Ang Hunahuna sa Bibliya

Kanus-a nga Makataronganon ang Pagdepensa sa Kaugalingon?

NATUGAW ang imong pagkatulog sa kagabhion tungod sa mga kasikas. Nakadungog kag mga tunob. Unya may nanglungkab aron makasulod sa inyong balay. Nagpangurog ka sa kakulba ug naghunahuna kon unsay imong buhaton.

Mahimo kining masinatian ni bisan kinsa. Ang krimen​—bisan ang mapintasong krimen—​kaylap bisan asa. Tungod niini, daghan ang namalit ug mga hinagiban o nagtuon ug martial arts aron mapanalipdan ang ilang kaugalingon. May mga balaod ang pipila ka gobyerno nga nagtugot sa mga molupyo sa paggamit sa ilang kusog nga mahimong makapatay isip pagdepensa sa kaugalingon. Apan unsay giingon sa Bibliya? Makataronganon ba nga ang usa mogamit sa iyang kusog sa pagdepensa sa iyang kaugalingon ug sa iyang pamilya?

Ang Diyos Nagdumot sa Kapintasan

Gisaway sa Bibliya ang kapintasan ug ang mga nanagbuhat niini. Ang salmistang si David miingon bahin kang Jehova nga Diyos: “Si bisan kinsa nga nahigugma sa kapintasan ginadumtan gayod sa Iyang kalag.” (Salmo 11:5) Gihukman sa Diyos ang pipila ka karaang nasod, lakip na ang iyang kaugalingong katawhan, tungod sa ilang kapintasan ug pag-ulag dugo. (Joel 3:19; Miqueas 6:12; Nahum 3:1) Bisan ang aksidenteng pagkamatay sa laing tawo tungod sa pagpasagad maoy seryosong sala ilalom sa Balaod nga gihatag ngadto sa Israel.​—Deuteronomio 22:8.

Ang Bibliya nag-awhag kanato nga tinguhaon ang pakigdait matag adlaw aron malikayan ang panagbangi. Ang kasagarang hinungdan sa kapintasan mao ang mainitong panaglalis. Nag-ingon  ang Bibliya: “Kon walay sugnod nga kahoy ang kalayo mapalong, ug kon walay tigbutangbutang ang panaglalis mohunong.” (Proverbio 26:20) Ang pagkakalmado sagad makapuypoy sa kasuko ug makapugong sa panag-away. Si apostol Pablo misulat: “Kon mahimo, kutob sa inyong maarangan, makigdinaitay sa tanang tawo.”​—Roma 12:18.

Kon Nameligro Ka

Wala man hinuon kini magpasabot nga dili na gayod kita atakehon sa mga tawong bangis kon gitinguha nato ang pakigdait. Latas sa kasaysayan, ang matinumanong mga alagad sa Diyos biktima usab sa mapintas nga krimen. (Genesis 4:8; Job 1:14, 15, 17) Kon tulison sa tawong armado, unsay angayng buhaton sa usa? Si Jesus nagtambag: “Ayaw sukli siya nga daotan.” (Mateo 5:39) Siya miingon usab: “Kaniya nga magakuha sa imong panggawas nga besti, ayaw ihikaw bisan ang pang-ilalom nga besti.” (Lucas 6:29) Si Jesus wala mag-awhag sa paggamit ug mga hinagiban aron depensahan ang mga kabtangan. Kon siya tulison, dili pakamatyan sa usa ka maalamong tawo ang iyang mga bahandi. Sa pagkatinuod, mas bililhon gayod ang kinabuhi kay sa mga bahandi!

Sa laing bahin, komosta kon ikaw giatake ug nameligro ang imong kinabuhi? Ang usa ka balaod nga gihatag sa Diyos ngadto sa karaang Israel makahatag kanatog katin-awan. Kon ang kawatan madakpan sa adlawan ug napatay, mahimong sad-an sa pagbuno ang nakapatay kaniya. Kini tungod kay dili man kamatayon ang silot sa pagpangawat ug ang kawatan mahimong kasilotan sumala sa balaod. Apan, kon madakpan siya sa gabii ug mapatay, mahimong dili masilotan ang nakapatay tungod kay wala man siya makaseguro sa tumong ug tuyo sa maong tawo. Mahimong mangatarongan ang tagbalay nga nameligro ang kinabuhi sa iyang pamilya mao nga iya kining gipanalipdan.​—Exodo 22:2, 3.

Busa gipakita sa Bibliya nga mahimong depensahan sa usa ka tawo ang iyang kaugalingon ug ang iyang pamilya kon sila atakehon. Mahimo niyang sagngon ang mga kumo, pugngan ang tig-atake, o kaha sumbagon aron moatras o dili na siya makaatake. Ang iyang tumong mao ang paghadlok o pagpahunong sa tig-atake. Kon sa iyang paghimo niini maangol o mamatay ang tig-atake, kini aksidente lamang ug wala tuyoa.

Ang Kinamaayohang Proteksiyon

Dayag nga may mga kahimtang nga makataronganon ang pagdepensa sa atong kaugalingon. Katungod sa mga tawo ang pagpanalipod sa ilang kaugalingon ug sa ilang mga minahal sa kinabuhi kon sila nameligro sa mga kamot sa tig-atake. Kon wala na gayoy kaikyasan, wala kita gidid-an sa Bibliya sa pagdepensa sa atong kaugalingon sa makataronganong paagi. Hinunoa, ang maalamon natong buhaton mao ang paglikay gayod sa mga kahimtang nga magladlad kanato sa kapintasan.​—Proverbio 16:32.

Ang Bibliya nag-awhag kanato sa ‘pagpangita sa pakigdait ug sa pagsunod niini’ diha sa tanang bahin sa atong kinabuhi. (1 Pedro 3:11) Kining maalamon nga tambag makaamot sa malinawong pagkinabuhi.

NAKAPAMALANDONG KA BA?

◼ Nganong angay natong likayan ang kapintasan?​—Salmo 11:5.

◼ Unsa ang maalamong paagi sa pagpanalipod sa materyal nga mga kabtangan?​—Proverbio 16:32; Lucas 12:15.

◼ Unsa nga tinamdan maylabot sa panag-away ang makapugong sa kapeligrohan?​—Roma 12:18.

[Blurb sa panid 11]

Gipakita sa Bibliya nga mahimong depensahan sa usa ka tawo ang iyang kaugalingon ug ang iyang pamilya kon sila atakehon