Asa Nato Makaplagan ang Giya?

KINSAY makagiya kanato ngadto sa tinuod nga kalamposan? Sumala sa gihisgotan sa nag-unang artikulo, ang tinuod nga kalamposan makab-ot dili pinaagi sa pagkainila, pagkaadunahan, o pagkaimpluwensiyado, kondili sa pagkabaton ug maayong mga prinsipyo ug halangdong katuyoan sa kinabuhi.

Asa nato makaplagan ang kasaligang mga prinsipyo ug mga tubag sa mga pangutana bahin katuyoan sa kinabuhi? Pinaagi ba sa pagsalig sa atong kaugalingon? Kinahanglang dawaton nato nga kita dili hingpit ug dali nga maimpluwensiyahan sa daotang mga pangibog, ug tungod niana kita makahimog sayop nga mga desisyon. (Genesis 8:21) Tungod niini milyon-milyon ang nagsigeg agpas sa mga kakawangan nga gihubit sa Bibliya ingong “ang tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi sa usa.” (1 Juan 2:16) Dili kini tinuod nga kalamposan kay makahatag lang kinig kawalay paglaom ug kaguol. Busa, daghan ang midangop sa atong Maglalalang alang sa mga tubag sa lisod nga mga pangutana bahin sa kinabuhi. a

Sa Diyos ba Kita Angay Mosalig?

Nganong angay kitang mosalig sa atong Maglalalang? Kay siya nahibalo kon nganong iya kitang gilalang, busa siya nahibalo usab kon unsay katuyoan sa atong kinabuhi. Siya nahibalo kon giunsa niya kita paglalang​—sa pisikal, mental, ug emosyonal nga paagi. Busa ang Diyos nahibalo sa kinamaayohang mga prinsipyo nga makagiya sa mga tawo. Dugang pa, ang Diyos mao ang labing maayong panig-ingnan sa gugma mao nga gusto niya nga kita magmalipayon ug magmalamposon. (1 Juan 4:8) Asa kita modangop alang sa iyang mahigugmaong giya? Sa Balaang Bibliya, nga gihatag sa Diyos kanato pinaagi sa pagpasulat niana sa mga 40 ka tawo. b (2 Timoteo 3:16, 17) Apan nganong makasalig kita sa giya nga makita diha niini nga basahon?

“Ang kaalam mapamatud-ang matarong pinaagi sa mga buhat [o mga resulta] niini,” matod ni Jesu-Kristo, ang pangunang hawas sa Diyos. (Mateo 11:19; Juan 7:29) Ang diyosnong kaalam moresulta ug kalamposan ug dumalayong kalipay​—“ang kinatibuk-ang dalan kon unsay maayo”—​samtang ang tawhanong kaalam nga nagsalikway sa Diyos moresulta ug kapakyasan ug kagul-anan.​—Proverbio 2:8, 9; Jeremias 8:9.

Palandonga ang panahon sa mga hippie sa katuigan sa 1960. Kay supak sa mga sukdanan ug awtoridad sa mga edaran, gipasiugda sa daghang hippie ang pagdroga, pagkinabuhi nga morag  wala nay ugma, ug ang pagpakigsekso kang bisan kinsa. Apan maalamon ba gayod kini nga pagkinabuhi? Nakahatag ba kini sa tawo ug tinuod nga katuyoan sa kinabuhi ug maayong mga prinsipyo nga makahatag ug tinuod nga kalinaw sa hunahuna ug kalipay? Ang kasaysayan nagpakita nga ang maong pagkinabuhi wala makahatag sa tawo ug mas arang-arang nga kinabuhi kondili nakaamot hinuon sa pagkadaot sa moralidad sa tawo.​—2 Timoteo 3:1-5.

Kon itandi sa tawhanong mga pilosopiya, ang kaalam sa Bibliya mapuslanon gayod. (Isaias 40:8) Samtang magbasa ka sa sunod nga artikulo, lagmit imong masabtan kon nganong mapuslanon kini, kay naghisgot kini sa unom ka prinsipyo sa Bibliya nga nakatabang sa minilyong tawo sa halos tanang kanasoran sa pagkahimong malipayon ug malamposon​—adunahan man sila o kabos.

[Mga footnote]

[Kahon sa panid 5]

 MGA PAGTULON-AN NGA NAGPAHUYANG SA IDEYA BAHIN SA KALAMPOSAN

Daghang tawo moinsistir nga walay Diyos ug nga ang kinabuhi maoy produkto sa walay salabotan nga ebolusyon. Kon tinuod pa kini, ang kinabuhi maoy bunga lang sa sulagmang pagpanungha sa tanang butang, ug ang atong pagpangitag katuyoan sa kinabuhi ug sa mga prinsipyo mahimong walay kapuslanan.

Ang uban nagtuo nga kita gilalang sa Diyos ug dayon iya lang kitang gibiyaan. Kon mao, kini nga pagtuo nagpakita nga kita mga pinasagdan, nga wala gayoy katuyoan ug walay mga prinsipyo. Palandonga kini: Ang Diyos naghatag ug kaalam sa tagsatagsa ka mananap aron matuman ang katuyoan niini diha sa kinaiyahan. Tungod niana, ang lalom nga kaalam sa Diyos makita diha sa atong palibot. Ang mao ba gihapong Maglalalang ang naglalang kanato ug dayon gipasagdan lang kita nga mangapkap sa kangitngit? Dili!​—Roma 1:19, 20.

Busa ang pilosopiya sa mga ateyista maoy nakamugna sa ideya nga ang usa malamposon kon siya inila, adunahan, o impluwensiyado.

[Hulagway sa panid 5]

Ang kaalam sa Bibliya napamatud-ang maayo tungod sa maayong mga resulta niini