Ang Malimbongong Gahom sa Paanunsiyo

TINAMPO SA MAGSUSULAT SA PAGMATA! SA POLANDIA

Si Tomek nagtutok sa telebisyon nga morag gilamat. Pwerte niyang pamati sa giingon sa paanunsiyo nga nangengganyo sa mga tumatan-aw: “Kon isul-ob kini sa imong anak, siya mahimong kusgan, liksi, ug siya kasinahan sa iyang mga higala. Palita gyod ni!” Si Tomek midagan paingon sa iyang papa, nga nagkanta-kanta nianang bag-o pa niyang nadunggan. “Pa, paliti ko ana bi!” siya miingon.

◼ Nganong gusto man ang mga bata nianang gipaanunsiyo? “Gusto sila nga makabaton niana kay ang uban aduna niana. Dili sila gustong magpaiwit,” miingon ang usa ka magtutudlo nga gikutlo sa magasing Rewia sa Polandia. Kon ang mga bata magyangongo, mohilak, ug mangluod, patumanan sa ubang mga ginikanan ang gusto sa ilang mga anak.

Nganong malimbongon ang mga paanunsiyo nga kabataan ang girumbo? Ang mensahe niini “dili maghisgot bahin sa prisyo, kalidad, o kamapuslanon sa produkto,” miingon ang sikologong si Jolanta Wąs. Ang paanunsiyo gituyo sa “pagkabig sa emosyon.” Si Wąs mipadayon: “Ang mga bata dili makamaong mamensar nianang gipadayag sa usa ka paanunsiyo. . . . Sila modawat lang bisag unsay gipakita.” Ug bisan pag ila kining pamensaron, kulang pa silag pagsabot sa pagtimbang-timbang ug maayo sa produkto.

Sa unsang paagi imong mapanalipdan ang imong anak batok sa malimbongong gahom sa mga paanunsiyo? Una, “kinahanglang mogugol kag panahon sa imong anak ug kanunay ipatin-aw kaniya nga ang bili sa tawo dili masukod pinaagi sa partikular nga tatak sa sapatos [o sinina] nga iyang isul-ob,” miingon ang Rewia. Sultihi ang imong anak nga magmalipayon gihapon siya bisag wala siyay kinabag-ohang mga dulaan. Ikaduha, ang mga ginikanan kinahanglang mahibalo nga ang ilang mga anak pwedeng maimpluwensiyahan sa mga paanunsiyo. Ang sekreto mao ang dili “pagtugot sa mga paanunsiyo nga maoy modiktar kanato kon unsay maayo para sa atong anak,” nagrekomendar si Wąs.

Sa kataposan, ang tanang ginikanan makabenepisyo sa tambag nga makita sa Bibliya. Si apostol Juan miingon: “Ang tanan nga anaa sa kalibotan​—ang tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi sa usa—​wala magagikan sa Amahan, apan nagagikan sa kalibotan.”​—1 Juan 2:15, 16.

Dili ka ba mouyon nga daghang paanunsiyo nagadani sa “tinguha sa mga mata” ug makatukmod sa bata maingon man sa mga tigulang sa “mapagawalong pagpasundayag sa [ilang] mga kahinguhaan sa kinabuhi”? Si apostol Juan nagpadayon sa iyang tambag: “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.”​—1 Juan 2:17.

Ang mga ginikanan nga kanunayng mogugol ug makapadasig nga panagsultihay sa ilang mga anak magpasilsil ug mga prinsipyo sa Diyos ug mapuslanong mga sukdanan diha kanila. (Deuteronomio 6:5-7) Sa ingon ang mga bata dili dayon maengganyo sa malimbongong mga paanunsiyo sa kalibotan nga gituyo aron ilang makombinsir ang ilang mga ginikanan sa pagpalit ug mga butang alang kanila.