Pagpaniid sa Kalibotan

◼ Sa Germany, 8 porsiyento lang sa populasyon ang nagtuo nga ang labing hinungdanong bahin sa Bisperas sa Pasko mao ang relihiyosong kahulogan niini. Niadtong 1980, 47 porsiyento ingon nianag panghunahuna.​—TV NEWS CHANNEL N24, GERMANY.

◼ “Sa unang higayon sa kasaysayan [sa Amerika], kapin sa usa sa matag 100 ka Amerikano ang nakarsel . . . Sa tibuok nasod, halos 1.6 milyones ang napriso.”​—THE NEW YORK TIMES, U.S.A.

◼ Gipakita sa usa ka pagtuon nga “100% sa mga Katsila nga gieksamin” kontaminado ug usa ka matang sa pamatay sa dangan, sa ato pa, “mga kemikal nga giisip nga makadaot sa panglawas.”​—UNIVERSITY OF GRANADA, ESPANYA.

◼ “Sa mga nasod nga may mabatonang impormasyon, ang kita sa gobyerno sa buluhisan sa tabako maoy 500 ka pilo nga mas dako kay sa nagasto sa pagkontrolar sa paggamit ug tabako.”—WORLD HEALTH ORGANIZATION, SWITZERLAND.

◼ Mas daghan na karon ang mga Muslim kay sa mga Katoliko. Sa 2006, 19.2 porsiyento sa populasyon sa kalibotan mga Muslim ug 17.4 porsiyento mga Katoliko.​—REUTERS NEWS SERVICE, BRITANYA.

Barko nga Butaron ug Tabanog

Karon nga nagmahal na ang krudo ug gasolina ug tungod sa nagdako nga kabalaka may kalabotan sa kalikopan, ang mga tag-iyag barko nangitag mga paagi aron mamenosan ang paggamit ug krudo o gasolina ug usab ang pagbugag makadaot nga aso. Busa ilang gigamit ang karaang pamaagi​—ang hangin. Usa ka paagi nga nasulayan na mao ang paggamit ug tabanog sa pagbutad ug barko, nag-ingon ang mantalaang Frankfurter Allgemeine Zeitung. Sa tabang sa tabanog, nga naglupad ug 300 metros, mapahinay sa kapitan ang dagan sa barko. Di pa dugay gibutad sa 160 metro kuwadrado nga tabanog ang barkong dekarga nga naglawig sa Atlantiko.

Makalahutay ug Hulaw

“Ang ulod sa langaw sa Aprika makalahutay ug grabeng hulaw pinaagi sa pagpagahi sa iyang kaugalingon nga samag kendi,” nag-ingon ang Science News. Kon mahutdan ug tubig ang ulod sa langaw nga Polypedilum vanderplanki, pulihan niini ang nawalang tubig ug morag kristal nga substansiya nga susama sa migahi nga tinunawng asukar. Niini nga kahimtang, dili na moobra ang metabolismo sa ulod. Ang ulod temporaryong mogahi sulod sa 17 ka tuig hangtod maulian kini inig-abot sa ting-ulan.

Kinamaayohang Dapit Alang sa Obserbatoryo

Usa ka tem gikan sa lainlaing nasod nagtukod ug obserbatoryo sa astronomiya nga robot ang nag-obserbar didto sa Dome Argus, ang kinatas-ang bahin sa Silangang Antartika nga 4,000 metros ibabaw sa lebel sa dagat. Ang Dome Argus, nga 1,000 kilometros lang ang gilay-on gikan sa South Pole, tugnaw kaayo ug usahay ngitngit kaayo. Ang hangin dinhi linaw ug dili umogon ug magngitngit dinhig upat ka bulan. Ang Dome Argus giingon nga mao ang kinamaayohang dapit sa yuta alang sa pag-obserbar sa mga bituon, planeta, ug uban pa. Ang tagdumala sa Chinese Center for Antarctic Astronomy nga si Lifan Wang nag-ingon nga pinaagi sa teleskopyo niini nga obserbatoryo, “posible nang makakuhag tin-aw kaayong hulagway nga sama katin-aw nianang makuha sa mga teleskopyo gikan sa wanang nga menos pag gasto.”