Musika​—Gasa sa Diyos nga Makalipay sa Kasingkasing

TINAMPO SA MAGSUSULAT SA PAGMATA! SA ESPANYA

ANG musika gamhanan. Kini makaparelaks, makapalagsik, ug makapalipay kanato. Pinaagi niini, ikapahayag nato ang atong kalipay ug kaguol. Ang musika, nga nahimo nang bahin sa halos tanang kultura kaniadto ug karon, makatandog sa atong kasingkasing ug hunahuna. Oo, kini usa gayod ka gasa gikan sa Diyos.​—Genesis 4:21.

Lagmit nga nakadungog na kitag musika bisan sa masuso pa kita. Tingali gilaylayan kita sa atong inahan aron kita makatulog. Sa tin-edyer na kita, lagmit ganahan kaayo kitang maminaw ug musika nga makatandog sa atong kasingkasing. Bisag hamtong na, daghan kanato ang gustong magpatokar ug makaparelaks nga musika samtang nagdrayb o kaha human sa tibuok-adlawng buluhaton.

Ang usa ka awit mahimong maghisgot sa kultura o kasaysayan sa usa ka nasod. Daghan sa espesyal nga mga kasaulogan sa mga Israelitas kanhi gisaulog pinaagig mga awit. (Exodo 15:1-21; Maghuhukom 5:1-31) Ang manalagnang si Moises nagmugnag awit nga naglakip sa ilang kasaysayan ug sa kinasingkasing nga tambag alang sa katawhan sa Diyos. (Deuteronomio 32:1-43) Sa walay duhaduha, ang maong mga awit nakatabang kanila nga mahinumdoman kana.

Makahimo Ka sa Pag-awit!

Lagmit maghunahuna ka, ‘Wala koy hanaw sa musika.’ Aw, hunahunaa sa makadiyot ang imong tingog. Tungod kay makapatungha man kini ug lainlaing tono, halos kitang tanan makahimo sa pag-awit bisag walay duyog. Bukha lang ang imong baba ug sugdi ang pag-awit. Ayawg kabalaka bisag dili makaangay ang uban sa imong pag-awit. Kon magsige kag praktis, lagmit moarang-arang ang imong tingog.

Ang magasing Kinatsila nga Psychologies nag-ingon: “Ang [atong] tingog dakog kalambigitan sa atong dulot nga pagbati, ug kini mao ang labing maayong instrumento sa pagpahayag niana.” “[Ang pag-awit] makalipay,” matod pa sa soprano nga si Ainhoa Arteta. “Ako nagdasig ni bisan kinsa nga gustong mokanta aron ipahungaw ang iyang gibati nga dili magpanuko sa pag-awit.”

Tungod kay ang musika dakog impluwensiya kanato, kita kinahanglang magmapilion. Pananglitan, kon mananoy ang honi, dili na kaayo nimo mamatikdan ang maot nga mga liriko niini nga nagpakamatarong o nagpasiugda pa gani sa pagdumot, imoralidad, o kapintasan​—mga butang nga angayng likayan sa usa nga gustong magpahimuot sa Diyos. (Efeso 4:17-19; 5:3, 4) Ang Pulong sa Diyos nag-ingon: “Labaw sa tanan nga pagabantayan, ampingi ang imong kasingkasing, kay niana nagagikan ang mga tuboran sa kinabuhi.” (Proverbio 4:23) Oo, hinungdanon gayod kon unsang matanga sa musika ang imong pilion. a

Ang Maayong Musika Maayog Epekto sa Panglawas

“Ang maayong epekto sa musika diha sa panglawas sa usa ka tawo maoy usa sa mga rason kon nganong adunay musika sa halos tanang kultura,” matod pa sa librong Principles and Practice of Stress Management. Ang laing reperensiya nag-ingon nga sa dihang mokanta kita, mokurog ang tibuok natong lawas. Sa baylo, kining hinay nga pagkurog sa lawas makatabang nga marelaks ug mohumok ang kaunoran, nga lagmit makapakunhod sa gibating kasakit.

Busa, sugyotan sa pipila ka terapista ang tensiyonado nga mga pasyente nga maminaw ug mananoy nga mga awit kay kini makaparelaks. Ang pipila ka ospital magpatokar pa gani ug musika diha sa intensive care unit. Maayo usab ug epekto ang mananoy nga musika sa mga masuso nga naahat pagkatawo ug sa mga pasyente nga gioperahan. Gipakita sa mga pagtuon, sumala pa sa Principles and Practice of Stress Management, nga ang pagpaminawg  makaparelaks nga musika “makapaus-os sa mga hormone nga maoy hinungdan sa tensiyon panahon sa operasyon.”

Ang pagpamati ug musika lagmit makapaus-os usab sa tensiyon sa mga mabdos ug makatabang kanila nga marelaks panahon sa ilang pagbati ug pagpanganak. Ang mga dentista usab magpatokar usahay ug mananoy nga awit aron marelaks ang ilang pasyente nga gikulbaan. Apan labaw pa niana ang mahimo sa musika. Kini makapalig-on usab sa atong relasyon sa Diyos.

‘Pinaagi sa Awit Pagadayegon Ko ang Diyos’

Nahibalo ka ba nga halos ikanapulo ka bahin sa Bibliya maoy mga awit? Kini naglakip ilabina sa mga Salmo, Awit ni Solomon, ug sa Lamentaciones. Hisabtan nga ang kadaghanan sa tulo ka gatos nga paghisgot sa mga awit diha sa Bibliya nalangkit sa pagsimba kang Jehova. “Si Jehova mao ang akong kusog . . . , ug pinaagi sa akong awit pagadayegon ko siya,” misulat ang hari sa Israel nga si David, nga usa ka batid nga musikero ug tigkomposo.​—Salmo 28:7.

Gani, si David nag-organisar ug 4,000 ka lalaki sa tribo ni Levi aron mag-alagad ingong mga tigtugtog ug mga mag-aawit sa Jerusalem. Ang 288 kanila “binansay sa awit alang kang Jehova, tanan mga batid.” (1 Cronicas 23:4, 5; 25:7) Sa walay duhaduha kini nga mga mag-aawit nagbansay pag-ayo. Sa pagkatinuod, hinungdanon kaayo ang musika diha sa pagsimba sa Diyos mao nga ang mga mag-aawit wala na hatagig lain pang obligasyon sa templo aron maatiman nila sa bug-os ang ilang pag-awit.​—1 Cronicas 9:33.

Sa gabii una mamatay si Jesus, siya ug ang iyang mga apostoles nag-awit ug mga pagdayeg sa Diyos. Lagmit ilang giawit ang Salmo 113 ngadto sa 118. Sa panahon ni Jesus, kini nga mga salmo​—nga gitawag ug “Hallel nga mga Salmo”—​awiton panahon sa pagsaulog sa Paskuwa. (Mateo 26:26-30) Ang pamulong nga “Hallel nga mga Salmo” nagtumong sa balik-balik nga paggamit sa pulong “Hallelujah!” o “Aleluya!” nga nagkahulogang “Dayega si Jah!” Ang “Jah” maoy pinamubo, balaknong porma sa ngalang Jehova, ang ngalan sa Labing Hataas nga Diyos.​—Salmo 83:18.

Ang pag-awit nahimong bahin usab sa Kristohanong pagsimba. Ang librong The History of Music nag-ingon: “Ang unang mga Kristohanon manganta diha sa ilang publiko ug pribadong pagsimba. Dili kini bag-o alang sa kinabig nga mga Hudiyo tungod kay manganta man usab sila kaniadto diha sa ilang mga sinagoga . . . Gawas pa sa Hebreohanong mga Salmo . . . , kining bag-ong relihiyon padayong nagmugnag bag-ong mga awit.” Karong adlawa usab, ang Kristohanong mga Saksi ni Jehova malipay sa pagdayeg kaniya pinaagig mga awit, diha sa ilang balay ug diha sa ilang Kristohanong mga tigom.

Tungod kay ang musika makapaarang kanato sa pagpahayag sa halos tanan natong pagbati ug tungod kay dako kinig epekto sa atong kasingkasing, hunahuna, ug lawas, kinahanglang pabilhan nato pag-ayo kining ‘hingpit nga regalo gikan sa itaas.’ (Santiago 1:17) Oo, hinaot atong gamiton kini nga makanunayon ug sa maalamong paagi.

[Footnote]