Pagpaniid sa Kalibotan

◼ Sa miaging unom ka tuig, “halos 100,000 ka tawo . . . ang gipatay sa Tinipong Bansa.”​—THE NEW YORK TIMES, U.S.A.

◼ Usa ka network sa Internet nagpapas sa mga impormasyon bahin sa personalidad sa 29,000 ka kombiktadong mga kriminal labot sa sekso nga migamit sa ilang site. “Ang kusog nga pagdaghan sa mga impormasyon bahin niining mga tawhana [diha sa site] nagkinahanglag dinaliang aksiyon,” matod sa Attorney General sa Connecticut nga si Richard Blumenthal.​—REUTERS NEWS SERVICE, U.S.A.

◼ “Ang Tsina grabeng naapektohan sa kakulang sa mga ngalan. . . . Usa ka surbi sa nasod niadtong 2006 nagpakita [nga] mga 85 porsiyento . . . sa 1.4 bilyon ka tawo sa Tsina naggamit lamang ug 100 ka apelyido.”​—CHINA DAILY, TSINA.

◼ Sa matag kilometro nga ilang drayban, “mas daghan ug 32 ka pilo ang mamatay” sa mga aksidente sa motorsiklo kay sa nagsakay sa sakyanan.​—UC BERKELEY WELLNESS LETTER, U.S.A.

Mga Saksi ni Jehova Narehistro sa Turkey

Niadtong Hulyo 31, 2007, nadawat sa mga Saksi ni Jehova sa Turkey ang opisyal nga pahibalo nga sila narehistro na ingong usa ka legal nga relihiyosong grupo. Busa sila makahimo na sa pagpalit ug pagpanag-iyag propiedad, pag-abang ug mga tigomanan, pagdawat ug mga donasyon, ug pagpanalipod sa ilang legal nga mga katungod kon kinahanglanon.

Internet “Makapamenos sa Kaulaw”

Gipakita sa balita nga ang usa ka Aleman nga Web site nga gidisenyo aron mapasayon ang pagluib sa kaminyoon, nag-ingon nga dunay 310,000 nga naggamit sa ilang site ug 1,000 ang nagparehistro kada adlaw. Ang ahensiya nagpasigarbo nga sila makahatag ug mga tawong ikarelasyon sa pagpanapaw nga “100 porsiyentong dili gayod mailhan.” Usa sa mga direktor miingon: “Ang pagkadili-mailhan sa mga tawo diha sa Internet makapamenos sa kaulaw” ug “mas dali ra ang pagpakigrelasyon.” Lain pang direktor nagmasaligon nga ang Internet makapahimong popular sa pagluib sa kaminyoon.

Problema nga mga Bukog

Ang mga siyentipiko sagad naghubit sa kataposang “mga ang-ang” sa “ebolusyon sa tawo” nga kono ang Homo habilis nahimong Homo erectus ug dayon nahimo kining “modernong tawo,” ang Homo sapiens. Apan didto sa Kenya, nakaplagan ang duha ka bukog nga dili ra lagyo sa usag usa. Kini karon giinterpretar isip pamatuod nga ang Homo habilis ug Homo erectus, nga maoy gituohan nga katigulangan sa mga tawo, nagkinabuhi diay sa samang panahon. “Ang ilang dungan nga paglungtad nagpakita nga dili gayod mahimo nga ang Homo habilis nahimong Homo erectus,” nag-ingon si Meave Leakey, usa sa mga awtor sa maong taho.

Dili Maayong Klima sa mga Hinapos sa Semana?

Daghang Aleman nagduda nga ang klima sa mga hinapos sa semana dili maayo kon itandi sa mga adlaw nga tingtrabaho. Ang pagsusi sa 15 ka tuig nga mga impormasyon bahin sa klima gikan sa nagkalainlaing dapit sa Alemanya mahimong magpamatuod nga husto ang ilang pagduda, nagtaho ang Der Spiegel. Ang kinainitan mao ang Miyerkoles, ug Sabado ang kinabugnawan. Sa mga adlawng Sabado, 15 porsiyento nga mas daghan ang ulan, ug 10 porsiyento nga sagad moulan kay sa mga adlawng Lunes, nga maoy kinaughan nga mga adlaw. Ang mga adlawng Martes nag-aberids ug 15 minutos nga mas init kay sa mga adlawng Sabado. Gibanabana sa mga tigdukiduki nga ang mga binugang aso sulod sa semana maipon sa hinapos sa semana. Ang kainit sa adlaw motabang nga kini mapormang mga panganod pinaagi sa pagtaganag mga partikulo nga mahimong ulan.