Kon Nganong Ania Kita Dinhi

ANG Bibliya nag-ingon nga ang atong Maglalalang, si Jehova nga Diyos, dili molihok nga walay katuyoan. Pananglitan, tagda ang iyang paglalang sa siklo sa tubig nga nagpaposible sa mga linalang dinhi sa yuta nga mabuhi. Sa balaknong paagi, husto kaayo ang pagkahubit sa Bibliya niini: “Ang tanang suba modagayday ngadto sa dagat, apan dili kini mapuno. Sa dapit diin ang suba nagagikan, didto kini mobalik.”​—Ecclesiastes 1:7, King James Version.

Gipakasama sa Bibliya ang pagkakasaligan sa mga saad sa Diyos sa maong siklo sa tubig. Sumala sa atong nahibaloan, tungod sa kainit sa adlaw, ang tubig sa kadagatan ug sa mga linaw mosaka ingong alisngaw ug mobalik sa yuta ingong ulan. May kalabotan niini nga siklo, si Jehova miingon:  “Maingon niana ang akong pulong nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”​—Isaias 55:10, 11.

Ang tubig mobalik sa yuta gikan sa kapanganoran nga magpabuhi sa mga linalang sa yuta. Sa susama, ang ‘pulong nga mogula sa baba sa Diyos’ makatagana sa atong espirituwal nga panginahanglan. Si Jesu-Kristo usab nag-ingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.”​—Mateo 4:4.

Pinaagi sa pagkuhag kahibalo bahin sa Diyos, mahimo natong mapahiuyon ang atong kinabuhi sumala sa iyang katuyoan. Apan una pa nato kana mahimo, kinahanglang makahibalo kita kon unsay iyang katuyoan. Pananglitan, nganong gilalang sa Diyos ang yuta? Ug sa unsang paagi kita nalangkit sa iyang katuyoan? Atong susihon.

Ang Katuyoan sa Diyos Alang sa Yuta

Kay buot sa Diyos nga mahatag ang labing maayo para sa tawo, iyang gibutang ang unang magtiayon, si Adan ug Eva, sa usa ka paraisong hardin. Dayon iyang gisugo sila sa pagsanay, nga miingon: “Magmabungahon ug magdaghan kamo ug pun-a ang yuta ug gamhi kini, ug pagabut-i ang mga isda sa dagat ug ang nagalupad nga mga linalang sa kalangitan ug ang matag buhing linalang nga nagalihok diha sa yuta.”​—Genesis 1:26-28; 2:8, 9, 15.

Unsay atong makat-onan gikan niining sugoa? Dili ba gusto sa Diyos nga ang tibuok yuta himoong paraisong puy-anan sa tawo? Ang iyang Pulong nag-ingon: “Kon bahin sa mga langit, iya ni Jehova ang mga langit, apan ang yuta iyang gihatag sa mga anak sa mga tawo.”​—Salmo 115:16.

Hinunoa, aron ang tawo makapahimulos sa katuyoan sa Diyos nga sila mabuhi sa yuta sa walay kataposan, kinahanglang ilang pasidunggan si Jehova pinaagi sa pagsugot kaniya. Apan gipasidunggan ba ni Adan si Jehova? Wala, siya nakasala kay iyang gisupak ang Diyos. Unsay gisangpotan niana? Ang tanang kaliwat ni Adan, lakip kanatong tanan karon, nakapanunod ug sala ug kamatayon, sama sa gipamulong sa Bibliya: “Ingon nga ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.”​—Roma 5:12.

Tungod niana, ang tanang tawo mamatay ug ang tibuok yuta wala gayod mahimong paraiso. Nan, nausab ba ang katuyoan sa Diyos alang sa yuta?

Wala, kay hinumdomi nga ang Diyos nag-ingon: “Ang akong pulong nga mogula gikan sa akong baba . . . dili mobalik kanako nga walay sangpotanan” kondili “kini tinong magpalampos sa butang nga tungod niana kini akong gipadala.” Dugang pa, ang Diyos nagsaad: “Ang tanang butang nga akong gikahimut-an akong pagabuhaton.” (Isaias 45:18; 46:10; 55:11) Kalipay ug katuyoan sa Diyos nga ang tibuok yuta himoong paraiso nga puy-an sa mga tawo nga mag-alagad kaniya nga malipayon hangtod sa hangtod, sumala sa iyang orihinal nga katuyoan.​—Salmo 37:29; Isaias 35:5, 6; 65:21-24; Pinadayag 21:3, 4.

 Sa Unsang Paagi Matuman ang Katuyoan sa Diyos?

Gipakita ni Jehova ang iyang dili hitupngan nga kaalam ug gugma pinaagi sa paghimog tagana aron ang mga tawo makalingkawas gikan sa napanunod nga sala ug kamatayon. Iyang gihimo kini pinaagi sa pagpakatawo sa usa ka lalaki nga wala makapanunod sa sala sa unang tawo nga si Adan. Kini nga tagana gitawag ug lukat, nga gitagana aron ang mga tawo nga nagsunod sa mga sukdanan sa Diyos makadawat ug kinabuhing walay kataposan. (Mateo 20:28; Efeso 1:7; 1 Timoteo 2:5, 6) Sa unsang paagi gitagana ang lukat?

Ang manulonda ni Jehova nga si Gabriel nagpahibalo sa ulay nga si Maria nga siya manamkon sa milagrosong paagi, nga naghatag ug detalye kon sa unsang paagi siya manganak bisag siya ‘wala makigdulog ug lalaki.’ Ang milagro nga gihimo sa Diyos mao ang pagbalhin sa kinabuhi sa iyang panganay nga Anak gikan sa langit ngadto sa tagoangkan ni Maria. Busa siya nanamkon pinaagi sa paglihok sa balaang espiritu sa Diyos.​—Lucas 1:26-35.

Paglabay sa siyam ka bulan si Jesus nahimugso ingong hingpit nga tawo, sama kang Adan. Sa ngadto-ngadto, iyang gihalad ang iyang hingpit nga kinabuhi. Tungod niana, si Jesus nahimong ‘ikaduhang Adan’ ug busa iya nang malukat ang tanang matinumanon sa Diyos gikan sa sala ug kamatayon.​—1 Corinto 15:45, 47.

Busa angay gayod nga atong higugmaon ang Diyos tungod sa dako kaayong gugma nga iyang gipakita kanato! Sumala sa giingon sa Bibliya, “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Apan ang pangutana mao, Sa unsang paagi atong mabalosan ang gugma sa Diyos? Dili ba kita angayng magpasalamat sa iyang gasa? Tagda kon unsay gihimo sa uban sa pagpakita sa ilang pagkamapasalamaton.

 Pagtagamtam ug Kinabuhi nga May Kahulogan

Si Denise, nga gihisgotan sa nag-unang artikulo, nakakat-on nga ang pagpasidungog sa Diyos pinaagi sa pagtuman sa iyang mga sugo ug mga instruksiyon nakahatag ug direksiyon ug kahulogan sa iyang kinabuhi. Siya miingon: “Akong nakat-onan gikan sa Bibliya nga gawas pa nga ang Diyos adunay katuyoan alang sa katawhan nga bug-os matuman sa umaabot, siya naghatag usab ug espesipikong buluhaton sa iyang mga magsisimba. Wala nay mas makapatagbaw nga kinabuhi kay sa paggamit sa akong kagawasan sa pagpili nga iyang gihatag kanako sa pagdayeg kaniya pinaagi sa pagkinabuhi subay sa iyang katuyoan.”

Makahimo usab kita niana pinaagi sa pagtuon kon unsay kabubut-on sa Diyos ug sa pagbuhat niana. Tinuod, wala pa gayod kita bug-os makapahimulos sa halad lukat, nga pinaagi niini kita makabaton ug hingpit nga kinabuhi diha sa usa ka matarong nga bag-ong kalibotan. Apan sa pagkakaron, kinahanglan nga atong tagan-an ang atong espirituwal nga panginahanglan nga gibutang sa Diyos diha sa matag usa kanato.

Si Dave, nga gihisgotan sa unang artikulo niini nga serye, nakatagana sa iyang espirituwal nga panginahanglan. Siya nakakaplag ug mga tubag sa iyang mga pangutana bahin sa kahulogan sa kinabuhi. Siya miingon: “Akong mahinumdoman nga sa wala pa ako makakat-on sa katuyoan sa Diyos, ang akong kinabuhi walay kapuslanan. Wala ako makaamgo niadtong higayona nga ang kahaw-ang nga akong gibati maoy tungod sa akong espirituwal nga panginahanglan nga wala katagan-i. Wala na ako mobatig ingon niana karon. Ako nang nasabtan kon nganong ania ako dinhi ug kon unsay angay nakong buhaton sa akong kinabuhi.”

Lahi sa panghunahuna sa dili hingpit nga mga tawo, ang panghunahuna sa Diyos bahin sa kahulogan sa kinabuhi nga gipadayag diha sa Bibliya makapalipay gayod. Kita ania dinhi tungod sa katuyoan ni Jehova sa paglalang kanato​—nga atong dayegon ang iyang ngalan, magbaton ug maayong relasyon kaniya, ug sa ingon matagan-an ang atong espirituwal nga panginahanglan. Bisan karon ug hangtod sa kahangtoran, kita malipay sa pagpahimulos sa katumanan niining inspiradong mga pulong: “Malipayon ang katawhan kansang Diyos mao si Jehova!”​—Salmo 144:15.

[Kahon/​Hulagway sa panid 8]

ANG ISYU BAHIN SA PAG-ANTOS

Ang pag-antos maoy usa ka dakong babag sa pagsabot kon nganong ania kita dinhi. Si Viktor Frankl miingon: “Kon duna man gayoy kahulogan ang kinabuhi, nan duna gayoy kahulogan ang pag-antos. Ang pag-antos maoy dili gayod kalikayan nga bahin sa kinabuhi, maingon nga dili usab kalikayan ang kapalaran ug ang kamatayon.”

Gisaysay sa Bibliya kon unsay hinungdan sa pag-antos ug kon unsay hinungdan sa kamatayon. Ang Diyos dili maoy hinungdan niini. Hinunoa, kini ang resulta sa sayop nga desisyon sa unang magtiayon dihang sila mibulag sa ilang Maglalalang. Ang ilang pagkamakasasala napanunod sa tanan nilang kaliwat ug maoy hinungdan sa pag-antos sa tawo.

Bisan tuod ang pagkahibalo kon nganong ania kita dinhi dili makasulbad sa tanang problema sa kinabuhi, kini makatabang kanato sa pagsagubang niini. Dugang pa, kita gihatagag paglaom alang sa umaabot, usa ka panahon sa dihang ang pag-antos ug ang kamatayon hanawon na sa Diyos hangtod sa kahangtoran.

[Diagram/​Hulagway sa panid 7]

Gipakasama sa Bibliya ang pagkakasaligan sa mga saad sa Diyos sa siklo sa tubig

[Diagram]

(Alang sa aktuwal nga pagkahan-ay, tan-awa ang publikasyon)

Ulan

Pagsaka sa tubig ingong alisngaw

Pagsaka sa tubig ingong alisngaw

Linaw, suba

Dagat

[Hulagway sa panid 8, 9]

Nganong makaseguro kita nga sa umaabot ang yuta himoong paraiso nga puy-an sa malipayon ug himsog nga mga tawo?

[Hulagway sa panid 9]

‘Wala nay mas makapatagbaw nga kinabuhi kay sa paggamit sa akong kagawasan sa pagpili diha sa pag-alagad sa Diyos.’​—Denise