Pagpaniid sa Kalibotan

◼ Ang opisyal nga Web site sa mga Saksi ni Jehova (www.watchtower.org) sa pagkakaron nagtaganag impormasyon diha sa 314 ka pinulongan. Sa miaging tuig, kapin sa 22 milyones ang miduaw sa site​—nga may aberids nga kapin sa 60,000 kada adlaw.

◼ “Usa sa kinalisorang problema nga giatubang sa kalibotan karon mao ang pagbaton ug hinlong tubig. . . . Kasagaran diha sa mga dapit nga walay tubig, pusil hinuoy daghan.”​—BAN KI-MOON, UN SECRETARY-GENERAL.

Kalipay ug Kahimsog

Dugay nang gituohan nga ang mga tawong malipayon ug positibog panglantaw kasagaran mas himsog kay sa mga tawong magul-anon, masuk-anon, o negatibog panglantaw. Sa usa ka pagtuon di pa dugay, ang mga tigdukiduki nakahinapos nga ang mga tawong malipayon ug kinaiya mas menos ug cortisol​—usa ka stress hormone nga mahimong hinungdan sa daghang sakit kon masobrahan. Kining mga tawhana menos usab ug “duha ka matang sa protina nga makapahupong sa lawas.” Sumala kang Dr. Andrew Steptoe sa University College sa London, “ang disposisyon sa tawo dili lang tungod sa kaliwat, kondili sa iyang pakiglabot usab sa uban ug sa iyang panglantaw sa kinabuhi.”

Modernong Paagi sa Pag-obserbar sa Bulan

Sulod sa daghang tuig, obserbahan sa mga Muslim ang paggitib sa bag-ong bulan nga magpaila nga natapos na ang bulan sa Ramadan ug magsugod na ang pista human sa usa ka bulan nga pagpuasa. Kaniadto sa pipila ka dapit walay instrumento nga gamiton sa pag-obserbar sa bulan ug kon unsay ilang makita, ang lider sa relihiyon magpahibalo niini ngadto sa iyang mga membro. Apan sa pipila ka tuig nga milabay, giaprobahan sa ubang klerigo ang paggamit ug modernong mga paagi sa pag-obserbar sa bulan. Ang mga astronomo sa Iran, uban sa mga klerigo nga mokompirmar sa ilang nakit-an, naggamit na karon ug modernong mga teleskopyo, mga himan nga makakita bisag ngitngit, ug mga ayroplano nga may sensitibong mga himan nga gamiton sa pagpaniid. Kon sayo makit-an ang paggitib sa bag-ong bulan, sayo magsugod ang pista opisyal.

Mga Masuso Makamatikod nag mga Kinaiya?

Ang mga masuso nga unom pa lang ka bulan ang edad “makamatikod nag mga kinaiya sa mga tawo bisag dili pa sila makamaong mosulti,” nag-ingon ang mga tigdukiduki sa Yale University, U.S.A. Ang mga masuso nga nag-edad ug unom ngadto sa napulo ka bulan nagtan-aw ug usa ka dulaan nga mikatkat sa bungtod, samtang ang ubang dulaan nagtabang niini pagpasaka ug ang uban namira. Dayon ang mga masuso “gipapili kon unsay ilang gustong dulaan,” nag-ingon ang Houston Chronicle. “Halos tanang masuso mipili sa buotang dulaan.” Busa “bisan ang mga masuso makaila kon kinsay buotan ug malditong kadula, ug kon kinsay ilang pilion,” sumala sa mantalaan.

“Himalitan Kaayo ang Binotelyang Tubig”

“Himalitan kaayo ang binotelyang tubig sa Amerika, nga moabot ug duolan sa 30 ka bilyong botelya matag tuig,” nag-ingon ang U.S.News & World Report. Apan daghang pumapalit wala mahibalo nga kasagaran sa binotelyang tubig gikuha lang gikan sa gripo, busa “nalimbongan kadtong moinom ug binotelyang tubig sa kahadlok nga madaot ang ilang panglawas,” sumala sa magasin. Diha sa kadaghanang nasod ang tubig gikan sa gripo ginasusi sa pagseguro nga limpiyo kini. Ug kini “halos libre lang” samtang ang binotelyang tubig “mahal kaayo.”