Ang Hunahuna sa Bibliya

Unsay Gipangayo sa Diyos Kanimo?

TUNGOD sa kapuliki sa atong kinabuhi, daghang butang ang kinahanglan natong himoon. Tingali malisdan kita usahay sa pagbuhat sa tanan natong obligasyon. Apan, angay natong hinumdoman nga ang atong kinabuhi mismo maoy usa ka gasa gikan sa Diyos. (Salmo 36:9) Unsa ka dakong panahon ug kusog ang gipangayo sa Diyos kanato? Kita madasig sa makataronganong tubag sa Bibliya.

Si Jesus mas nahibalo kay ni bisan kinsa kon unsay gipangayo sa iyang Amahan sa mga tawo. (Mateo 11:27) Sa dihang gipangutana kon unsa ang kinadak-ang sugo, si Jesus miingon: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.” (Marcos 12:30) Unsay kahulogan niana? Sobra ba kaayo ang gipangayo kanato?

Kon Unsay Nalangkit sa Tibuok-Kalag nga Gugma Alang sa Diyos

Motubo ang atong gugma sa Diyos kon atong pamalandongon ang iyang walay-kinutobang pagkamaayo nga gipakita kanato. Kon bug-os kalag ang atong gugma, kita mapalihok sa paghatag sa Diyos sa atong kinamaayohan. Kita mobati sama sa gibati sa magsusulat sa Bibliya nga nag-ingon: “Unsay akong igabayad kang Jehova tungod sa tanan niyang mga kaayohan kanako?” (Salmo 116:12) Sa unsang paagi ang maong gugma alang sa Diyos makaapektar sa atong paggamit sa panahon?

Ang Bibliya wala maghatag ug espesipikong gidaghanon sa oras nga kinahanglan natong igugol matag semana alang sa pagsimba. Hinunoa, kini naghisgot ug mga kalihokan nga angay natong unahon ug kon nganong angay nato kanang buhaton. Pananglitan, si Jesus nagtudlo nga ang pagbatog kahibalo bahin sa Diyos maoy hinungdanong lakang nga motultol sa “kinabuhing walay kataposan.” (Juan 17:3) Siya usab miingon nga ang iyang mga sumusunod angayng magtabang sa mga tawong wala makaila sa Diyos aron sila maluwas pinaagi sa pagpaambit kanila sa kahibalo bahin sa Diyos. (Mateo 28:19, 20) Ang Bibliya nagsugo kanato sa pagpakig-uban kanunay sa mga isigkamagtutuo aron sa paglinig-onay ug pagdinasigay. (Hebreohanon 10:24, 25) Kining tanan nagkinahanglag panahon.

Kita ba gisugo sa Diyos nga magkinabuhing panatiko​—nga wala nay laing buhaton ug magsige na lag simba? Wala gayod! Kinahanglang tagdon usab nato ang hinungdanong mga butang sa adlaw-adlawng pagkinabuhi. Ang Bibliya nagsugo sa mga ulo sa pamilya sa pagtagana sa mga panginahanglan sa ilang mga pamilya, nga nag-ingon: “Tino nga kon adunay si bisan kinsa nga wala magtagana alang sa mga iya, ug ilabina alang sa mga sakop sa iyang panimalay, siya . . . mas daotan pa kay sa tawong walay pagtuo.”​—1 Timoteo 5:8.

Ang Diyos naglalang sa tawo uban ang katakos  sa pagkalipay sa kinabuhi. Busa, haom lamang nga mogugol kitag panahon uban sa atong mga pamilya ug mga higala aron magpahimulos sa lamiang mga pagkaon ug maayong lingawlingaw. Si Haring Solomon misulat: “Nasayran ko nga walay mas maayo alang kanila kay sa pagmaya ug sa pagbuhat ug maayo samtang buhi pa; ug usab nga ang matag tawo mokaon ug moinom ug magpahimulos ug maayo sa tanan niyang kahago. Kini ang gasa sa Diyos.”​—Ecclesiastes 3:12, 13.

Si Jehova nga Diyos nahibalo usab sa mga limitasyon sa tawo, “nga nahinumdom nga kita abog.” (Salmo 103:14) Ang Bibliya nag-ingon nga kita nagkinahanglag igong pahulay. Human sa ilang puliki nga kalihokan, gisugo ni Jesus ang iyang mga tinun-an sa pag-adto sa ‘mingaw nga dapit ug sa pagpahulay makadiyot.’​—Marcos 6:31.

Busa ang kinabuhi nga makapahimuot sa Diyos maoy timbang ug naglakip sa lainlaing mga kalihokan. Hinunoa, ang tanan natong kalihokan​—kini man direkta o dili direktang nalangkit sa pagsimba—​angayng magbanaag sa tibuok-kalag nga gugma alang sa Diyos. Ang Bibliya nagtambag: “Kon kamo magakaon o magainom o magabuhat sa bisan unsa, himoa ang tanang butang alang sa kahimayaan sa Diyos.”​—1 Corinto 10:31.

Malamposong Pagpahiluna sa mga Prioridad

Ang pag-una ba sa pagsimba sa Diyos diha sa atong kinabuhi maoy dili realistiko ug dili nato mahimo? Aron atong mahatag ang gipangayo sa Diyos kanato kita nagkinahanglag mga pagpasibo, o pagsakripisyo pa gani, sa paggamit sa atong panahon. Apan wala gayod mangayo ang atong mahigugmaong Maglalang sa pagbuhat sa mga butang nga dili nato mahimo. Gani, siya nagtagana kanatog daghang tabang aron atong mabuhat ang iyang kabubut-on. Kita magmalamposon kon kita magasalig sa “kusog nga gihatag sa Diyos.”​—1 Pedro 4:11.

Basin malisdan ka sa pagsal-ot sa espirituwal nga mga kalihokan diha sa imong eskedyul. Pakigsulti kanunay kang Jehova nga Diyos, ang “Tigpatalinghog sa pag-ampo.” (Salmo 65:2) Diha sa pag-ampo, imong ikapahayag ang imong mga kabalaka, sa pagkahibalo nga ‘siya may kahingawa kanimo.’ (1 Pedro 5:7) Si Haring David miampo: “Tudloi ako sa pagbuhat sa imong kabubut-on, kay ikaw mao ang akong Diyos.” (Salmo 143:10) Sa samang paagi, ikaw usab makahangyo sa Diyos sa pagtabang kanimo sa paghimo sa gikinahanglang mga kausaban sa imong kinabuhi.

Ang Bibliya mainitong nagdapit: “Duol sa Diyos, ug siya moduol kaninyo.” (Santiago 4:8) Kon imong buhaton ang mga kalihokan nga makapahimuot sa Diyos, sama sa pagtuon sa Bibliya ug pagtambong sa Kristohanong mga tigom, ikaw mas masuod kaniya. Sa baylo, siya magpalig-on kanimo aron ikaw mouswag.

Maylabot sa iyang mga paningkamot sa pagpasibo sa iyang mga prioridad, si Jelena, nga nagtuon sa Bibliya uban sa mga Saksi ni Jehova miingon, “Nalisdan ako sa pagpasibo sa akong mga prioridad.” Apan siya midugang: “Sa dihang misugod ako sa pagtambong sa Kristohanong mga tigom, ako nakabatog kusog sa pagpadapat sa giingon sa Bibliya. Nakatabang usab ang maunongong pagpaluyo sa uban.” Ang pagtagamtam sa mga kaayohan sa pag-alagad sa Diyos makapadasig pa gayod kanato. (Efeso 6:10) Si Jelena nag-ingon, “Miuswag ang akong relasyon uban sa akong bana ug ang akong paagi sa pagdisiplina sa akong mga anak.”

Ang gamhanang espiritu ni Jehova makapalig-on ug makapalihok kanimo sa pagsusi sa imong mga prioridad sa kinabuhi ug sa ‘pagpalit sa panahon’ aron sa pag-alagad sa Diyos bisan pa sa kapit-os sa kinabuhi karon. (Efeso 3:16; 5:15-17) Si Jesus nag-ingon, “Ang mga butang nga imposible sa tawo maoy posible sa Diyos.”​—Lucas 18:27.

NAKAPAMALANDONG KA BA?

◼ Nganong angay nimong unahon ang pagbuhat sa kabubut-on sa Diyos?​—Salmo 116:12; Marcos 12:30.

◼ Unsang mga kalihokan ang gidahom sa Diyos nga ikaw makig-ambit?​—Mateo 28:19, 20; Juan 17:3; Hebreohanon 10:24, 25.

◼ Sa unsang paagi ikaw molampos sa pagpasibo sa imong mga prioridad aron mapahimut-an ang Diyos?​—Efeso 5:15-17; Santiago 4:8.

[Hulagway sa panid 20]

Ang pagpahimuot sa Diyos nagkinahanglag pagkatimbang