Gidisenyo ba Kini?

Paglaktod ug Agi sa Gatas

◼ Kon nakakita kag karnero, kanding, o baka nga nanganak, tingali nahibulong ka kon nganong ang nati makalakaw dayon ug motutoy. Ang nati sa tanang mananap nga sus-an gatas ug kinaon. Apan ang mga nati sa mga mananap nga magpangusap, sama sa karnero, kanding, ug baka, adunay laing katingalahang proseso.

Hunahunaa: Ang tungol sa baka adunay upat ka kuwarto-kuwarto nga mohilis sa gikaon nga kompay. Apan ang bag-ong nahimugsong nati gatas ug kinaon, ug ang gatas dili kinahanglang hilison. Busa inigtutoy sa nati, ang usa ka linaing tubo-tubo moabli nga niini molaktod ug agi ang gatas paingon sa kataposang kuwarto-kuwarto.

Kon ang gatas makasulod sa unang kuwarto-kuwarto nga gitawag ug rumen, ang nati madaot tungod kay ang rumen para man lang sa gahing mga pagkaon nga hilison sa bakterya. Ang aslom nga gatas makapabutod sa nati. Apan sa dihang motutoy ang nati o moinom ug gatas gikan sa balde, awtomatikong mosira dayon ang entrada sa rumen.

Dunay laing mahitabo kon moinom ug tubig ang nating baka. Kinahanglan kining moinom ug daghang tubig aron modaghan ang bakterya ug mikrobyo sa rumen, nga maghilis sa kompay dihang mokaon na unyag kompay ang nati. Bisag molaktod ug agi ang gatas paingon sa kataposang kuwarto-kuwarto sa tungol, ang ordinaryong tubig moagi sa rumen. Ang talagsaong proseso sa paglaktod maoy para lang sa gatas!

Unsay imong hunahuna? Sulagma ba lamang ang paglaktod ug agi sa gatas? O adunay intelihenteng Maglalalang nga nagdisenyo niini?

[Diagram/​Hulagway sa panid 13]

(Alang sa aktuwal nga pagkahan-ay, tan-awa ang publikasyon)

Molaktod ug agi ang gatas sa unang tulo ka kuwarto-kuwarto sa tungol sa nati

[Diagram]

Laktoranan nga tubo-tubo

1 Rumen

2 Reticulum

3 Omasum

4 Abomasum (kataposang kuwarto-kuwarto sa tungol)