Nagkinabuhi Panahon sa Dagkong Kausaban sa Korea

Sumala sa giasoy ni Chong-il Park

“Talawan! Nahadlok ka lang nga mamatay sa panggubatan. Gipasangil lang nimo nang imong relihiyon aron dili ka makaserbisyo sa militar.” Mao kanay giakusar kanako sa kapitan sa Counter Intelligence Corps (CIC) sa nagtindog ako sa iyang atubangan niadtong Hunyo 1953, kapin na sa 55 ka tuig nga milabay.

KINI nahitabo panahon sa Gubat sa Korea. Gihulbot sa kapitan ang iyang pistola ug gibutang kini diha sa iyang lamesa. “Mamatay ka karon dinhi imbes sa panggubatan,” siya miingon. “Unsa, di ka ba gihapon magbag-o sa imong desisyon?”

“Dili,” hugot akong mitubag. Niana, gipaandam sa kapitan ang usa ka sundalo sa pagpatay kanako.

Gitawag ako sa pagkasundalo apan mibalibad ako. Samtang naghulat ako, akong gisultihan ang kapitan nga ako nang gipahinungod ang akong kinabuhi ngadto sa Diyos, busa para nako sayop nga isakripisyo ko kini sa bisan unsang katarongan gawas sa pag-alagad sa Diyos. Dayon milabay ang pipila ka minutos nga kahilom. Wala magdugay, ang sundalo mibalik ug miingon nga naandam na ang tanan para sa akong kamatayon.

Ang kadaghanang tawo sa South Korea niadtong panahona walay hanaw bahin sa mga Saksi ni Jehova, labaw na sa among pagtutol sa pagsundalo sa bisan unsang gobyerno tungod sa relihiyosong katarongan. Sa dili pa nako isugid kon unsay sunod nga nahitabo, paasoya ako kon nganong nakahimo akog ingon niadto nga desisyon.

Ang Akong Kinabuhi sa Bata Pa

Natawo ako niadtong Oktubre 1930, nga kinamagulangan sa pamilya diha sa usa ka lungsod duol sa Seoul, nga kaulohan sa Korea. Ang akong apohang lalaki debotadong sumusunod ni Confucius, ug iya akong gimatuto nga ingon usab niana. Supak siya nga moeskuyla ako, busa wala ako moeskuyla hangtod nga siya namatay, nga niadtong higayona 10 anyos ako. Dayon, sa 1941, ang Japan ug Amerika nagsangkaay sa Ikaduhang Gubat sa Kalibotan.

Sanglit ang Korea ilalom pa man sa gobyerno sa Japan, kada buntag ang mga estudyante makigbahin sa usa ka seremonya nga nagpasidungog sa emperador sa Japan. Ang akong iyaan ug uyoan nahimong mga Saksi ni Jehova ug nabilanggo sa Korea panahon sa Ikaduhang Gubat sa Kalibotan tungod kay, sumala pa sa ilang natun-an, dili sila buot makigbahin sa bisan unsang kalihokan may kalabotan sa gubat. Daogdaogan kaayo ang mga Hapon sa mga Saksi nga tungod niana ang uban kanila nangamatay, lakip ang akong uyoan. Dayon ang akong iyaan miipon ug puyo uban namo.

Niadtong 1945 ang Korea nakagawas sa pagmando sa mga Hapon. Sa tabang sa akong iyaan ug ubang mga Saksi nga nakaagig pagkabilanggo, nagsugod ako pagtuon sa Bibliya ug nabawtismohan  ingong Saksi ni Jehova sa 1947. Sa Agosto 1949, si Don ug Earlene Steele, nga unang mga misyonaryo nga nabansay sa Watchtower Bible School of Gilead nga naasayn sa Korea, miabot sa Seoul. Paglabay sa daghang bulan, nangabot ang uban pang mga misyonaryo.

Sa Enero 1, 1950, ako ug uban sa tulo pa ka Koreano nagsugod sa pag-alagad ingong payunir, nga maoy pagtawag sa bug-os panahong mga ministro sa mga Saksi ni Jehova. Kami ang una sa Korea nga nahimong payunir liwas sa Ikaduhang Gubat sa Kalibotan.

Kinabuhi Panahon sa Gubat sa Korea

Wala magdugay, sa Dominggo, Hunyo 25, 1950, ang North Korea ug South Korea naggubatay. Niadtong panahona, usa ray kongregasyon sa mga Saksi sa tibuok Korea, nga gilangkoban ug 61 kanamo sa Seoul. Gipapauli sa U.S. Embassy ang tanang misyonaryo aron dili sila mapagan. Ang kadaghanan sa mga Saksi mibiya usab sa Seoul ug nagkatibulaag sa tibuok habagatang bahin sa nasod.

Apan ang mga batan-ong lalaki nga mahimo nang magsundalo gidid-an sa pagbiya sa Seoul. Kalit lang nga misulong sa siyudad ang mga sundalong Komunista ug ang Seoul nailalom sa pagmando sa militar sa Komunista. Bisag napugos ako sa pagtago niadtong higayona diha sa usa ka gamayng lawak sulod sa tulo ka bulan, nakasangyaw ako sa mga tawo bahin sa Gingharian sa Diyos. Pananglitan, may nakaila ako nga usa ka maestro nga nagtago-tago usab gikan sa mga Komunista. Nagkaipon kamig puyo, ug adlaw-adlaw kami nga nagtuon sa Bibliya. Sa ngadto-ngadto nabawtismohan siya ingong Saksi ni Jehova.

Sa ulahi, nasakpan kami sa Komunistang mga sundalo sa North Korea sa among gitagoan. Gipaila namo ang among kaugalingon ingong mga estudyante sa Bibliya ug gisaysay kanila ang Gingharian sa Diyos. Sa among kahibulong, wala nila kami dakpa apan, nagpakita hinuon silag interes sa mensahe sa Bibliya. Gani, ang uban kanila daghang higayong mibalik ug gustong mamati pag dugang bahin sa Gingharian sa Diyos. Kini nga eksperyensiya nakahatag kanamog pagsalig nga si Jehova manalipod gayod.

Human mailog sa mga sundalo sa UN ang Seoul, gitugotan ako sa pagbiyahe ngadto sa siyudad sa Taegu sa Marso 1951. Didto nakakuyog ako pagsangyaw uban sa mga isigka-Saksi sulod sa daghang bulan. Dayon, sa Nobyembre 1951, sa wala pa matapos ang gubat, si Don Steele mibalik sa Korea.

Mitabang ako kaniya sa pag-organisar pag-usab sa among buluhatong pagsangyaw. Ang Bantayanang Torre, ug ang Informant​—nga naghatag ug mga instruksiyon sa mga Saksi sa pagtuman sa buluhatong pagsangyaw—​kinahanglang hubaron sa pinulongang Koreano, makenilyahon, ug memyograpon. Kining mga basahona gipadala ngadto sa mga kongregasyon sa nagkalainlaing siyudad. Usahay kami ni Don mag-uban sa pagbiyahe, nga magduaw sa mga kongregasyon sa pagdasig kanila.

Niadtong Enero 1953, nalipay kaayo ko nga nakadawat ug sulat nga nagdapit kanako sa Gilead School sa New York aron mabansay ako ingong misyonaryo. Apan sa nakapalit na ako ug tiket sa ayroplano, nakadawat akog sulat gikan sa gobyerno sa Korea, nga nagmando kanako nga moreport ako sa pagserbisyo sa militar.

Nameligro ang Akong Kinabuhi

Diha sa sentro sa pagreklutag sundalo, akong gisaysay sa usa ka opisyal ang akong neyutral nga baroganan ug ang akong pagtutol sa pagsundalo. Niana iya akong gipaadto sa CIC sa pag-imbestigar kon Komunista ba ako. Mao kanang higayona  nga nameligro ang akong kinabuhi. Apan imbes pusilon ako, ang kapitan kalit nga mitindog, ug iyang gitunolan ug baga nga kahoy ang usa ka opisyal, ug mimando sa pagpuspos kanako. Bisan pag pwerteng sakita, nalipay ako nga nakalahutay niana.

Gipabalik ako sa CIC sa sentro sa pagreklutag sundalo, diin ang mga opisyal, nga wala magtagad sa akong relihiyosong baroganan, mihatag kanakog ID nga numero sa pagkasundalo, ug gibalhin ako sa sentro nga nagbansay ug mga sundalo sa isla sa Cheju, duol sa kapupud-an sa Korea. Pagkabuntag ang bag-ong mga rekluta, lakip nako, gipapanumpa sa panumpa sa sundalo. Mitutol ako, ug tungod niini gisentensiyahan ako sa hukmanan sa mga sundalo ug tulo ka tuig nga pagkabilanggo.

Libolibo ang Nagpabiling Maunongon

Sa adlaw nga mogikan na unta ako aron bansayon sa pagkamisyonaryo, nakakita akog ayroplano nga naglupad. Kini ang ayroplano nga ako untang sakyan. Imbes maguol tungod kay wala ako mahinayon sa Gilead, nalipay kaayo ako nga nakapabiling maunongon kang Jehova. Ug dili lang ako ang Koreanong Saksi nga midumili sa pagsundalo. Sa pagkatinuod, kapin sa 13,000 pang ubang mga Saksi sa mga katuigang misunod ang nagmaunongon usab. Sila nakasilbi ug total nga kapin sa 26,000 ka tuig sa mga prisohan sa Korea.

Human nakasilbi ug duha ka tuig sa akong tulo ka tuig nga sentensiya, gipardon ako ug gibuhian niadtong 1955 kay sulondan ako nga binilanggo. Mibalik ako sa pag-alagad ingong bug-os panahong ministro. Dayon sa Oktubre 1956, nakadawat akog asaynment sa pag-alagad sa sangang buhatan sa mga Saksi ni Jehova sa South Korea. Unya sa 1958, gidapit na usab ako sa pagtungha sa Gilead. Human nakagraduwar giasayn akog balik sa Korea.

Sa nakabalik ako sa Korea, nakaila nako si In-hyun Sung, usa ka matinumanong Saksi, ug kami nagpakasal sa Mayo 1962. Gimatuto siya sa Budhista nga pamilya ug nakakat-on bahin sa mga Saksi gikan sa usa ka klasmet. Sa unang tulo ka tuig sa among pagminyo, nagaduaw kami sa nagkalainlaing mga kongregasyon sa Korea matag semana aron sa pagpalig-on sa pagtuo sa mga membro niini. Sukad sa 1965 nag-alagad kami sa sangang buhatan sa mga Saksi, nga karon mga 60 kilometros gikan sa Seoul.

Namalandong Bahin sa mga Kausaban

Sa mamalandong ako, nahibulong ako sa dagkong kausaban niining nasora. Liwas sa ikaduhang gubat sa kalibotan ug sa gubat batok sa North Korea, gun-ob ang South Korea. Ang mga siyudad ug mga dalan niini guba. Panagsa ra nga dunay koryente ug pangpainit sa balay panahon sa tingtugnaw. Ug pobre kaayo ang nasod. Paglabay sa 50 ka tuig, katingalahan ang pag-uswag sa South Korea.

Karon mapasigarbohon ang South Korea nga nahimong ika-11 nga kinadatoan nga nasod sa kalibotan. Gibantog kini sa modernong mga siyudad niini, tren nga kusog kaayong modagan, sa elektroniko, ug kamaayong laking mogamag mga sakyanan. Ang South Korea karon maoy ikalimang kinadak-ang nasod nga naggamag mga sakyanan. Apan mas importante kanako mao ang kauswagan nga gihimo sa gobyerno sa South Korea maylabot sa pagtahod sa tawhanong mga katungod sa mga lungsoranon sa South Korea.

Sa dihang gisentensiyahan ako sa hukmanan sa sundalo niadtong 1953, ang gobyerno sa Korea wala makasabot kon nganong dili ko magsundalo. Ang uban kanamo giakusar nga mga Komunista, ug ang uban sa among mga isigka-Saksi gipusposan sa mga Komunista hangtod namatay. Daghan niadtong gibilanggo tungod kay midumili sa pagsundalo sa batan-on pa, nakakita sa ilang mga anak, ug bisan sa ilang mga apo, nga gibilanggo usab tungod sa mao gihapong katarongan.

Sulod sa daghang tuig, ang media maayog komento  sa mga hitabo may kalabotan sa pagdumili sa mga Saksi ni Jehova sa pagsundalo sa bisan unsang nasod. Usa ka abogado nga nakapabilanggo ug usa ka Saksi tungod kay midumili sa pagsundalo naghimog sulat nga nangayog pasaylo sa iyang nahimo, ug kini gipatik sa usa ka ilado kaayong magasin.

Nanghinaot ako nga ang among katungod sa pagdumili sa pagsundalo tungod sa relihiyon tahoron sa South Korea sama sa ubang nasod. Nag-ampo ako nga unta dili na pugson sa mga pamunoan sa South Korea kadtong sama nakog tinuohan ug taposon na ang pagpamilanggo sa mga batan-on nga dili magsundalo tungod sa relihiyon, ‘aron kami makapadayon sa pagkinabuhi nga mahusay ug malinawon.’​—1 Timoteo 2:1, 2.

Ingong alagad sa among Diyos, si Jehova, amo gayong pabilhan ang higayon sa paglaban sa iyang katungod ingong among Magmamando. (Buhat 5:29) Nagtinguha gayod kami nga mapalipay ang iyang kasingkasing pinaagi sa pagpabiling matinumanon kaniya. (Proverbio 27:11) Malipayon ako nga usa ako sa minilyon nga mipili sa ‘pagsalig kang Jehova sa among bug-os kasingkasing ug dili pagsalig sa among kaugalingong pagsabot.’​—Proverbio 3:5, 6.

[Blurb sa panid 13]

“Sa among kahibulong, wala nila kami dakpa apan, nagpakita hinuon silag interes sa mensahe sa Bibliya”

[Blurb sa panid 14]

Ang mga Saksi sa Korea nakasilbi ug 26,000 ka tuig sa prisohan tungod sa pagdumili sa pagsundalo

[Hulagway sa panid 12]

Sa bilanggoan sa militar, 1953

[Hulagway sa panid 15]

Nagduaw sa mga kongregasyon uban kang Don Steele panahon sa gubat, 1952

[Hulagway sa panid 15]

Sa wala pa kami makasal, 1961

[Hulagway sa panid 15]

Tighubad sa nagapanawng magtatan-aw, 1956

[Hulagway sa panid 15]

Uban kang In-hyun Sung karon