Tubig nga Makahatag ug Kinabuhi

Sa nagbiyahe si Jesus mihapit siya sa Samaria, amihanan sa Jerusalem. Siya gikapoy ug giuhaw. Sa naglingkod siya tapad sa tabay, nangayo siyag tubig sa babayeng Samarianhon. Ang babaye nahibulong kon nganong ang usa ka Hudiyo nangayo kaniyag tubig, kay sa unang siglo ang mga Hudiyo ug mga Samarianhon dili man maayog relasyon.

Ang naglibog nga babaye nangutana kang Jesus: “Naunsa ba nga ikaw, bisan pa usa ka Hudiyo, nangayo kanakog mainom, nga ako babayeng Samarianhon man?”

Si Jesus mitubag: “Kon imo pang nahibaloan ang walay bayad nga gasa sa Diyos ug kon kinsa kining nagsulti kanimo, ‘Hatagi akog mainom,’ mangayo ka unta kaniya, ug hatagan ka unta niya ug buhi nga tubig.”

Si Jesus dugang miingon kaniya: “Ang matag usa nga magainom niining tubiga pagauhawon pa pag-usab. Bisan kinsa nga magainom sa tubig nga akong igahatag kaniya dili na gayod pagauhawon pa, hinuon ang tubig nga akong igahatag kaniya mahimong usa ka tuboran sa tubig diha kaniya nga magabugwak aron mohatag ug kinabuhing walay kataposan.”​—Juan 4:1-15.

Unsang tubiga ang gipasabot ni Jesus?

GITAWAG sa Bibliya ang Maglalalang, si Jehova nga Diyos, nga mao “ang tuboran sa buhi nga tubig.” (Jeremias 2:13) Ang kinabuhi maoy gasa sa Diyos, ug ang atong kinabuhi nagdepende dili lang sa pag-inom sa literal nga tubig kondili sa pag-inom usab sa tubig nga gihisgotan ni Jesus.

Ang mga tawo karon mas nagkinahanglan ug giya nga gikan sa Diyos. Ug mahimong ikaingon nga kulang silag giya maylabot sa hinungdanon kaayong mga butang. Ang mga tawo walay makaplagang tubag sa mga pangutana sama sa: Hain ang mga patay? Duna bay paglaom nga makauban sila pag-usab? Nganong gitugotan sa Diyos ang pag-antos? Moabot kaha ang panahon diin wala na unyay gubat, krimen, gutom, ug sakit? Ang mga Saksi ni Jehova nagtuo nga ang makapatagbawng mga tubag niining mga pangutanaha makaplagan diha sa makaparepreskong “tubig” sa Pulong sa Diyos, ang Bibliya.

Ang tubig nga gitumong ni Jesus sa dihang nakigsulti  siya sa babayeng Samarianhon diha sa tabay mao ang makahatag ug kinabuhi nga mga kamatuoran gikan sa Pulong sa Diyos. Gidapit ka sa mga Saksi ni Jehova sa pagkat-on sa kamatuoran sa Bibliya. Kini nga imbitasyon gipahayag diha sa kataposang basahon sa Bibliya: “Si bisan kinsa nga giuhaw paaria; si bisan kinsa nga may tinguha paimna sa tubig sa kinabuhi nga walay bayad.”​—Pinadayag 22:17.

Aron ka masayod kon sa unsang paagi ang Gingharian sa Diyos makahatag ug kaayohan sa tawo, kontaka ang mga Saksi ni Jehova sa inyong dapit o pagsulat sa haom nga adres nga nalista sa panid 5 niini nga magasin. Tan-awa usab ang Web site nga www.watchtower.org.

[Kahon sa panid 8, 9]

NATAGBAW BA SA RELIHIYON ANG KAUHAW SA TAWO?

Ang pagsimba o pag-angkon nga relihiyoso dili makaagak sa tawo ngadto sa makaparepreskong tubig sa kamatuoran. Ang tinuod, daghan sa dagkong mga relihiyon karon nakadugang hinuon sa mga problema sa tawo imbes makasulbad. Pananglitan, hunahunaa kini: Panahon sa gubat, gipamatay sa mga Katoliko ang isigka-Katoliko, gipamatay usab sa mga Protestante ang isigka-Protestante, ug kining duha nangaliyupo sa Diyos nga unta silay makadaog!

Adunay daghang report usab bahin sa mga eskandalo sa iglesya, sama sa pagdispalko sa mga klerigo sa pondong kuwarta o pag-abuso sa kabataan. Busa ang tubig nga gitagana sa kadaghanang relihiyon hugaw gayod. (Pinadayag 17:4-6; 18:1-5) Sila sama nianang gihisgotan diha sa Bibliya sa Tito 1:16: “Sila nagpahayag sa dayag nga sila nakaila sa Diyos, apan sila naglimod kaniya pinaagi sa ilang mga buhat.” Diyutay ra gayod ang nahimo sa relihiyon sa pagtagbaw sa kauhaw sa tawo sa tubig sa kamatuoran.

[Kahon/​Hulagway sa panid 9]

Ang 19 ka kapitulo sa basahong Unsay Tinuod nga Gitudlo sa Bibliya?, nga may 224 ka panid, naghisgot sa mga tubag sa Bibliya sa hinungdanong mga pangutana, sama sa:

“Unsa ang katuyoan sa Diyos alang sa yuta?”

“Hain ang mga patay?”

“Nagkinabuhi na ba kita sa ‘kataposang mga adlaw’?”

“Nganong gitugotan sa Diyos ang pag-antos?”

[Hulagway sa panid 9]

Imong makaplagan ang ‘tubig sa kamatuoran’ diha sa Kingdom Hall sa inyong dapit