Ang Hunahuna sa Bibliya

Unsay Hunahuna sa Diyos Bahin sa mga Tabang sa Pagsimba?

Ang mga tabang sa pag-ampo komon sa Budhismo, Hinduismo, Hudaismo, Islam, Romano Katoliko, ug Eastern Orthodox. Busa milyon-milyong tawo sa halos tanang nasod nagtuo nga kini makatabang kanila sa pagduol sa Diyos, sa pagpahimuot kaniya, o sa pagkadawat ug mga panalangin. Unsa may gitudlo sa Bibliya bahin niini?

ANG mga tawo sa karaang panahon migamit nag mga tabang sa pag-ampo. Pananglitan, diha sa dapit sa karaang Nineve, ang mga arkeologo nakakalot ug “duha ka estatwang babaye nga dunay pako nga nagtindog nga nag-ampo atubangan sa sagradong kahoy; ang ilang . . . wala [nga kamot] nagkapot ug lukong sa mga bulak o rosaryohan.”​—The Catholic Encyclopedia.

Para sa unsa man ang mga rosaryohan? Kini nga ensiklopedia nag-ingon: “Kon kinahanglang balik-balikon ang pangadye, ang uban dunay gamiton sa pag-ihap niini kay hasol man kon tudlo pay gamiton.”

Ang mga ligid para sa pag-ampo magpasayon sa pag-ampo kay dili na mistil balik-balikon pa kinig litok. Sa matag tuyok sa ligid, pinaagig kamot, hangin, tubig, o koryente, hunahunaon sa nag-ampo nga sama rag naglitok siya sa pag-ampo. Ang mga ligid para sa pag-ampo sagad gamiton uban sa mga mantra​—mga orasyon o mga pangadye. Tagda kon unsay hunahuna sa Diyos bahin niining mga butanga.

“Ayaw Balikbalika Pagsulti ang Samang mga Butang”

Si Jesu-Kristo, nga gilantaw bisan sa milyon-milyong dili mga Kristohanon ingong manalagna sa Diyos, nagpadayag sa hunahuna sa Maglalalang bahin sa balik-balik nga pag-ampo, nga nag-ingon: “Sa dihang mag-ampo, ayaw balikbalika pagsulti ang samang mga butang, ingon sa ginahimo sa katawhan sa mga nasod, kay sila naghunahuna nga sila pagadunggon tungod sa ilang paggamit sa daghang pulong.” a​—Mateo 6:7.

Busa kon ang Diyos supak sa atong ‘pagbalikbalik ug sulti sa samang mga butang,’ dili ba ang mga gamit para niining  balik-balik nga pag-ampo dili usab dalawaton? Ang Bibliya wala gayod maghisgot nga dunay matinumanong alagad sa matuod nga Diyos nga naggamit ug mga rosaryohan, ligid para sa pag-ampo, o ubang mga gamit sa pagsimba. Ang katarongan mas motin-aw kon makasabot kita kon unsa ang pag-ampo ug ang katuyoan niini.

Pag-ampo nga Makapahimuot sa Diyos

Sa sulondan nga pag-ampo ni Jesus, iya gayong gitawag ang Diyos ingong “Atong Amahan” o “Amahan Namo.” Oo, ang atong Maglalalang dili maoy usa ka dili maninagad nga persona o misteryoso nga puwersa nga kinahanglang lukmayon pinaagig mga orasyon, rituwal, o mga mantra. Hinunoa, siya maoy usa ka mahigugmaong Amahan, ug buot niya nga sabton nato nga ingon siya niana ug nga ato siyang higugmaon. Si Jesus miingon: “Gihigugma ko ang Amahan.” (Juan 14:31) Usa ka manalagna sa karaang Israel miingon: “O Jehova, ikaw ang among Amahan.”​—Isaias 64:8.

Sa unsang paagi kita makapakigsuod kang Jehova ingong atong langitnong Amahan? (Santiago 4:8) Sama sa tanang relasyon, kita makigsuod sa Diyos pinaagi sa pagbubo sa atong mga pagbati ngadto kaniya ug sa iyang pagdungog sa atong mga pag-ampo. Ang Diyos “makigsulti” kanato pinaagi sa Bibliya​—ang iyang sinulat nga Pulong—​diin iyang gipadayag ang iyang mga kalihokan, personalidad, ug katuyoan alang kanato. (2 Timoteo 3:16) Ug kita makigsulti sa Diyos pinaagi sa pag-ampo. Siyempre, kini nga pag-ampo kinahanglang kinasingkasing ug dili rutina lang.

Palandonga: Sa unsang paagi makigsulti ang mga anak sa ilang ginikanan diha sa suod ug mahigugmaong pamilya? Balik-balikon ba nilag litok ang mao ra gihapong mga pulong, tingali iphon kini pinaagig usa ka gamit? Siyempre dili gayod! Hinunoa, mosulti sila sa kinasingkasing, sa seryoso ug matinahorong paagi.

Ingon usab niini kon mag-ampo sa Diyos. Sa pagkatinuod, makasangpit kita sa Diyos sa halos tanang butang may kalabotan kanato. Ang Filipos 4:6, 7 nag-ingon: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos . . . magbantay sa inyong mga kasingkasing ug sa inyong mga gahom sa pangisip.” Siyempre, kon duna kitay gikabalak-an, tingali magbalik-balik kita sa pag-ampo bahin niana. Apan lahi kini sa pagsumay-sumay ug ampo.​—Mateo 7:7-11.

Dunay daghang panig-ingnan sa pag-ampo diha sa Bibliya nga makapalipay sa Diyos, lakip ang mga salmo, o mga awit, ug ang mga pag-ampo ni Jesus mismo. b (Salmo 17 ug 86, superskripsiyon; Lucas 10:21, 22; 22:40-44) Usa sa mga pag-ampo ni Jesus makita diha sa Juan kapitulo 17. Basaha kini. Samtang magbasa ka, matikdi kon giunsa ni Jesus pagbubo sa iyang kasingkasing ngadto sa Diyos. Matikdi usab nga sa iyang pag-ampo mahunahunaon siya sa uban ug kini nagpadayag nga iya gayong gihigugma ang iyang mga sumusunod. “Amahan nga Balaan,” siya miingon, ‘bantayi sila tungod sa usa nga daotan,’ si Satanas.​—Juan 17:11, 15.

Ang pag-ampo ba ni Jesus dili kinasingkasing ug rutina na lang? Dili gayod! Maayo kaayo siya nga panig-ingnan kanato! Oo, ang tanan nga nagtinguha nga masuod sa matuod nga Diyos kinahanglang magkuhag tukmang kahibalo bahin kaniya. Ug kay napalihok sa gugma nga gipasukad niana nga kahibalo, kinahanglang dili sila mosunod sa mga kostumbre ug mga batasan nga dili makapahimuot sa Diyos. Alang niining mga tawhana si Jehova nag-ingon: “Ako mahimong inyong amahan, ug kamo mahimong akong mga anak nga lalaki ug mga anak nga babaye.”​—2 Corinto 6:17, 18.

[Mga footnote]

NAKAPAMALANDONG KA BA?

◼ Ang pasidaan ba ni Jesus batok sa pagsumay-sumay sa pag-ampo mapadapat sa paggamit ug mga rosaryohan ug mga ligid para sa pag-ampo?​—Mateo 6:7.

◼ Unsay angayng madayag diha sa atong pag-ampo maylabot sa atong panglantaw sa Diyos?​—Isaias 64:8.

◼ Kon atong isalikway ang bakak nga relihiyosong mga doktrina, unsa kahay panglantaw sa Diyos kanato?​—2 Corinto 6:17, 18.