Ang Hunahuna sa Bibliya

Husto ba ang Paggamit ug Dungganong mga Titulo?

SAMTANG naghimo sa inadlaw nga mga kalihokan ug nagsangyaw sa maayong balita sa Gingharian sa Diyos ang mga Kristohanon sa unang siglo, sila usahay moatubang sa mga opisyal sa gobyerno​—mga ordinaryo ug dagkog-ranggong mga opisyal. Ang mga sumusunod ni Jesus wala maggamit ug mga titulo taliwala kanila. Apan niadtong panahona, ang mga tawo nga tag-as ug posisyon sagad magpatahod pinaagig mga titulo. Ang emperador sa Roma gitawag ug “Agusto,” nga usa ka dungganong titulo kaniadto.​—Buhat 25:21.

Busa, sa dihang nakigsulti ang mga tinun-an ni Jesus sa mga opisyal sa gobyerno, sila ba migamit ug dungganong mga titulo? Unsay angay natong panglantaw niana?

Pagpasidungog, Dili Pag-uyon

Si apostol Pablo nagtambag sa iyang mga isigkamagtutuo nga “ibayad ngadto sa tanan ang mga nahiangay kanila, . . . kaniya nga nangayog dungog, ang maong dungog.” (Roma 13:7) Kini naglakip sa pagtawag sa mga opisyal ginamit ang ilang titulo. Kasagarang gigamit karon ang mga titulo sama sa Your Excellency ug Your Honor ngadto sa mga opisyal sa gobyerno. Apan ang pipila basin mangutana, ‘Angay ba nakong tawgon ang usa ka tawo sa iyang titulo kon nahibalo ko nga siya dili talahoron ug di pa gyod maayog binuhatan?’

Daghang opisyal sa gobyerno ang matinud-anon sa ilang trabaho, apan dili tanan kasaligan. Bisan pa niana, ang Bibliya nag-awhag kanato sa pagpasakop sa mga hari ug sa mga gobernador “tungod sa Ginoo.” (1 Pedro 2:13, 14) Busa, kon atong giila nga ang Diyos nagtugot sa usa ka tawo sa pagbaton ug posisyon, angay nato siyang tahoron ug pasidunggan.​—Roma 13:1.

Angay natong tahoron ang usa ka tawo bisan unsa pay iyang binuhatan. Ang atong paggamit sa iyang dungganong titulo wala magpasabot nga miuyon kita sa iyang binuhatan. Gipakita kini sa usa ka panghitabo sa kinabuhi ni apostol Pablo.

Ang Paggamit ni Pablo ug mga Titulo

Tungod sa usa ka bakak nga sumbong, si apostol Pablo gidakop ug gihusay sa atubangan ni Felix, nga gobernador sa Judea. Ingong usa ka opisyal sa gobyerno, si Felix dili maayog dungog. Ang Romanong historyano nga si Tacitus misulat nga si Felix  “nagtuo nga siya dili masilotan bisan pag magpatuyang siya sa pagbuhat ug daotan.” Mas interesado siya sa hiphip kay sa pagpahamtang ug hustisya. Bisan pa niana, panahon sa duha ka tuig nga pagkabilanggo ni Pablo, siya nagpakitag pagtahod sa gobernador ug kanunay silang mag-estoryahay. Sa maong mga higayon, si Felix naglaom nga hiphipan siya ni Pablo apan wala gayod siyay nadawat nga hiphip. Hinuon, gigamit ni Pablo ang maong kahigayonan sa pagsangyaw kaniya.​—Buhat 24:26.

Sa dihang gipulihan ni Festo si Felix isip gobernador, iyang nahibaloan ang kaso ni Pablo sa Cesarea. Aron mosimpatiya kaniya ang Hudiyong mga lider, misugyot si Festo nga sa Jerusalem na lang husayon si Pablo. Kay nahibalo si Pablo nga lagmit dili niya mabatonan ang hustisya kon sa Jerusalem siya husayon, gigamit ni Pablo ang iyang pagka-Romano, nga nag-ingon: “Ako moapelar kang Cesar!”​—Buhat 25:11.

Wala mahibalo si Festo kon unsaon pagsaysay ngadto kang Cesar ang mga sumbong batok kang Pablo, apan siya nahupayan sa dihang si Haring Agripa II miduaw kaniya ug nagpahayag ug interes sa kaso ni Pablo. Pagkaugma, uban sa magarbohong pagpasundayag, ang mga pangulo sa kasundalohan ug mga kadagkoan sa siyudad miuban sa hari ngadto sa lawak diin gihusay si Pablo.​—Buhat 25:13-23.

Sa dihang gipasulti na si Pablo, siya migamit sa titulong ‘Hari’ sa iyang unang mga pulong ug miila sa kasinatian ni Agripa bahin sa mga kostumbre ug sa mga lantugi taliwala sa mga Hudiyo. (Buhat 26:2, 3) Niadtong panahona, dili maayog dungog si Agripa tungod kay nabaniog man nga siya may relasyon sa iyang igsoong babaye. Lagmit nahibalo gayod si Pablo nga si Agripa imoral ug kinabuhi. Bisan pa niana, siya gitahod gihapon ni Pablo ingong hari.

Sa dihang si Pablo misulti sa pagdepensa sa iyang kaugalingon, si Festo misingka kaniya: “Ikaw nabuang, Pablo!” Imbes masuko, kalmadong nangatarongan si Pablo, nga nagtawag sa gobernador nga ‘Imong Kamahalan.’ (Buhat 26:24, 25) Gipasidunggan siya ni Pablo tungod sa iyang posisyon. Tungod niini makapangutana tingali kita, ‘Aduna bay limitasyon ang atong pagpasidungog sa mga opisyal?’

Dili-Bug-os nga Pagpasidungog

Dili bug-os ang awtoridad nga nabatonan sa mga opisyal sa gobyerno ingon sa gipakita sa Roma 13:1, nga nag-ingon: “Ang nagalungtad nga mga awtoridad napahimutang sa ilang relatibong mga posisyon pinaagi sa Diyos.” Busa, kinahanglang relatibo usab o dili bug-os ang atong pagpasidungog sa mga hawas sa gobyerno. Gipakita ni Jesus kon asa kutob ang atong pagpasidungog sa uban sa dihang siya miingon sa iyang mga tinun-an: “Ayaw kamo pagpatawag nga Rabbi, kay usa ra ang inyong magtutudlo, samtang kamong tanan mga igsoon. Dugang pa, ayaw ninyo tawgang amahan si bisan kinsa dinhi sa yuta, kay usa ra ang inyong Amahan, ang langitnong Usa. Ayaw kamo pagpatawag nga ‘mga pangulo,’ kay usa ra ang inyong Pangulo, si Kristo.”​—Mateo 23:8-10.

Busa ang atong pagpakitag haom nga pagpasidungog magdepende kon kini ba usa ka relihiyoso o sekular nga mga titulo. Kon ang opisyal sa gobyerno aduna usay relihiyosong mga titulo, atong mapadapat ang tambag ni Pablo pinaagi sa dili paggamit niana. Ang usa ka tawo nga nagsunod sa tambag sa Bibliya motahod gayod sa maong mga opisyal. Apan tungod sa iyang nabansay-sa-Bibliya nga tanlag, likayan niya ang pagtawag sa uban sa ilang relihiyosong mga titulo tungod kay siya obligado nga “ibayad . . . ang mga butang sa Diyos ngadto sa Diyos.”​—Mateo 22:21.

NAKAPAMALANDONG KA BA?

◼ Giunsa paglantaw sa mga sumusunod ni Jesus ang sekular nga mga awtoridad?​—Roma 13:7.

◼ Naggamit ba si apostol Pablo ug dungganong mga titulo sa pagtawag sa mga opisyal sa gobyerno?​—Buhat 25:11; 26:2, 25.

◼ Unsang matanga sa mga titulo ang wala uyoni ni Jesus?​—Mateo 23:8-10.

[Hulagway sa panid 20, 21]

Giunsa pagtawag ni Pablo si Agripa?