Gikan sa Among mga Magbabasa

Pito ka Paagi Aron Mahimong Mas Maayong Ginikanan (Agosto 2007) Kining magasina maoy tubag sa akong mga pag-ampo. Aduna koy kuwatro-anyos nga anak nga babaye kinsa nahigugma kang Jehova, apan di gyod nako malikayan nga usahay mobati kog kahadlok nga basin masayop ko sa pagmatuto kaniya. Busa ako nag-ampo kang Jehova kada adlaw nga tabangan ko niya. Daghan kaayong salamat sa inyong paghunahuna kanamong mga ginikanan.

Y.M.A., Mexico

Kining mga artikuloha daw samag giya nga gituyo pagsulat para sa among pamilya, nga naghisgot sa daghang isyu nga nakapabalaka kanako! Kini mas nagpalig-on sa akong pagtuo nga si Jehova nahigugma gayod sa iyang katawhan. Iyang gidungog ang akong mga pag-ampo ug nakita ang akong mga luha ug siya nahibalo nga gikinahanglan gyod nako kining impormasyona.

J. M., Tinipong Bansa

Niining pipila lamang ka panid, daghan na kaayo mog nahisgotan nga hinungdanong giya ug instruksiyon nga mosaler gayod. Ang amo na lang himoon mao ang pagsunod niana!

E. L., Pinlandia

Ang Pagkapositibo Makaayo ba sa Panglawas? (Septiyembre 2007) Nakatabang pag-ayo nako kining artikuloha, kay sagad akong basolon ang akong kaugalingon sa mga problema nga motungha. Mao nga nakahunahuna ko nga dili ko maayong inahan ug mabalak-on kaayo ko. Bisan pag nalisdan ko nga magmapositibo, kining impormasyona nakahupay sa akong mga kabalaka. Mapasalamaton gyod ko sa interes nga gipakita kanamo pinaagi niining artikuloha.

A. S., Ecuador

Sakit nga Ngipon​—Kalbaryo sa Karaang Panahon (Septiyembre 2007) Usa ako ka dentista ug magtutudlo bahin sa pag-atiman sa ngipon. Nakadayeg gyod ko sa inyong maayo kaayong pagkasulat nga artikulo. Maayo kaayo kini nga sumaryo sa kasaysayan sa pag-atiman sa ngipon. Ako ning gipabasa sa akong mga higala ug kauban sa trabaho.

C. R., Tinipong Bansa

Ang Diyos ba ang Mabasol? (Septiyembre 2007) Nagkatapok mi sa akong mga higala aron hisgotan ang praktikal nga mga paagi sa pagpangandam alang sa usa ka emerhensiya. Samtang gameryenda kami, among girepaso ang mapuslanon nga mga punto sa kahon nga “Nakapangandam Ka na ba sa Pagbakwet?” diha sa artikulo nga gihisgotan sa ibabaw, ug gisusi ang mga gamit pang-emerhensiya nga giandam sa pipila kanamo. Gihisgotan usab namo ang kahinungdanon sa pagbaton ug timbang nga panglantaw sa mga pagpangandam alang sa emerhensiya. Among nasabtan nga dili ni ang among pangunang buluhaton ingong mga alagad sa Diyos. Hinunoa, ang labing hinungdanon mao ang pagsangyaw sa maayong balita sa Gingharian sa Diyos ug pagpaambit sa uban sa maanindot nga saad sa Diyos sa usa ka kalibotan diin wala nay kapeligrohan gikan sa bisan unsang katalagman​—kinaiyanhon man o gipahinabo sa tawo.

R. G., Tinipong Bansa

Panalipdi ang Imong mga Anak! (Oktubre 2007) Ako giamong-amongan sa dihang bata pa ako. Apan hangtod karon dili gihapon nako masulti sa akong mga ginikanan kon unsay nahitabo. Busa kining mga artikuloha nakahupay gayod kanako. Nanghinaot ko nga mabasa sa mga ginikanan kining magasina ug mapanalipdan ang ilang mga anak. Mapasalamaton kaayo ko kang Jehova sa pagtagana kanamo niining hinungdanong impormasyon. Kining artikuloha nakapahupay gayod kanamong nakaagom sa seksuwal nga pag-abuso.

R. I., Hapon