Gikan sa Among mga Magbabasa

Dili na Ulipon sa Alkoholikong Ilimnon (Mayo 2007) Makabasa ko usahay sa inyong magasin kay hatdan ko niini sa mga Saksi. Ang mga artikulo niini makapadasig kaayo kon itandi sa makapaguol nga mga balita sa TV ug mantalaan. Wala ko sukad maulipon sa alkoholikong ilimnon, apan daghang membro sa akong pamilya ug mga higala mga alkoholiko. Ang lalaki nga gihisgotan sa artikulo miingon nga naayo siya sa pagkaalkoholiko human sa tulo ka bulan nga pakigbisog. Nahimo niya kini human sa daghang tuig sa pagkaalkoholiko. Nakadayeg ko niya, pero makaingon pod ko nga morag dili katuohan ang nahitabo kaniya, ug para nako dili kini makapadasig niadtong naningkamot nga makalingkawas sa pagkaalkoholiko. Ang alkoholiko matental usahay sa pag-inom samtang naningkamot siya nga mamaayo.

G. A., Amerika

Ang “Pagmata!” nagtubag: Dili namo buot ipasabot nga ingon lang niana kasayon ang pagbuntog sa pagkaalkoholiko. Kami mouyon nga ang kadaghanan sa naningkamot sa paghunong matental usahay sa pag-inom ug mawad-ag paglaom. Bisan kadtong nakahunong dayon sa pag-inom ug dili na alkoholiko kinahanglan gihapong mag-amping nga dili siya matental. Sumala sa giingon sa artikulo, human sa napulo ka tuig nga pakigbisog, ang kanhing “ulipon sa alkoholikong ilimnon” miangkon: “Daghan ang wala makahibalo sa akong grabe nga pakigbisog, ug usa lang ka pag-inom ang gikinahanglan aron maulipon na usab ako sa alkoholikong ilimnon. Hidlawon gihapon ako ug alkoholikong ilimnon. Nagkinahanglag tim-os nga pag-ampo ug determinasyon aron makagahom ako sa pagbalibad sa pag-inom.” Tungod sa pagsalig sa Diyos pinaagi sa pag-ampo, daghan ang nakabuntog sa pagkaulipon sa alkoholikong ilimnon.​—Salmo 55:22.

Makasalig Ka ba sa Bibliya? (Nobyembre 2007) Ako 12 anyos ug buot kong magpasalamat sa inyong makalingaw ug punog impormasyon nga espesyal nga gula sa Pagmata! Naikag kaayo ko sa ikatulong katarongan diha sa panid 7 nga naghisgot bahin sa panagkauyon sa unod sa Bibliya. Gihisgotan dinhi ang mga butang nga wala nako mahunahunai sukad. Naghinamhinam ako sa sunod nga espesyal nga gula!

D. F., Amerika

Mga Butang nga Angayng Palandongon Gusto kong magpasalamat kaninyo sa bag-ong estilo sa Pagmata! Ang mga pangutana sa kataposan sa pipila ka artikulo nakabenepisyo kanako. Kini nakatabang kanako sa paghinumdom ug sa pagpamalandong sa impormasyon. Puliki kaayo ang atong kinabuhi karon nga usahay atong mataligam-an ang pipila ka hinungdanon ug makapalig-ong mga punto nga atong mabasa.

M.A.S., Brazil

Kataposan na ba Gayod ang Kamatayon? (Disyembre 2007) Unom na ka bulan ang milabay sukad namatay ang akong inahan sa aksidente. Nadasig gayod ako sa pagbasa niining artikuloha kay kini nakapalig-on sa akong paglaom nga makita siya pag-usab panahon sa pagkabanhaw. Daghan kaayong salamat.

L.L.R., Brazil

Mga Batan-on Nangutana . . . Nganong Angay Sundon ang mga Prinsipyo sa Bibliya? (Nobyembre 2007) Abi nako nga basta dili ko makighilawas, dili daotan ang pagpakigdeyt. Apan sa kadugayan dili na ako kontento nga kutob lang kami sa pagdeyt-deyt. Nagsugod ako paghandom ug sayop nga mga tinguha. Salamat kaayo sa pagpresentar niini nga mga pagtulon-an sa Bibliya sa paagi nga daling masabtan sa mga batan-on.

E. F., Japan