Nganong Tag-as ug Kinabuhi ang mga Taga-Okinawa?

TINAMPO SA MAGSUSULAT SA PAGMATA! SA JAPAN

◼ Gibanabana nga sa kaislahan sa Okinawa, Japan, dunay duolan sa 740 ka tawo nga nag-edad ug 100 o kapin pa niadtong 2006​—90 porsiyento kanila mga babaye—​gikan sa populasyon nga 1.3 milyones. Sumala sa Okinawa Centenarian Study, nga gipangunahan ni Dr. Makoto Suzuki, sa matag 100,000 ka tawo mga 50 ka tawo nag-edad ug kapin sa 100. Gibanabana nga sa kadaghanang adunahan nga mga nasod ang proporsiyon maoy tali sa 10 ug 20 sa matag 100,000 ka tawo.

Nakaplagan sa maong pagpanukiduki, nga ginaingong “kinadugayan nga pagpanukiduki sa mga tawong kapin nag 100 ang edad sa kalibotan,” nga “ubay-ubay niadtong kapin nag 100 ang edad himsog kaayog panglawas.” Aron masayran kon ngano, si Suzuki ug ang iyang tem nagsusi sa estilo sa kinabuhi ug sa kaliwat sa kapin sa 900 ka tawo nga kapin nag 100 ang edad ug sa ubang taga-Okinawa nga mga 70 ang edad o kapin pa. Nakaplagan sa mga tigdukiduki nga kini nga mga tigulang himsog ug dili tambok, ang ilang kaugatan dili barado, ug menos ang dunay kanser ug sakit sa kasingkasing. Ug menos ang giango-ango niadtong hapit nang mag-100 ang edad kon itandi niadtong sama nilag edad sa ubang adunahang mga nasod. Unsay ilang sekreto?

Ang usa niana mao ang ilang kaliwat. Gawas pa niana, sila dili manabako, makasaranganong moinom ug alkoholikong ilimnon, ug sustansiyado ang ilang pagkaon. Ang mga taga-Okinawa hingaon ug utanon ug prutas, lanotong mga pagkaon, ug walay tambok sa karne ug menos ug kaloriya ang ilang pagkaon. Ug sila dili magpabusdik ug kaon. “Kinahanglang moundang kag kaon kon sa imong paminaw busog ka na,” nag-ingon si Dr. Bradley Willcox, usa sa mga tigdukiduki. “Ang tiyan malangan ug 20 minutos sa pagpadalag signal sa utok nga kini busog na.”

Ang kinabuhi sa mga taga-Okinawa okupado sa pagpananom, paglakaw-lakaw, pagsayaw, o uban pang mga kalihokan. Nakita sa pagsusi sa personalidad niadtong kapin nag 100 ang edad nga sila positibog panglantaw ug mapailin-ilinon. Sila dili mabalak-on, ug ang mga babaye ilabina “mahigalaon kaayo.”

“Walay madyik nga tambal” sa pagpataas sa kinabuhi, miingon si Willcox. Sumala sa napanukiduki, sila tag-as ug kinabuhi tungod sa ilang kaliwat, pagkaon, ehersisyo, maayong batasan, “ug sila dili magpaapekto sa mga problema.”