“Tagamtama ang mga Panalangin Pinaagi sa Giniyahan sa Espiritu nga Hari ni Jehova”

◼ “Ang tawo nagmando sa tawo alang sa iyang kadaotan.” Kanang mga pulonga, nga mabasa diha sa Bibliya sa Ecclesiastes 8:9, tukmang naghubit sa kasaysayan sa pagmando sa tawo. Momaayo kaha ang kahimtang kon kitay magmando? O ang mga nahitabo kanhi mao ra ba usab ang mahitabo sa umaabot? Tubagon kining mga pangutanaha sa pakigpulong publiko sa “Giniyahan sa Espiritu sa Diyos” nga Distritong mga Kombensiyon sa mga Saksi ni Jehova sa 2008/​2009. Hisgotan sa pakigpulong nga nag-ulohang “Tagamtama ang mga Panalangin Pinaagi sa Giniyahan sa Espiritu nga Hari ni Jehova” ang usa ka persona nga magmando nga may hustisya ug gugma​—si Jesu-Kristo, kinsa naghalad sa iyang kinabuhi alang kanato.​—Mateo 20:28.

Nganong lahi man si Jesus sa ubang mga magmamando? Ang manalagna sa Diyos nga si Isaias nagtubag: “Ang espiritu ni Jehova [nga Diyos] mopahiluna kaniya, ang espiritu sa kaalam ug sa pagsabot, ang espiritu sa tambag ug sa pagkagamhanan, ang espiritu sa kahibalo ug sa pagkahadlok kang Jehova; ug siya magkalipay diha sa pagkahadlok kang Jehova. Ug siya dili mohukom sumala sa makita lamang sa iyang mga mata, ni mobadlong sumala sa butang nga nadungog lamang sa iyang mga dalunggan. Ug uban sa pagkamatarong siya magahukom sa mga timawa, ug uban sa katul-id siya magabadlong sa mga maaghop sa yuta.”​—Isaias 11:2-4.

Nainteres ka ba niini? Kon mao, gidapit ka sa pagtambong sa pakigpulong publiko diha sa usa sa 80 ka distritong kombensiyon dinhi sa Pilipinas, nga magsugod sa hinapos niining bulana. Aron mahibalo ka kon asa ang kinadul-ang kombensiyon kanimo, kontaka ang mga Saksi ni Jehova o pagsulat sa mga magpapatik niining magasina diha sa haom nga adres nga nalista sa panid 5.