Kon Nganong Daghan ang Nawad-ag Paglaom

Sa tibuok kalibotan, ang kuyaw nga mga hitabo nakapahadlok bahin sa umaabot. Nagkadaghan ang mga siyudad nga naggamit ug mga kamera aron panid-an ang mga tawo. Kay nahadlok sa mga terorista, daghang dagko nga mga erport ang napunog mga sundalo nga mora nag mga kampo militar. Nagkadaghan usab ang mga kawatan ug mga pedopilya nga naggamit sa Internet aron mangitag biktima. Bahin sa kalikopan, ang polusyon, pagpuril sa kalasangan, pagkapuo sa mga hayop ug mga tanom, ug ang pag-init sa klima nagpameligro sa umaabot nga kinabuhi sa atong planeta.

KINING mga kahimtanga daw dili katuohan kaniadto, apan karon kini nakaapektar sa tibuok yuta. Busa daghan ang nabalaka sa nagakahitabo sa kalibotan ug bahin sa ilang kaugmaon ug sa ilang mga anak. Basin moabot ang panahon nga ang mga tawo mahadlok na pag-ayo nga mosakay sa bus, tren, o ayroplano. Tungod sa pagmahal sa palaliton ug sobrang paggamit sa kahinguhaan sa yuta, mabatonan pa kaha sa mga tawo sa umaabot ang maayong pag-atiman sa panglawas, sustansiyadong pagkaon, ug igong gasolina?

Bahin sa pagmahal sa pagpatambal, ang usa ka ministro sa panglawas sa Canada miingon nga “makahahadlok kaayo ang umaabot.” Daghan usab ang nabalaka bahin sa pagkaon ug sa gasolina. Ngano? Aron dili na kaayo sila magsalig sa krudo, ang pipila ka nasod migastog dako sa paggamag itubil sa mga sakyanan sama sa ethanol, nga gikan sa mga tanom. Busa sa unang higayon sa kasaysayan, ang tiyan sa tawo ug ang tangke sa gasolina nag-ilogay sa abot sa yuta. Tungod niini, nagping-it na ang tawo sa kamahal sa pagkaon.

Sa kasamtangan, nagkadako ang kal-ang tali sa mga dato ug mga kabos, ug nakapasamot kini sa kasamok sa mga tawo. “Niining unang napulo ka tuig sa ika-21ng siglo, samtang atong nakita ang dakong pag-uswag sa kahimtang sa tawo, nakita usab nato ang grabeng kawalad-on,” nag-ingon ang World Health Organization. “Ang pangedaron sa tawo diha sa kinapobrehang mga nasod mius-os sa katunga kon itandi sa kinadatoang mga nasod.” Ang pangunang mga hinungdan niini mao ang sakit, kasamok, ug kalisod sa panginabuhi diha sa mga nasod nga huyang ang pangagamhanan.

Anaa usab ang pag-init sa klima nga nakapasamot sa problema, nga maoy hinungdan sa nagkalapad nga mga desyerto ug sa abnormal nga klima. Busa dili ikatingala nga ang mga tawong nahibalo niini gikuyawan bahin sa umaabot. Ang Bulletin of the Atomic Scientists, nga maoy nagpasibo sa gitawag nga Orasan sa Adlaw sa Paghukom nabalaka usab sa umaabot, “kay padayong nakita sa mga siyentipiko ang nagkagrabeng mga epekto [sa pag-init sa klima] diha sa komplikadong kinaiyahan sa Yuta.”

Ingon na ba gayod niana ka dulom ang atong umaabot? Ang atong malipayong umaabot nag-agad ba lamang gayod sa mga lider sa negosyo, politika, relihiyon, ug siyensiya? Ang uban nag-ingon, ‘Naa pa ba kitay kapilian? Kita may nakaingon niini, kita say mosulbad niini.’ Gibati sa uban nga dili gayod kini masulbad sa tawo, ug nga ang atong bugtong paglaom alang sa luwas ug may kasegurohang umaabot mao na lamang ang Diyos. Nan, unsaon man nato pagkahibalo nga ang Diyos interesado kanato, nga dili niya tugotang laglagon sa tawo ang iyang isigkatawo? Tubagon kana sa mosunod nga mga artikulo.

[Blurb sa panid 3]

Ang atong malipayong umaabot nag-agad ba lamang gayod sa mga lider sa negosyo, politika, relihiyon, ug siyensiya?