Ang Diyos Mitabang Kanako sa Pagsagubang sa mga Pagsulay

Sumala sa giasoy ni Vazir Asanov

Pagbakod nako, akong gihigot ang Bibliya sa akong hawak ug nagdalidalig ilis. Sa wala pa ko molakaw agi sa bentana, nagbutang kog mga sinina sa kama ug ako kanang gitabonag habol aron ingnon nga natulog ko. Dayon midagan ko paingon sa Kingdom Hall nga nag-ampo sa Diyos alang sa tabang. Kini nahitabo niadtong 1991 sa 14 anyos pa ako.

AKO natawo diha sa usa ka siyudad sa habagatang bahin sa dapit nga gitawag karon ug Kazakhstan, nga usa kaniadto sa 15 ka republika sa Unyon Sobyet. Kurd ang among kagikan. Gisilsil kanako sa akong mga ginikanan ug sa among mga paryente nga ako mamahimong lider nga maghatag ug kagawasan sa akong katawhan. Tungod kay gidumtan nako ang kaaway sa mga Kurd, andam kong mopatay aron dili madaogdaog ang among katawhan.

Sa ulahing bahin sa katuigan sa 1980, kami sa akong mama ug manghod nga lalaki misugod sa pagtuon sa Bibliya uban sa mga Saksi ni Jehova. Apan gidid-an mi ni Papa sa pagpakig-uban sa mga Kristohanon. Bisan pa niana, ako nagpadayon sa pagtuon. Sa among kultura, gitahod gayod ang mga ulo sa pamilya. Gimahal nako ang akong amahan, apan gimahal usab nako ang kamatuoran sa Bibliya nga akong nakat-onan.

Pagsupak Diha sa Balay ug Eskuylahan

Usa ka higayon niana, nakita sa akong maestro ang kopya sa magasing Bantayanang Torre diha sa akong bag ug gisultihan niya ang akong mga ginikanan bahin niana. Sa kalagot, gidapatan ko ni Papa mao nga nagdugo ang akong ilong. “Nakig-uban ka pa diay nianang relihiyona!” siya misingka.

Human niana, si Papa miingon nga wala na ko niya isipa nga anak. Nasakitan ko pag-ayo niana! Gawas pa, daghan sa akong mga klasmet milikay na kanako ug gibiaybiay pa gyod ko sa uban. Mubo kaayo ang grado nga gihatag sa akong mga magtutudlo ug ilang gibiaybiay ang akong tinuohan diha sa klase aron isalikway usab nako ang akong pagtuo sa Diyos sama kanila.

Bisan pa sa maong mga pagsupak, naningkamot ko sa pagtambong sa Kristohanong mga tigom ug sa pagpaambit sa akong bag-ong tinuohan ngadto sa uban. Wala madugay, nahibaloan ni Papa nga nakig-uban gihapon ko sa mga Saksi ug nagbasa usab ug Bibliya. Usa ka Dominggo niana, nangita kog pasangil aron makatambong sa tigom. Dihadiha, gisugo ko ni Papa sa pagkatulog. Siya maisogong miingon, “Sukad karon, kinahanglang matulog ka na niining orasa sa matag Dominggo.” Iya kong gibaharan nga iya kong silotan kon ako siyang supakon, ug paminaw nako, iya gayod kanang tinud-on.

Ako naghilak samtang nag-ampo kang Jehova, ang matuod nga Diyos, nga mohumok unta ang kasingkasing ni Papa, apan wala mausab ang  iyang tinamdan. Akong nahinumdoman ang mga Israelinhon nga gidaogdaog kaniadto sa Ehipto. Naghunahuna ko nga si Papa morag si Paraon nga midumili sa pagpalakaw sa mga Israelinhon aron mosimba kang Jehova.​—Exodo 5:1, 2.

Paghimog Desisyon

Usa ka Dominggo niana, ako midesisyon nga motambong sa tigom. Gikulbaan ko pag-ayo samtang nag-ampo ko kang Jehova nga naghigda. Sa dihang misulod ang akong mga ginikanan sa akong kuwarto, nagpatulog-tulog ko. Si Papa mapasigarbohong miingon, “Tan-awa kon unsa ka masinugtanon ang akong anak.” Iya kong gihalokan, ug siya mibiya. Ako nagpadayon sa pag-ampo.

Sa dihang nakabiya na sila, sumala sa ako nang giasoy sa sinugdanan, midalidali kog bangon ug gikuha nako ang sapatos sa ilalom sa akong kama ug dayon mibiya ko agi sa bentana. Dali ra kaayong milabay ang duha ka oras diha sa tigom, ug naghunahuna ko kon unsa kahay mahitabo inig-uli nako. Ikalipay nga bisag nahibaloan ni Mama nga mga sinina diay tong atua sa kama, wala siya motug-an kang Papa. Apan iya kong gipasidan-an nga kon usbon pa nako ang akong gihimo, isumbong na gyod ko niya kang Papa.

Sa 1992, nananghid ko sa akong mga ginikanan nga mokuyog sa akong amigo sa pagtambong sa usa ka hinungdanong okasyon. Ang tinuod, motambong mi sa kombensiyon sa mga Saksi ni Jehova sa siyudad sa Taraz, nga mga 100 kilometros gikan sa among balay sa Karatau. Didto ko magpabawtismo ingong simbolo sa akong dedikasyon kang Jehova. Gipangutana nako si Mama kon mahimo ba kong mokuhag usa ka timba sa liso sa sunflower sa kamalig. Ako kanang gisanglag ug gibaligya sa merkado, ug ang kita niana maoy akong gigasto sa pagtambong sa asembliya.

Pag-uli nako, nangomosta si Papa kon maayo ra ba ang lakaw namo sa akong amigo. Ako siyang giingnan nga maayo kaayo. Gibati nako nga gitabangan ko ni Jehova tungod kay wala na ko niya sukitsukita. Gusto kaayo nako ang mga pulong sa Proverbio 3:5, 6: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.”

Naluya sa Espirituwal

Wala mohunong si Papa sa pagsupak kanako bisan sa dihang nabawtismohan na ko. Nagpadayon ko sa pagpakig-uban sa mga Saksi, ug tungod niana kulatahon ko ni Papa bisan atubangan sa daghang tawo. Halos kada adlaw ko makasinatig kalisdanan ug pagbiaybiay, ug kanunay kong maghilak. Ang Kazakhstan dili na sakop sa Unyon Sobyet niadtong panahona, ug ang akong mga ginikanan ug ang among mga paryente nagdasig kanako sa pagsulod sa politika. Sila naghunahuna nga akong giusikan ang higayon.

Ang akong magulang nga lalaki maayo sa esports, ug kanunay siyang ipasigarbo ni Papa kanako. Busa sa talitapos sa 1994, nahimo pod kong aktibo sa esports. Tungod kay hawod man ko sa soccer ug gymnastics, kadaghan ko makadaog ug gidayeg ko sa mga tawo. Nagtuon pod kog abogasiya aron makatabang ko sa mga Kurd. Nainteresado pa gani ko sa politika ug naghunahuna sa pagtukod ug usa ka partido sa batan-ong mga Kurd. Tungod niana gidayeg ko ni Papa.

“Midaog Ka Pa”

Naluya pag-ayo ang akong espirituwalidad. Miundang ko sa pagbasa sa Bibliya ug sa pagtambong sa mga tigom sa mga Saksi ni Jehova. Naghunahuna ko nga moalagad ra unya ko kang Jehova kon naa na ko sa hustong edad. Kas-a, gipangutana ko ni Papa kon nakig-uban pa ba ko sa mga Saksi ni Jehova. “Wala na. Midaog ka Pa,” mitubag ko. “Unya Pa, nalipay ka?”  Pagkadungog niya niini, nalipay siya pag-ayo. “Mao nay anak!” matod pa niya nga mapasigarbohon.

Wala na ko motambong sa tigom sulod sa duha ka tuig bisag dihay mga higayon nga kaadtoon kaayo ko. Napugngan ko sa akong kaulaw. Naghunahuna ko nga dili masabtan sa mga igsoon sa kongregasyon ang akong kahimtang.

Bisan pa niana, kombinsido gihapon ko nga wala nay mas maayo pa kay sa pag-alagad kang Jehova. ‘Total gihigugma bitaw nako si Jehova!’ Mao kana ang kanunay nakong isulti sa akong kaugalingon. Dayon gipugos ko ni Papa sa pag-eskuyla sa unibersidad. Misugot ko ug nanaad pa gani nga iniggraduwar nako, manghawod ko sa akong kurso. Apan diha sa akong kasingkasing, ako naglaom nga makakaplag ug mga Saksi sa Almaty, nga usa ka dako ug mauswagong siyudad sa habagatang Kazakhstan diin nahimutang ang unibersidad.

Nausab ang Kahimtang

Wala madugay sa dihang nagtungha na ko sa unibersidad, ako nakahimamat ug duha ka Saksi nga nagsangyaw diha sa usa ka dalan sa Almaty. Ila kong gipangutana, “Sa imong hunahuna, kinsay nagmando sa kalibotan?”

“Si Satanas nga Yawa,” mitubag ko, “ang kaaway ni Jehova ug sa tanang tawo.” (2 Corinto 4:3, 4) Ako silang gisultihan nga ako usa ka bawtismadong Saksi apan dili na aktibo.

Sa talitapos na ang 1996, ako misugod pagtuon sa Bibliya uban sa mga Saksi. Human makatuon sa pipila ka higayon, nahibalik ang akong tinguha sa pag-alagad kang Jehova, ug ako misugod sa pagpakigbahin sa mga kalihokan sa mga Saksi sa Almaty. Sa Septiyembre 1997, ako mialagad ingong payunir, o bug-os-panahong ministro.

Paglabay sa usa ka tuig, giduaw ko ni Papa. Midalidali kog tagbo kaniya ug ako siyang gigakos. Nangayo siyag pasaylo tungod sa iyang pagtratar kanako kaniadto. Nahimo kono to niya tungod kay wala siya makasabot kanako ug sa akong tinuohan. “Pa,” matod ko, “gimahal ta ka pag-ayo.”

Pwerte nakong lipaya sa dihang si Papa midawat ug basahon sa mga Saksi ug mihangyo usab ug Bibliya, ug misaad nga iya gayod kanang basahon! Paglabay sa usa ka tuig, siya miduaw pag-usab, ug niadtong higayona miuban si Mama. Sa Kingdom Hall, giduol ug giabiabi sila sa mga Saksi nga lainlaig nasyonalidad. Nakadayeg kaayo si Papa niini, ug nainteres siya sa pagbasa sa basahon sa mga Saksi.

Dagayang mga Panalangin

Sa Septiyembre 2001, ako naminyo sa usa ka buotang babaye nga Ruso, si Yelena. Siya nabawtismohan sa 1997 ug misulod sa bug-os-panahong pag-alagad sa Mayo 2003. Walay kasudlan ang among kalipay pagkahibalo namo nga ang akong mga ginikanan nagtuon na sa Bibliya uban sa mga Saksi ug nag-uswag na sa espirituwal. Sa pagkatinuod, dili gayod ko makatuo niini hangtod nga nadunggan nako kini mismo gikan sa akong amahan. Diha sa telepono, iya akong giingnan nga si Jehova mao ang bugtong matuod nga Diyos!

Ako nalipay pag-ayo nga dinhi sa Almaty nakapribilehiyo ko sa pagdumalag pagtuon sa Bibliya uban sa mga tawo nga naggikan sa lainlaing dapit sama sa Iran, Pakistan, Sirya, Tsina ug Turkey. Dili pa dugay, gihangyo ko sa usa ka pari gikan sa Iran nga tudloan siya sa Bibliya diha sa iyang pinulongan nga Persiano. Ang usa ka kanhing heneral sa Afghanistan nahingangha pag-ayo sa iyang nakat-onan bahin kang Jehova. Makapalipay usab ang pagdumalag pagtuon sa Bibliya sa usa ka tawo gikan sa Sirya diha sa akong pinulongang Kurdish ug sa uban pang mga tawo nga nagsultig Kazakh ug Ruso​—mga pinulongan nga ako usab nakat-onan sa bata pa ko.

Karon, nag-alagad mi ni Yelena sa usa kongregasyon nga Kazakh ug pinulongan, nga usa sa kapin sa 35 ka kongregasyon sa mga Saksi ni Jehova sa Almaty. Sa miaging tuig, kami ni Yelena nag-alagad sa bag-o pang nahuman nga opisina sa mga Saksi ni Jehova duol sa Almaty.

Sa bata pa ko, ako gitudloan sa pagdumot, apan gitudloan ko ni Jehova sa pagpakitag gugma. Kombinsido ko nga dili gayod nato angayng tugotan nga pahunongon ta sa atong mga paryente ug mga higala sa pag-alagad kang Jehova bisag ila kitang lisodlisoron. (Galacia 6:9) Karon malipayon ko nga kami sa akong asawa “puliki diha sa buluhaton sa Ginoo.”​—1 Corinto 15:58.

[Blurb sa panid 13]

Gipasidan-an ko ni Mama nga kon usbon pa nako ang akong gihimo, isumbong na gyod ko niya kang Papa

 [Hulagway sa panid 15]

Ang Kingdom Hall sa Karatau, diin ako mitambong sa bata pa ko

[Hulagway sa panid 15]

Akong mga ginikanan, nga dili na supak sa among Kristohanong buluhaton

[Hulagway sa panid 15]

Kami ni Yelena sa adlaw sa among kasal

[Hulagway sa panid 15]

Kami ni Yelena diha sa bag-ong opisina duol sa Almaty