“Unsa bay Nahitabo sa Akong Anak?”

Nakurat si Scott ug Sandra a pagsulod sa ilang 15-anyos nga anak nga babaye sa sala. Labihan ka pula ang kolor sa iyang buhok nga bulaw kanhi! Mas nakuratan pa sila sa sunod nilang estoryahay.

“Gitugtan ka ba namo sa pagtina sa imong buhok?”

“Aw, wala man mo mag-ingon nga dili ko makatina.”

“Nganong wa man ka mananghid?”

“Kay nahibalo kong di mo mosugot!”

INGON sa napamatud-an ni Scott ug Sandra, lisod ang yugto sa pagkatin-edyer para sa mga tin-edyer mismo ingon man sa mga ginikanan. Sa pagkatinuod, daghang amahan ug inahan ang dili gayod andam sa dagko ug kalit nga mga kausaban sa dihang matin-edyer na ang ilang anak. “Kalit rang nausab ang among anak nga babaye,” nahinumdom si Barbara, usa ka inahang taga-Canada. “Nahibulong ko, ‘Unsa bay nahitabo sa akong anak?’ Samag siya gikuha ug gibayloan samtang natulog mi!”

Dili gayod talagsaon ang kasinatian ni Barbara. Tagda ang gisulti sa mga ginikanan gikan sa ubang bahin sa kalibotan sa magasing Pagmata!

“Sa natin-edyer na, ang akong anak nga lalaki dili mamati sa opinyon sa uban ug may tendensiya pa sa paghagit sa among awtoridad.”​—Lia, Britanya.

“Ang among mga anak nga babaye magsige lag hunahuna sa ilang kaugalingon, ilabina sa ilang dagway.”​—John, Ghana.

“Ang akong anak lalaki magbuotbuot lag desisyon. Dili niya gustong pasulti kon unsay buhaton.”​—Celine, Brazil.

“Dili na magpahalog o magpagakos kanamo ang among anak babaye.”​—Andrew, Canada.

“Gahi nag ulo ang among mga anak nga lalaki. Inay mouyon sa among mga desisyon, ila kanang kuwestiyonon ug ergohon.”​—Steve, Australia.

“Giluom sa akong anak nga babaye ang iyang mga pagbati. Dili na siya magtingog-tingog ug maglagot kon among pangutan-on sa iyang gibati.”​—Joanne, Mexico.

“Ang among mga anak maghilom-hilom lang ug gusto silag dugang pribasiya. Kasagaran, mas gusto pa silang mouban sa ilang mga barkada kay kanamo.”​—Daniel, Pilipinas.

Ingong ginikanan sa usa ka tin-edyer, tingali ang pipila niining mga komentoha susama usab sa imo. Kon tinuod kana, salig lang nga makasabot ka ra sa maong “estranyo” diha sa inyong taliwala, ang tin-edyer nimong anak nga lalaki o babaye. Makatabang kanimo ang Bibliya. Sa unsang paagi?

Kaalam ug Pagsabot

Ang usa ka proverbio sa Bibliya nag-ingon: “Batoni ang kaalam, batoni ang pagsabot.” (Proverbio 4:5) Kanang duha ka hiyas gikinahanglan pag-ayo sa pagdumalag tin-edyer. Gikinahanglan mo ang pagsabot aron imong masabtan ang hinungdan sa iyang panggawi ug sa nagakahitabo kaniya. Gikinahanglan mo usab ang kaalam aron makasanong ka sa paaging makapadayon  ka sa paggiya kaniya hangtod siya mahimong hingkod ug kasaligan.

Ayawg hunahunaa nga ikaw wala kinahanglana sa imong anak kay maorag layo na kamo sa usag usa. Sa pagkatinuod, gikinahanglan ug gusto sa mga tin-edyer nga ang ilang mga ginikanan motabang kanila niining lisod nga yugto sa ilang kinabuhi. Sa unsang paagi ang pagsabot ug kaalam makatabang kanimo sa paggiya kanila?

[Footnote]