Gidisenyo ba Kini?

Ang Sungo sa Toucan

◼ Ang toucan nga makita lamang diha sa Sentral Amerika ug Amerika del Sur kasagaran maglukso-lukso lang kay dili man kaayo kini makalupad. Ang tingog sa pipila ka espisye niini morag baki, apan mas kusog lang. Gani, madungog kini bisag usa ka kilometros kalayo gikan sa lasang. Apan ang nakapahibulong kaayo sa mga siyentipiko mao ang sungo sa toucan.

Hunahunaa: Ang sungo sa pipila ka matang sa toucan halos katunga sa gitas-on sa lawas niini. Morag bug-at kining tan-awon, apan dili diay. “Ang gawas nga bahin niini maoy gama sa elemento nga keratin, nga sama nianang sa kuko ug buhok,” nag-ingon ang eksperto nga si Marc André Meyers. “Kini sa pagkatinuod maoy mga lut-od sa gigming nga mga palid, nga nagsapaway samag mga pawod sa atop.”

Ang kadasokon sa sungo sa toucan mahimong ikatandi sa gahi nga espongha. Dunay bahin kini nga basiyo, samtang ang ubang mga bahin maoy mga lanot-lanot ug mga hapin-hapin. Tungod niini ang sungo gaan apan lig-on kaayo. “Ang toucan daw eksperto kaayo sa pamaagi sa inhenyeriya,” miingon si Meyers.

Tungod sa pagkagama sa sungo niini, kini dili dayon mapungil kon mabangga. Nagtuo ang mga siyentipiko nga ang sungo mahimong estudiyohan sa mga inhenyero sa industriya sa paggamag ayroplano ug awto. “Ang mga palid nga gihimo nga sama nianang pagkagama sa sungo sa toucan mahimong makahatag ug proteksiyon sa mga motorista dihang mabangga,” nag-ingon si Meyers.

Unsay imong hunahuna? Sulagma ra bang mitungha ang gaan apan lig-on kaayong sungo sa toucan, o dunay nagdisenyo niini?

[Diagram/Hulagway sa panid 17]

(Alang sa aktuwal nga porma, tan-awa ang publikasyon)

Basiyo nga parte

Morag espongha