga panon ang mobuhat niini.”​—Isaias 9:7.

Ikaw makapahimulos usab niini kay ang Bibliya nagpasalig kanato: ‘Ang kabubut-on sa Diyos mao nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.’ (1 Timoteo 2:4) Ayaw paglangan. Pagkuhag kahibalo nga nagkahulogan sa kinabuhing walay kataposan. (Juan 17:3) Sugdi kini pinaagi sa pagkontak sa mga magpapatik niining magasina ug sa paghangyo ug libreng pagtuon sa Bibliya.

[Mga hulagway sa panid 8, 9]

Ikaw makalaom nga mabuhi sa walay kataposan sa pakigdait ug hingpit nga panglawas sa umaabot nga Paraiso dinhi sa yuta