Gikan sa Among mga Magbabasa

Unsay Umaabot sa Kristiyanidad? (Pebrero 2007) Kadaghanan sa inyong gisulat gipasukad gayod sa Pulong sa Diyos, ug uyon ako niana. Apan, may duha lang ka butang nga wala nako magustohi. Una, inyong gisaway ang ubang relihiyon, ug ikaduha, inyong giisip ang inyong kaugalingon nga mas maayo kay sa uban. Maayo unta kon magkahiusa kitang tanan ug usa ray relihiyon, apan dili ingon niana ang kahimtang. Para nako, walay relihiyon o sekta nga mas maayo kay sa uban.

S. S., Tinipong Bansa

Ang “Pagmata!” nagtubag: Ang mga Saksi ni Jehova dili batok ni bisan kinsang membro sa ubang relihiyon, ni nag-isip sa among kaugalingon nga mas maayo kay sa uban. Kami nagtuo sa giingon sa Bibliya nga “ang tanan nakasala ug wala makaabot sa himaya sa Diyos.” (Roma 3:23) Tungod niana, among gigamit ang among kusog, panahon, ug salapi sa pagduaw sa kabalayan aron ipaambit sa mga tawo ang kamatuoran sa Bibliya, lakip na ang kahibulongang paglaom nga nasulat diha niana. Apan, gisundog lamang sa mga Saksi ni Jehova ang gibuhat ni Jesus ug sa iyang mga tinun-an nga maisogong nagyagyag sa pagkasalingkapaw sa relihiyosong mga lider ug sa ilang kasaypanan.

Unsay Imong Tubag? Sa miagi, talagsa ra nakong hisgotan kining seksiyona sa magasin uban sa duha nako ka bata. Apan karon, akong nakita nga mapuslanon kaayo kini nga tabang sa pagpatisok sa kamatuoran diha sa ilang kasingkasing. Maayo usab kaayo kini nga tabang sa pagpalig-on sa akong pagtuo.

I. H., Czech Republic

Mapasalamaton kaayo ako niining makaiikag nga seksiyon sa magasin tungod kay magamit nako kini sa personal nga pagtuon. Maayo kaayo kining pagkaandam, bisan ang kinagamyang mga detalye niini! Natabangan ako niini nga mas masuod sa akong maalamong Amahan nga si Jehova.

A. S., Rusya

“Jehova, Palihog Paalagara Ko Nimo” (Hulyo 2007) Nalig-on ang akong pagtuo kang Jehova sa dihang nabasa nako ang sugilanon sa kinabuhi ni Danielle Hall. Bisag bata pa, siya wala mahadlok nga ipaila sa tanan diha sa tunghaan nga siya usa ka Saksi ni Jehova. Segurado ako nga ingon usab niini ang buhaton sa daghang batang Saksi diha sa ilang tunghaan.

A. R., Madagascar

Nuybe anyos ako. Bag-o ra namong nabasa ni Mama ang kaagi ni Danielle. Nakahunahuna ko nga bulahan kaayo ko kay anaa sa kamatuoran ang akong mga ginikanan ug dili lisod para nako ang pag-alagad kang Jehova. Gusto kaayo nako ang giingon niini nga “bisag asa pa kita magpuyo, si Jehova nagauban gayod kanato.” Ganahan pod ko sa gihimo ni DanieIle. Inigpauli niya gikan sa eskuylahan, siya molingkod sa iyang kama ug makigsulti kang Jehova bahin sa iyang gihimo sa tibuok adlaw, nga morag nakig-estorya siya sa iyang papa. Himoon pod nako ni!

A. D., Italya

“Mga Batan-on Nangutana . . . Nganong Kanunay man Lang Kong Dili Iapil?” (Hulyo 2007) Ganahan kaayo ko ning artikuloha kay morag gituyo kini pagsulat para nako. Nagustohan sab nako ang seksiyon nga dunay mga pangutana ug sulatanag tubag. Salamat kaayo. Dako kaayo nig natabang nako.

C. A., Canada