Ang Hunahuna sa Bibliya

Silot ba sa Diyos ang Imong mga Problema?

“Nagtuo ako nga gisilotan ako,” nag-ingon ang usa ka babaye nga kapin nag 50 ang edad human siya mahibalo nga duna siyay kanser. Namalandong sa sala nga iyang nahimo daghang tuig nang miagi, siya miingon, “Kini tingali ang paagi sa Diyos sa pagsulti kanako nga ako nakasala.”

SA DIHANG makaatubang ug mga kalisdanan, daghang tawo nagtuo nga sila gisilotan sa Diyos tungod sa sala nga ilang nahimo kanhi. Kon sila kalit lang makaatubang ug daghan kaayong kalisdanan, imong madunggan sila nga moingon: “Nganong ako pa man? Unsa may akong nahimong daotan?” Angay ba kitang moingon nga ang atong mga problema maoy timailhan nga kita gisilotan sa Diyos? Silot ba gayod sa Diyos ang imong mga kalisdanan?

Matinumanong mga Magsisimba Nakaatubang ug mga Kalisdanan

Tagda ang asoy sa Bibliya bahin kang Job. Kalit nangahanaw ang iyang bahandi. Sunod, nangamatay ang iyang napulo ka anak tungod sa unos. Wala madugay, siya gitakboyag makapaluya ug makaluod nga sakit. (Job 1:13-19; 2:7, 8) Tungod sa maong mga kalisdanan si Job mituaw: “Gihampak ako sa kamot sa Diyos.” (Job 19:21, Today’s English Version) Sama sa kadaghanang tawo karon, tingali si Job nagtuo nga siya gisilotan sa Diyos.

Apan ang Bibliya nag-ingon nga sa wala pa magsugod ang mga pagsulay ni Job, gihubit siya sa Diyos ingong “usa ka tawo nga walay-ikasaway ug matul-id, mahadlokon sa Diyos ug naglikay sa daotan.” (Job 1:8) Kining giingon sa Diyos nagpakita lang nga ang mga kalisdanan ni Job dili silot sa Diyos.

Sa pagkatinuod, dunay daghang asoy sa Bibliya bahin sa mga tawong matarong nga nakaagom ug kalisdanan. Bisan tuod si Jose maunongong alagad sa Diyos, siya nabilanggo sa daghang tuig bisag walay sala. (Genesis 39:10-20; 40:15)

 Ang matinumanong Kristohanon nga si Timoteo ‘subsob nga nagsakit.’ (1 Timoteo 5:23) Bisan si Jesu-Kristo, nga wala gayod makahimog daotan, mapintasong gidagmalan sa wala pa mag-antos sa masakit nga kamatayon. (1 Pedro 2:21-24) Busa sayop ang pag-ingon nga silot sa Diyos ang kalisdanan. Apan kon dili ang Diyos maoy nakaingon sa kalisdanan, kinsa man diay?

Mga Hinungdan sa Atong mga Problema

Gipadayag sa Bibliya nga si Satanas nga Yawa ang hinungdan sa mga kalamidad ni Job. (Job 1:7-12; 2:3-8) Dugang pa, gipakita niini nga si Satanas mao ang pangunang hinungdan sa atong mga problema karon dihang kini miingon: “Alaot ang yuta ug ang dagat, tungod kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.” (Pinadayag 12:12) Kay si Satanas man ang “magmamando niining kalibotana,” daghan ang iyang naimpluwensiyahan sa paghimog daotang mga buhat nga miresulta ug daghang kagul-anan ug kasakitan.​—Juan 12:31; Salmo 37:12, 14. a

Apan dili nato angayng pasanginlan dayon ang Yawa sa matag kalisdanan nga atong maagoman. Tungod sa atong napanunod nga sala ug pagkadili-hingpit, kita may tendensiya sa paghimog dili maalamong mga desisyon nga tungod niana kita magkaproblema. (Salmo 51:5; Roma 5:12) Pananglitan, hunahunaa ang usa ka tawo nga dili mokaon ug husto o dili matulog ug maayo. Kon siya masakit tungod niini, ang Yawa ba ang iyang basolon? Dili, kay naani lang niya ang mapait nga resulta sa iyang sayop nga desisyon. (Galacia 6:7) Busa husto ang usa ka panultihon sa Bibliya: “Ang binuang sa tawo makadaot sa iyang kinabuhi.”​—Proverbio 19:3, The New English Bible.

Sa kataposan, angay kitang mahibalo nga daghan sa dili maayong mga panghitabo sa kinabuhi maoy resulta sa “panahon ug . . . wala damhang panghitabo.” (Ecclesiastes 9:11) Pananglitan, tagda ang usa ka tawo nga naabtan ug kusog nga ulan. Siya mabasa lag gamay o makaligo gyod sa ulan depende kon diin siya maabti. Sa susama, niining “makuyaw nga mga panahong lisod sagubangon,” ang dili maayong mga kahimtang tingali kalit nga mahimong mga kalisdanan. (2 Timoteo 3:1-5) Kon unsa ka grabe nga maapektohan kita sagad nagdepende lang sa panahon ug mga kahimtang, diin kita wala gayoy kontrol niana. Nan nagpasabot ba kini nga kita makaagom kanunay ug kalisdanan?

Ang Tanang Kalisdanan Hapit Nang Matapos

Makapalipay nga hapit nang taposon ni Jehova nga Diyos ang tanang kalisdanan. (Isaias 25:8; Pinadayag 1:3; 21:3, 4) Sa pagkakaron, iyang gipakita nga siya may kahingawa gayod kanato pinaagi sa paghatag kanato ug ‘instruksiyon’ ug ‘paghupay gikan sa Kasulatan’ aron kita makasagubang sa mga pagsulay karon samtang kita nagpaabot nianang maanindot nga umaabot. (Roma 15:4; 1 Pedro 5:7) Niana unyang panahona, ang mga matarong sa panan-aw sa Diyos makatagamtam ug kinabuhing walay kataposan diha sa usa ka bag-ong kalibotan nga wala nay mga kalisdanan.​—Salmo 37:29, 37.

[Footnote]

NAKAPAMALANDONG KA BA?

◼ Ang mga daotan lang bay makaagom ug kalisdanan?​—Job 1:8.

◼ Ang Yawa bay mabasol sa tanan natong mga problema?​—Galacia 6:7.

◼ Dili ba mahanaw ang kalisdanan?​—Pinadayag 21:3, 4.

[Blurb sa panid 29]

“Ang panahon ug ang wala damhang panghitabo modangat kanilang tanan.”​—Ecclesiastes 9:11