Pagpaniid sa Kalibotan

◼ Sa milabayng 20 ka tuig, ang gidaghanon sa kinaiyanhong mga katalagman sa tibuok kalibotan miuswag ug upat ka pilo. Matag tuig kapin sa 250 milyones ka tawo ang naapektohan.​—EL UNIVERSAL, MEXICO.

◼ “Sulod sa daghang katuigan, ang dumagsa nga mao ang kinakusgang hangin sa Pasipiko nakatigom ug dakong tapok sa nangaanod nga mga basura.” Ang naglutawlutaw nga mga basura sama na karon kalapad sa Australia.​—LA DÉPÊCHE DE TAHITI, TAHITI.

◼ Aron makapatunghag 50 litros [53 quarts] nga biofuel para sa depasaherong sakyanan, gikinahanglan ang 200 kilos [440 libras] nga mais​—“igo nang konsumo sa usa ka tawo sa usa ka tuig!”​—GAZETA WYBORCZA, POLANDIA.

Mga Bibliya Gipatik sa Tsina

“Ang Tsina usa na sa mga nasod nga nagpatik ug kinadaghanang Bibliya sa kalibotan,” miingon si Ye Xiaowen, ang pangulo sa State Administration for Religious Affairs. Sa Nanjing, nga kaulohan sa Probinsiya sa Jiangsu, ang usa ka kompaniya nga gipanag-iya sa mga Insek nakaimprenta sa ika-50 ka milyon nga kopya sa kompletong Bibliya. Sumala sa People’s Daily Online, “mga 3 ka milyong kopya sa Bibliya ang ginaimprenta [sa maong kompaniya] matag tuig sa di pa dugayng katuigan.” Gitaho usab niini nga nagkadaghan ang nag-angkong mga Kristohanon sa Tsina.

Mga Imahen Gipuntirya

“Sa miaging lima ka tuig sa Rusya, kapin sa 1,000 ka simbahan ang gilungkab,” nagtaho ang Russky Newsweek. Mga 40,000 ka gikawat nga mga imahen ang gitaho ngadto sa Ministry of Internal Affairs sa Rusya. Karon, gikasabotan sa maong departamento ug sa Ortodoksong Iglesya sa Rusya nga ang tanang imahen butangan ug espesyal nga marka nga makita lang kon gamitan ug ultraviolet nga kahayag. Motabang kini sa mga imbestigador sa pag-ila kon kinsay tinuod nga tag-iya sa nabawi nga mga imahen. Ang Russky Newsweek miingon nga giuyonan sa mga obispo sa Moscow ang pagbutang ug marka “kay dili ra kini makaapekto sa pagkamilagroso sa mga imahen.”

Nahurot sa Gubat ang Salapi sa Aprika

“Sukad sa 1990 hangtod sa 2005, 23 ka nasod sa Aprika ang naggubatay nga migasto ug duolan sa US$300 bilyones,” miingon ang International Herald Tribune. “Ang nagasto sa Aprika igo na untang magamit sa pagsulbad sa problema sa HIV ug AIDS sa Aprika, o sa pagtaganag edukasyon, tubig, ug sa pagsanta ug pagtambal sa tesis ug malarya,” matod pa sa presidente sa Liberia nga si Ellen Johnson-Sirleaf. “Libolibo na untang mga ospital, eskuylahan, ug mga karsada ang nahimo.” Mihinapos ang mantalaan nga, kon walay gubat, ang Aprika “usa na unta ka mauswagong kontinente imbes ang kinapobrehan sa kalibotan.”

Makaayo Kanimo ang Pagtagpilaw

Sumala sa usa ka pagtuon nga gihimo diha sa kapig 23,000 ka Gregong babaye ug lalaki, ang pagtagpilaw ug labing menos tulo ka beses sa usa ka semana makapaus-os ug 37 porsiyento sa gidaghanon sa mangamatay tungod sa atake sa kasingkasing. “Adunay daghang pamatuod nga ang grabe nga tensiyon mahimong moresulta sa sakit sa kasingkasing,” matod pa ni Dimitrios Trichopoulos, nga usa ka tigdukiduki ug eksperto bahin sa epidemya, sa Harvard School of Public Health, U.S.A. “Ang pagtagpilaw sa udto,” matod pa niya, “makapawala sa tensiyon ug makapakunhod sa gidaghanon sa mangamatay gumikan sa sakit sa kasingkasing.”