Asa Ka Makakaplag ug mga Tubag?

USA sa katuyoan sa relihiyon mao ang pagtudlo kon unsay katuyoan sa kinabuhi. Apan nakita sa daghang tawo nga wala makatagana ang ilang relihiyon sa ilang espirituwal nga panginahanglan. Si Denise, nga nagdakong Katoliko, miingon: “Ang Baltimore Catechism dunay pangutana, ‘Nganong gilalang kita sa Diyos?’ ug ang tubag, ‘Kita gilalang sa Diyos aron mapasundayag ang Iyang kaayo ug mapaambit kanato ang Iyang walay kataposang kalipay didto sa langit.’

“Dili kana ang klarong tubag kon nganong ania ako dinhi,” miingon si Denise. “Kon langit man diay ang akong padulngan, nag-unsa pa man ko dinhi sa yuta?” Dili kay si Denise lang ang nakapangutana niana. Gipakita sa usa ka surbi nga mga 70 porsiyento niadtong gipangutana nagtuo nga ang kadaghanan sa mga simbahan ug mga sinagoga wala makatabang sa mga tawo sa pagkaplag sa katuyoan sa kinabuhi.

Tungod niana, daghan ang nangitag mga tubag gikan sa laing mga tinubdan​—sa siyensiya o sa lainlaing matang sa pilosopiya nga wala magtagad sa panghunahuna sa Diyos. Nganong ang mga tawo nagsigeg pangitag tubag nga pipila ra man ang nakakaplag niana?

Gilalang nga Dunay Espirituwal nga Panginahanglan

Ang propesor sa sikolohiya nga si Dr. Kevin S. Seybold nagtawag niini nga “kinaiyanhong tinguha sa tawo sa pagsimba.” Di pa dugay, daghang siyentipiko nakaingon nga ang mga tawo duna gayoy kinaiyanhong tinguha sa pagpangitag kahulogan sa kinabuhi. Gani, ang uban nagtuo nga anaa sa atong mga gene ang tinguha nga makigsuod sa usa nga mas gamhanan.

Bisag gilantugian gihapon sa mga eskolar kon duna ba gayoy kinaiyanhong tinguha ang tawo sa  pagsimba, kadaghanang tawo wala magkinahanglan ug mga siyentipiko o mga propesyonal sa pagsulti kanila nga ang tawo duna gayoy espirituwal nga panginahanglan. Tungod sa atong kinaiyanhong tinguha nga makabatog relasyon sa Diyos, kita makasukna niining hinungdanon kaayong mga pangutana: Nganong ania kita dinhi? Unsay angay natong buhaton sa atong kinabuhi? Manubag ba kita sa usa ka gamhanan sa ngatanan nga Maglalalang?

Kon maniid ka pag-ayo sa kalibotan, imong makita ang pipila ka tubag niining mga pangutanaha. Pananglitan, palandonga ang lisod kaayong tugkaron nga mga butang sa kinaiyahan, gikan sa usay-selula nga gigming kaayong mga organismo ngadto sa dagko kaayong mga galaksiya nga nagpungpong sa kalangitan nga milyon-milyong light year kalayo gikan kanato. Dili ba nagtudlo kini kanato nga dunay intelihenteng Tigdisenyo o Maglalalang? Ang Bibliya nag-ingon: ‘Ang dili-makita nga mga hiyas [sa Diyos], nga mao ang iyang walay kataposang gahom ug pagka-Diyos, tin-awng makita sukad sa paglalang sa kalibotan padayon, tungod kay kini maila pinaagi sa mga butang nga gihimo, mao nga sila walay ikapangatarongan.’​—Roma 1:20.

Tagan-i ang Imong Espirituwal nga Panginahanglan

Ang Bibliya naghisgot kon giunsa pagbuhat sa Diyos ang tawo: “Iyang gitisok ang kawalay-kataposan diha sa ilang hunahuna.” (Ecclesiastes 3:11, Byington) Kita gusto gayong mabuhi, dili mamatay. Kinaiyanhon nato nga gustong mahibalo sa kahulogan sa kinabuhi ug matubag ang mga pangutana.

Busa dili ikatingala nga ang tawo mangita gayod ug mga tubag. Human makakita sa kalamposan nga nahimo sa tawo may kalabotan sa siyensiya ug teknolohiya, ang editor sa The Wall Street Journal miingon: “Wala gihapon matubag ang atong mga pangutana bahin sa kon kinsa kita ug kon nganong ania kita dinhi ug kon asa kita paingon.” Sa pagkamaalamon, kita mangitag tubag diha sa labing maayong tinubdan. Ang Bibliya nag-ingon bahin niini nga Tinubdan: “[Ang Diyos] ang nagbuhat kanato, ug dili kita sa atong kaugalingon.”​—Salmo 100:3.

Dili ba makataronganon nga modangop kita sa Usa nga naghimo niining mga milagro sa paglalang aron matagan-an ang atong espirituwal nga panginahanglan? Giawhag kita ni Jesu-Kristo sa pagbuhat niana. Siya miingon nga ang bugtong Tuboran sa kinabuhi​—ang atong Maglalalang—​ang makatagana sa atong espirituwal nga panginahanglan.​—Salmo 36:5, 9; Mateo 5:3, 6.

Busa ang pagbaton ug kasaligang tubag sa pangutana, Nganong ania kita dinhi? hinungdanon gayod aron matagan-an ang atong espirituwal nga panginahanglan. Palihog palandonga ang makapadasig nga panghunahuna sa atong Maglalalang bahin niini.