Pagpaniid sa Kalibotan

◼ Sa 2007, “106 na ang bilyonaryo [sa Tsina] nga dolyar sa Amerika ang ilang kuwarta kon itandi sa 15 [niadtong 2006] ug walay bisan usa niadtong 2002.”​—CHINA DAILY, TSINA.

◼ ‘Kon pasagdan sa mga taga-India ang ilang tigulang nga mga ginikanan, sila mapriso ubos sa bag-ong balaod nga nagpakitag kabalaka sa kakulag pagtagad sa mga tawo karon sa mga tigulang tungod kay ang kalibotan nagkamoderno na.’​—REUTERS, INDIA.

◼ “Sa Inglaterra, ang mga Muslim sa pagkakaron sama na ka daghan sa mga Anglikano.”​—THE ECONOMIST, BRITANYA.

Mga Kahoy sa Siberia nga Kakuhaan ug Bililhong mga Metal

Sa kalasangan sa Siberia “posibleng makakaplag ug lunsayng bulawan diha sa nangadugtang mga tuod sa kahoy,” nagtaho ang magasing Vokrug Sveta sa Rusya. Nadiskobrehan sa mga siyentipiko sa Ulan-Ude, Irkutsk, ug Novosibirsk nga ang mga kahoyng pino, nga nanubo sa yuta nga dunay ore didto sa Siberia, mosuhop ug nangatunawng mga metal gikan sa yuta. Sa dihang ang kahoy mamatay ug dayon madugta, ang mga metal madeposito diha sa yuta. Ang mga siyentipiko nakakuhag lima ka gramong platinum, 200 ka miligramong bulawan, ug tulo ka kilong plata gikan sa usa ka toneladang metal nga nadeposito diha sa yuta gikan niining nangadugtang mga kahoy.

Emerhensiya nga Pag-atiman Diha sa mga Paglubong

Ang mga tiglubong sa usa ka sementeryo sa Australia gitagan-an ug aparato nga gitawag ug defibrillator. Ngano? Aron sa pagtabang sa mga nagbangotan nga giatake sa kasingkasing, nagtaho ang Sun-Herald sa Sydney. “Daghan ang atakehon sa kasingkasing diha sa mga paglubong,” matod ni Sisenanda Santos, tigpamaba sa St. John Ambulance, ang organisasyon nga maoy nagpalakaw niini nga programa. “Daghan ang tawo diha sa paglubong, sila nangaguol, ug kasagaran kanila nagsul-ob ug sinina nga dili komportable sa init nga panahon.” Ang defibrillator dunay narekord nga mga instruksiyon alang sa tiggamit ug kon mamatikdan sa aparato nga giatake sa kasingkasing ang maong tawo, awtomatiko nga pakoryentehan niini ang iyang dughan aron mopitik pag-usab ang kasingkasing.

Diborsiyo Makadaot sa Kalikopan

Ang pagdaghan sa diborsiyo sa tibuok kalibotan makadaot sa kalikopan, sanglit kini moresulta ug dugang nga paggamit sa limitadong kahinguhaan sa yuta. Ang diborsiyo moresulta ug mas daghang pamilya, mas mogamay ang membro sa pamilya, ug mas modako ang konsumo sa matag tawo, sumala sa usa ka pagtuon nga napatik diha sa Proceedings of the National Academy of Sciences. “Ang bungkag nga mga pamilya sa [Amerika] makadaginot untag kapin sa 38 ka milyong lawak, 73 ka bilyong kilowatt-hour nga elektrisidad, ug 627 ka bilyong galon nga tubig sa 2005 lamang kon ang ilang makonsumo sama ra ka daghan sa dili bungkag nga mga pamilya.” Niadtong tuig 2000, dunay 6.1 ka milyong bungkag nga mga pamilya sa Amerika.

Bibliya Diha sa Giming nga “Chip”

Ang mga siyentipiko sa Israel milampos sa pagbutang sa tibuok “Daang Tugon” sa Hebreohanong pinulongan diha sa usa ka silicon chip nga “mas gamay pa sa ulo sa dinagom,” nagtaho ang Science Daily diha sa Internet. Kini nahimo pinaagi sa pagpasidlit ug gagmayng mga partikulo sa kahayag, nga gitawag ug gallium ions, sa pagkulit sa teksto diha sa nawong sa chip nga gidorar sa bulawan. “Ang paghimo ug giming kaayong Bibliya nagpakita nga mapagamay na karon ang mga butang,” miingon si Propesor Uri Sivan sa Technion-Israel Institute of Technology. Sa ato pa, mahimo na usab “tipigan ang mga impormasyon diha sa gamay kaayong luna.”

[Picture Credit Line sa panid 30]

AP Photo/​Ariel Schalit