Nganong Ania Kita Dinhi?

Unsay kahulogan sa kinabuhi?

KASAGARAN natong madunggan kining mga pangutanaha, apan ania pay laing pangutana: Mabuhi lang ba kita kutob ug 70 o 80 ka tuig ug dayon mamatay?​—Salmo 90:9, 10.

Tingali makapangutana kita niana dihang makaamgo kita nga pagkamubo ra diay kaayo sa atong kinabuhi. Siyempre, dili kinahanglang mameligro pa ang atong kinabuhi ayha kita mangutana kon nganong ania kita dinhi. Tungod sa grabeng kaguol kita makapangutana usab niini. Ug ang uban nakapangutana niini dihang mamalandong sila sa ilang kinabuhi.

Si Dave dakog suweldo, nindot ug apartment, ug malipayon sa pagpakig-uban sa iyang mga higala. Matod niya: “Usa niana ka gabii, samtang naglakaw ako gikan sa usa ka parti, kalit lang nga misantop sa akong hunahuna kini nga pangutana, ‘Ingon ba lamang niini ang kinabuhi?​—Mabuhi ba lang ako ug kadiyot ug unya mamatay? O duna pa bay labaw niini?’ Niadtong higayona nakaamgo ako nga wala gayoy kahulogan ang akong kinabuhi.”

Diha sa iyang libro nga Man’s Search for Meaning, si Viktor Frankl miingon nga nakapangutana usab niana ang iyang mga kauban nga naluwas sa Holocaust (pagpamatay sa mga Nazi sa mga Hudiyo) dihang sila nakagawas sa mga kampo konsentrasyon. Sa nakauli na sila, ilang nahibaloan nga nangamatay na diay ang ilang mga minahal. Si Frankl miingon: “Pagkamakaluluoy niadtong mga tawhana nga unta nakagawas na, apan sa pag-abot nila, ang kinabuhi nga ilang nakita lahi diay kaayo sa ilang gihandom!”

Ang mga Nangutana

Halos tanang tawo sa nagkalainlaing kaliwatan nakapangutana kon nganong ania kita dinhi. Ang Bibliya naghisgot ug mga tawo nga gustong mahibalo kon unsay katuyoan sa ilang kinabuhi. Human nangahanaw ang bahandi ni Job ug nangamatay ang iyang mga anak ug samtang nag-antos ug grabeng sakit,  siya mituaw: “Maayo pag namatay ako sa tiyan sa akong inahan, o sa akong pagkahimugso?”​—Job 3:11, Maayong Balita Biblia.

Kana usab ang gibati sa manalagnang si Elias. Kay nagtuo nga siya na lay nahibilin nga magsisimba sa Diyos, siya miingon: “Igo na! Karon, Oh Jehova, kuhaa ang akong kalag.” (1 Hari 19:4) Mao kanay gibati sa kadaghanan. Gani, ang Bibliya naghubit kang Elias ingong “usa ka tawo nga may pagbati nga sama kanato.”​—Santiago 5:17.

Malamposong Panaw sa Kinabuhi

Ang kinabuhi ikatandi sa usa ka panaw. Mahimong nagsugod kag biyahe nga wala ka mahibalo kon asa ka padulong, sa ingon usab mahimong nagkinabuhi ka nga wala ka mahibalo kon unsa gayoy katuyoan niini. Kon ingon ka niini, basin mahisama ka nianang giingon sa usa ka iladong magsusulat nga nagpapuliki-puliki sa kinabuhi aron lang ingnon nga dunay katuyoan ang kinabuhi. Siya misulat bahin sa mga tawo nga “nakakab-ot ug kalamposan nga walay kapuslanan​—mga kalamposan nga nakapildi hinuon sa mga butang nga mas importante kanila.”

Dili ba walay kapuslanan ang pagpapaspas ug dagan sa sakyanan kon wala kay klarong destinasyon? Sa susama, ang pagpangitag kahulogan sa kinabuhi pinaagi sa pagpapuliki sa imong kinabuhi dili makapalipay kondili makapahigawad lang kanimo.

Ang tanang tawo, bata man o tigulang, gusto gayod mahibalo sa tubag sa pangutana: Nganong ania kita dinhi? Nakapangutana niini ang mga tawo tungod kay kitang tanan dunay usa ka butang nga gikinahanglan pag-ayo​—usa ka espirituwal nga panginahanglan nga mahimong dili matagan-an bisan pag nakabaton kitag daghang materyal nga mga butang. Susiha kon unsay gihimo sa uban aron matagan-an kini nga panginahanglan diha sa ilang pagpangitag katuyoan sa kinabuhi.

[Blurb sa panid 4]

Ang pagpangitag kahulogan sa kinabuhi pinaagi sa pagpapuliki sa imong kinabuhi dili makapalipay kondili makapahigawad lang kanimo

[Hulagway sa panid 3]

Si Job nangutana kon nganong gipakatawo pa siya

[Hulagway sa panid 4]

Si Elias “may pagbati nga sama kanato”