Makagarantiya ba ang Tawo ug Malipayong Umaabot?

Mao pay imong pagbalhin sa usa ka bag-ong bunggalo nga sa imong tan-aw malig-on ug manindot. Ikaw nangandoy gayod niini. Morag makaseguro ka na sa imong umaabot! Apan pipila pa lang ka tuig ang milabay, nagkadaot na ang estruktura sa balay ug kinahanglan kining gub-on. Nahugno ang imong kasingkasing. Apan dili lang ikaw ang naguol. Gub-onon sab diay ang mga balay sa palibot. Sa dihang gisusi, nahibaloan nga sayop diay ang disenyo ug huyang ang mga estruktura.

SAMA nianang balaya, ang kalibotan napunog problema. Bisan pa sa daghang eksperimento sa pagpalambo sa kahimtang sa mga tawo ug sa politika maingon man sa talagsaong pag-uswag sa siyensiya ug teknolohiya, ang pangunang estruktura sa katilingban daw nagakahugno. Sa daghang nasod, ang paglapas sa balaod ug kagubot kaylap kaayo. Tungod niini nga mga kahimtang, matukmod kaha ang mga tawo sa pagsulbad sa mga problema ug sa pagtukod ug maayong kagamhanan? Matikdi ang gisulti sa pipila ka eksperto bahin sa kasaysayan sa tawo.

“Gisulayan na Nato ang Tanang Paagi”

Sa paningkamot nga himoong mas maayong puy-anan ang yuta, ang utokang mga tawo nga sama sa Gregong pilosopo nga si Plato, ug ang Aleman nga pilosopo ug sosyalista nga si Karl Marx, nagduso ug daghang matang sa kagamhanan. Ang resulta? Ang artikulo sa mantalaang New Statesman nag-ingon: “Wala nato mahanaw ang kakabos o mamugna ang kalinaw sa kalibotan. Ang kasukwahi na hinuon ang atong nakab-ot. Kita naningkamot ug gisulayan na nato ang tanang paagi sama sa komunismo, kapitalismo, Liga sa Kanasoran, ug pagdili sa paggamag nukleyar nga mga hinagiban. Nakigbugno na kitag daghang ‘gubat aron mahunong ang gubat’ kay abi natog mapukgo nato kini, apan diha sa atong mga siyudad aduna gihapoy mga gubat.” Ang artikulo nagpadayon: “Sa pagsugod sa [ika-20ng] siglo dako kaayo ang atong pagsalig nga ang mga siyentipiko makaluwas kanato, apan human nianang sigloha, wala gayoy natuman sa ilang gisulti.”

Niadtong 2001 ang retiradong propesor bahin sa ekonomiya ug kasaysayan sa katilingban didto sa London University nga si Eric Hobsbawm misulat nga ang politikal nga sistema “nag-atubang sa kahimtang nga ang gibuhat sa tawo nakaapektar nag dako sa kinaiyahan ug sa yuta.” Kini nga mga problema dili masulbad pinaagi sa “opinyon sa kadaghanan, ug kini dili maayong palaaboton alang sa demokrasya o sa yuta.”

 Sa dihang iyang nasabtan ang katalagman sa umaabot, ang eksperto sa astronomiya ug awtor sa himalitang mga basahon nga si Stephen Hawking nangutana: “Sa kalibotan nga nagkagubot ang mga tawo ug ang politika, ug nagkadaot ang kalikopan, molungtad pa kahag laing usa ka gatos ka tuig ang tawo?”

Nganong Wala Makasulbad ang Tawo?

Ang Bibliya lamang ang makasaysay ug maayo kon nganong ang tawo bug-os nga napakyas sa pagmando sa iyang kaugalingon. Ang Bibliya naghatag kanatog prangka nga impormasyon bahin sa kahimtang sa tawo. Pananglitan, tagda ang mosunod nga upat ka pangunang kamatuoran.

Kita dili-hingpit. “Ang tanan nakasala ug wala makaabot sa himaya sa Diyos.” (Roma 3:23) Sama nga ang daot nga estruktura makapahuyang ug makapahugno sa bilding, ang napanunod nga pagkadili-hingpit sa tawo nakapahuyang sa katilingban. Naglakip kini sa hilig sa tawo sa korapsiyon, panglimbong, kadalo, ug pag-abuso sa gahom. Kining mga problemaha dili bag-o. Halos tulo ka libo ka tuig kanhi, ang maalamong magsusulat sa Bibliya nag-ingon: “Ang tawo nagmando sa tawo alang sa iyang kadaotan.”​—Ecclesiastes 8:9.

Ang mga lider sa kagamhanan ug mga hukmanan nakasabot sa atong mga kahuyangan ug sila naningkamot sa pagpukgo niini pinaagi sa pagpanday ug daghang balaod. Apan sa paghimo niini, sila nahibalo gayod nga sila dili makahimog balaod aron ang tawo mahigugma sa iyang isigkatawo o maninguha sa pagsunod sa balaod.

Ang tawo mamatay. “Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan. Mogula ang iyang espiritu [o puwersa sa kinabuhi], mobalik siya sa iyang yuta; nianang adlawa mahanaw ang iyang mga hunahuna.” (Salmo 146:3, 4) Si Haring Solomon sa karaang Israel nga giisip ingong usa sa labing maalamong mga magmamando sukad, nakasabot nga ang iyang paghago wala ray kapuslanan. Siya misulat: “Ako mismo nagdumot sa tanan kong kahago nga akong gihagoan sa ilalom sa adlaw, nga akong ibilin sa tawo nga moabot sunod kanako. Ug kinsay nasayod kon siya mahimong maalamon o buangbuang? Bisan pa niana siya mogahom ibabaw sa tanan kong kahago . . . Kini usab kakawangan.”​—Ecclesiastes 2:18, 19.

Kita walay katakos sa pagmando nga epektibo. “Dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Ibutang ta nga kita hingpit. Apan ang Bibliya nagtudlo kanato nga sumala sa orihinal nga katuyoan sa Diyos, ang tawo wala sugoa sa Diyos sa pagmando sa iyang kaugalingon, ug wala kitay katakos sa pagbuhat niana nga epektibo. Pananglitan, nganong daw maglagot man ta kon dunay laing tawo o grupo nga magmandar kanato kon unsay buhaton, o magtakdag mga sukdanan sa pamatasan alang kanato? Ang tubag: Kita  gilalang aron mangayog pagtultol sa mas taas nga awtoridad alang sa giya sa kinabuhi. Ang maong Awtoridad mao ang Diyos.​—Isaias 33:22; Buhat 4:19; 5:29.

Ang tawo giimpluwensiyahan sa dili-makitang magmamando. “Ang tibuok kalibotan nailalom sa gahom sa usa nga daotan”​—si Satanas nga Yawa. (1 Juan 5:19) Kon ang manedyer sa usa ka kompaniya grabe ka korap ug impluwensiyado pa, naa kahay mahimo ang ordinaryong empleyado sa pagtul-id niana? Kon duna man ugaling gamay ra kaayo. Ingon usab niana ang kahimtang kon atong sulayan pagtul-id ang mga problema nga gimugna sa nagpahipi nga mga magmamando niining kalibotana​—ang dili-makita, daotang espiritung mga linalang nga gimaneobra ni Satanas. Ang Bibliya naghubit kanila ingong “mga kagamhanan,” “mga awtoridad,” “mga magmamando sa kalibotan niini nga kangitngit,” ug “daotang mga puwersa nga espirituhanon sa langitnong mga dapit.”​—Efeso 6:12.

Giyagyag sa Bibliya ang mga kapakyasan sa tawo ug sa di-makitang mga magmamando sa kalibotan. Gihatag usab niini ang maayong balita nga makasulbad gayod sa atong mga problema, sa ingon naghatag kanatog lig-ong rason sa paglaom.

Motabang ang Atong Maglalalang!

Kon kitakita ra, wala gayod kitay mahimo sa pagsulbad niini. Bisan ang labing utokan, impluwensiyado, o bahandianong tawo dili gayod makapukgo bisag usa na lamang sa upat ka kamatuoran nga gihisgotan niining artikuloha. a Apan sama sa gisaysay sa sunod nga artikulo, ang atong Maglalalang wala gayod malimot ni mobiya kanato. Ngani, isip may katungod nga Magmamando sa yuta, iyang wagtangon ang tanang babag sa atong kalipay. (1 Juan 4:8) Dugang pa, iya kanang himoon sa di madugay. Giunsa man nato pagkasayod niana?

Sama sa gisaysay sa gula niining magasina sa miaging bulan, ang mga hitabo sa kalibotan ug ang mga tinamdan sa tawo tin-awng nagpakita nga kita ania na gayod sa hinapos sa “kataposang mga adlaw” niining kalibotana. (2 Timoteo 3:1; Mateo 24:3-7) Dili tinuod nga ang kataposan moabot pinaagig nukleyar nga gubat, o nga ang atong planeta mobangga sa usa ka dakong bato sa kawanangan, o sa way paturagas nga pagpatay sa maayo ug daotang mga tawo. Hinunoa, ang Diyos ang mohimo niini, nga maglaglag lamang sa mga daotan, lakip kadtong mamugos sa pagpatunhay sa ilang pagmando. (Salmo 37:10; 2 Pedro 3:7) Sa samang panahon, ang Diyos magtapos sa tanang pag-antos nga gipahinabo sa mga magsusupak sa Diyos. b​—2 Tesalonica 1:6-9.

Human niana, ang Maglalalang magsulbad sa atong mga suliran sa pangagamhanan pinaagi sa paghatag ug bug-os nga awtoridad sa “gingharian sa Diyos” sa pagmando sa yuta. (Lucas 4:43) Sama sa atong mabasa, kana nga kagamhanan sa kalibotan motabang kanato sa paglantaw sa umaabot sa makapalipayng paagi.

[Mga footnote]

[Kahon/​Hulagway sa panid 5]

HUYANG NGA “MGA ESTRUKTURA” SA KATILINGBAN

◼ Kita dili-hingpit.

◼ Ang tawo mamatay.

◼ Kita walay katakos sa pagmando nga epektibo.

◼ Ang tawo giimpluwensiyahan sa dili-makitang magmamando.

[Kahon sa panid 6]

DILI GAYOD MALAGLAG SA TAWO ANG YUTA!

Gipasiugda pag-ayo sa Bibliya ang katuyoan sa Maglalalang nga himoong luwas ug malinawong puy-anan ang yuta alang sa mga tawong mahinadlokon sa Diyos. Matikdi ang mosunod nga mga teksto.

“Gitukod niya ang yuta ibabaw sa pihong mga dapit niini; kini dili matarog hangtod sa panahong walay tino, o hangtod sa kahangtoran.”​—Salmo 104:5.

“Ikaw lig-ong nagpahimutang sa yuta, aron kini magpadayon.”​—Salmo 119:90.

“Usa ka kaliwatan moagi, ug usa ka kaliwatan moabot; apan ang yuta magpabilin bisan hangtod sa panahong walay tino.”​—Ecclesiastes 1:4.

“Ang yuta mapuno sa kahibalo kang Jehova ingon sa katubigan nga nagtabon sa dagat mismo.”​—Isaias11:9.

“[Si Jehova] ang Mag-uumol sa yuta ug ang Magbubuhat niini, Siya nga mao ang Usa nga lig-ong nagtukod niini, nga wala maglalang niini sa wala lamay kapuslanan, nga nag-umol niini aron pagapuy-an.”​—Isaias 45:18.