Wala Damhang Tabang Gikan sa Pagmata!

TINAMPO SA MAGSUSULAT SA PAGMATA! SA BENIN

◼ Sa dihang ang 23-anyos nga si Noël miundang sa pag-eskuyla aron mahimong bug-os-panahong ministro sa mga Saksi ni Jehova, ang iyang mga paryente nagduhaduha kon makasuportar ba siya sa iyang kaugalingon. Tuod man, naglisod siya sa pagpangitag part-time nga trabaho. Busa sa dihang migawas sa magasing Pagmata! ang artikulong “Lima ka Epektibong Paagi sa Pagpangitag Trabaho,” gibasa kini ni Noël sa makadaghan. a Nakatabang ba kini kaniya? Oo, apan sa paagi nga wala niya damha.

Ang usa ka direktor sa pribadong eskuylahan nakakita kang Noël nga nagsangyaw sa kabalayan ug iyang gipangutana si Noël kon siya ba Saksi ni Jehova. Ang direktor nangitag magtutudlo, ug kay nakaobserbar siya nga maayong manudlo ang mga Saksi ni Jehova, iyang gipangutana si Noël kon duna ba siyay nailhan nga interesado sa trabaho. Sa dihang miingon si Noël nga wala, ang direktor mitubag, “Ikaw diay?”

Si Noël walay kasinatian sa pagtudlo diha sa eskuylahan, ug usahay nganga siyang mosulti. Problema kini tungod kay sa sistema sa edukasyon sa Benin, kinahanglang mokuhag eksaminasyon ang usa ka magtutudlo aron matino nga siya larinong mosulti. Ang direktor misaad: “Kon makapasar ka, kuhaon ta ka.”

Si Noël miuswag diha sa Teokratikanhong Tunghaan sa Ministeryo, nga gidisenyo aron ang usa mahanas sa pagsulti diha sa publiko ug gipahigayon matag semana sa mga kongregasyon sa mga Saksi ni Jehova. Tighatagan na gani siyag pakigpulong sa ilang kongregasyon. Bisan pa niana, gikulbaan siya sa dihang mikuha siyag eksaminasyon.

Ang tawo nga naghatag sa eksaminasyon mitunol kaniyag magasin ug iyang gipabasag kusog kang Noël ang parapo nga gimarkahag pula. Dili makatuo si Noël pagkakita niya sa artikulong “Lima ka Epektibong Paagi sa Pagpangitag Trabaho.” Hanoy kaayo ang iyang pagbasa mao nga nakapasar siya.

Human niana, ang tig-eksamin miingon nga tigbasahan siya sa mga magasin sa mga Saksi ni Jehova. “Kining mga magasina matulon-anon ug maayo kaayong pagkasulat mao nga sagad nako kining gamiton sa eksaminasyon,” matod pa niya.

Nadawat si Noël sa trabaho ug gitanyagan siya sa direktor nga magtudlo gihapon pagkasunod tuig, apan wala na kana dawata ni Noël. Siya gidapit sa pagtrabaho sa buhatan sa mga Saksi ni Jehova, diin siya nag-alagad karon.

[Footnote]