Ang Dyslexia Dili Babag Kanako

Sumala sa Giasoy ni Michael Henborg

Ako dunay diperensiya sa pagkat-on nga gitawag ug dyslexia maingon man ang akong amahan, inahan, ug tulo ka manghod nga lalaki. Tungod niini, naglisod ako pagbasa ug nalisdan gayod ako sa akong pagtungha. Bisan pa niana, daghan kaayo kog nadawat nga tabang ug pagdasig, ilabina gikan sa akong pamilya.

ANG akong pamilya mga Saksi ni Jehova sulod sa upat ka kaliwatan, ug ang pagbasa, ilabina sa Bibliya ug sa pinasukad sa Bibliya nga mga publikasyon, importante gayod nga bahin sa among kinabuhi. Ako ug ang akong manghod nga si Flemming kanunay mokuyog kang Papa sa pagsangyaw, busa natisok sa among hunahuna nga importante gayod ang pagbasa ug pagsulat.

Sa bata pa, tigbasa na gyod ko sa matag gula sa Ang Bantayanang Torre ug Pagmata! nga moabot ug hangtod 15 oras ang usa ka magasin! Dugang pa, akong gisugdag basa ang tibuok Bibliya. Nagpaenrol sab ko sa Teokratikanhong Tunghaan sa Ministeryo, nga ginahimo sa mga kongregasyon sa mga Saksi ni Jehova sa tibuok kalibotan. Kini nga tunghaan nagbansay sa mga estudyante sa pagbasa ug pagsultig maayo ug sa paghatag ug pakigpulong. Kini nga mga tagana dako kaayog tabang kanako sa akong pagpakigbisog sa dyslexia. Apan wala ko magdahom nga daghan pa diay akog sagubangonon. Paasoya ako.

Nagtuon ug Iningles

Niadtong 1988, sa dihang 24 anyos ako, nagpayunir ako, usa ka bug-os panahong ministro sa maayong balita. Sanglit daghan man ug mga langyaw sa Denmark, gusto kong ipaambit kanila ang kamatuoran sa Bibliya. Apan aron mahimo ko kini, kinahanglang magtuon akog Iningles​—usa ka tumong nga nalisdan kaayo ako. Bisan pa niana, kay determinado man akong makakat-on ug pinaagi sa pagtudlo sa uban, ako anam-anam nga miuswag, ug sa ngadto-ngadto nakapaambit ako sa maayong balita sa Gingharian sa Diyos ngadto sa nagsultig Iningles nga mga langyaw sa among siyudad sa Copenhagen. Siyempre, nagkasayop-sayop ako apan wala kana makapaluya kanako.

Tungod kay nahibalo akog Iningles, nakaboluntaryo ako sa mga proyekto sa pagpanukod sa mga Saksi ni Jehova sa lainlaing kayutaan. Una, gipadala ako ngadto sa Greece, ug sa ulahi mitabang ako sa pagtukod sa sangang buhatan sa Madrid, Spain.

Sanglit gusto man ko nga mapauswag pa ang akong ministeryo, miaplay ako sa pagtungha sa Ministerial Training School, nga gidumala sa mga Saksi ni Jehova. Kini nga tunghaan nagbansay sa Kristohanong mga ulitawo sulod sa walo ka semana kinsa andam sa pag-alagad sa mga dapit diin mas dako ang panginahanglan alang sa mga ministro sa maayong balita. (Marcos 13:10) Gidapit ako sa pagtambong sa klase nga Iningles ug pinulongan nga gihimo sa Sweden.

Ang klase nagsugod sa Septiyembre 1, 1994. Gusto ko nga maandam pag-ayo, busa upat ka oras ko nga nagtuon ug Iningles matag adlaw sulod sa mga walo ka semana, ug nakig-uban ako sa Iningles-ug-pinulongan nga kongregasyon. Sa nagtungha na ako, wala gayod ko motugot nga mabalda ang akong pag-uswag tungod sa akong diperensiya. Pananglitan, sa dihang mangutana ang mga instruktor, akong iisa kanunay ang akong kamot bisag dili ko segurado sa eksaktong pulong nga gamiton. Dihang nakagraduwar,  giasayn ako ingong payunir sa Copenhagen. Naglisod ako sa pagtuon ug Iningles, apan duna pay mas lisod niini.

Nagtuon ug Tamil

Niadtong Disyembre 1995, naasayn ako sa Tamil-ug-pinulongan nga kongregasyon sa lungsod sa Herning, Denmark. Para nako ang Tamil maoy usa sa kinalisdang mga pinulongan. Kini dunay 31 ka letra, ug mga letra nga kombinasyon sa konsonante ug bokales, nga duolan sa 250 ka karakter tanan-tanan!

Sa sinugdan, Danes nga pinulongan ang akong gamiton sa pakigpulong sa kongregasyon nga hubaron sa Tamil. Sa dihang naghatag akog pakigpulong sa Tamil, ambot lang kon duna bay nakasabot nako. Bisan pa niana, ang mga mamiminaw matinahorong namati, bisag morag kakataw-onon na sila. Nakadesisyon ako sa pagbalhin sa nasod nga Tamil ang sinultihan​—sa Sri Lanka—​aron mas dali akong makakat-on.

Sa pag-abot nako sa Sri Lanka niadtong Oktubre 1996, dihay giyera sibil sa nasod. Ako nakapuyo sa lungsod sa Vavuniya nga anaa sa utlanan sa duha ka nag-awayay nga pundok. Ang mga igsoon didto pobre apan mahigugmaon ug maabiabihon kaayo, ug naningkamot gayod sila sa pagtudlo kanakog Tamil. Ako lang ang taga-Uropa niining dapita ug ang mga dili Saksi nakadayeg kanako kay naningkamot ako sa pagsulti sa ilang pinulongan. Tungod sa ilang mapabilhon ug mapainubsanong tinamdan, wala ko maglisod sa pagpakigsulti kanila bahin sa Bibliya.

Niadtong Enero 1997, kinahanglan akong mobalik sa Denmark, ug pagkasunod tuig naminyo ako kang Camilla nga usa ka payunir. Gusto kaayo ko nga mobalik sa Sri Lanka, busa niadtong Disyembre 1999, mibalik ako uban sa akong asawa. Wala magdugay, nagdumala kamig mga pagtuon sa Bibliya uban sa mga pamilya ug mga indibiduwal, ug gikuyogan namo ang mga Saksi didto sa ilang mga pagtuon sa Bibliya. Okupado kaayo kami sa among ministeryo ug sa pagtuon ug Tamil.

Sa Marso 2000, kinahanglan kaming mobalik sa Denmark. Dili kami makabiya sa among kaubang mga Saksi ug mga estudyante sa Bibliya kay nakakat-on na kami sa paghigugma kanila. Apan daghan pa kamig angayng himoon, lakip ang hagit sa pagtuon ug lain na pod nga pinulongan!

Human sa Tamil, Latvian na Pod

Niadtong Mayo 2002, ako ug si Camilla, nga niadtong tungora upat ka tuig nang minyo, nakadawat ug imbitasyon sa pag-alagad ingong mga misyonaryo sa Latvia, usa ka nasod sa Uropa nga nahimutang sa sidlakan sa Denmark. Si Camilla nakakat-on dayon sa pinulongang Latvian ug makapakigsulti na human sa unom ka semana nga pagtuon! Apan ako wala pa kaayo makakat-on.  Gani, para nako, hangtod karon wala kaayo koy pag-uswag, bisan pa sa tabang nga akong nadawat. Apan determinado gayod ako sa pagkat-on ug Latvian. a

Si Camilla dako kaayog tabang nako, ug kaming duha nalipay gayod sa among pag-alagad ingong mga misyonaryo. Gani, daghan kamig nadumalahan ug pagtuon sa Bibliya uban sa mga tawong interesado. Kon malimot ko sa mga pulong o sayop ang akong gramarya, sabton na lang intawon sa mga Saksi ug sa mga estudyante sa Bibliya ang akong ginasulti ug ila akong tabangan. Tungod niini nakabaton akog kompiyansa sa kaugalingon sa dihang magsangyaw ug magpakigpulong diha sa Kristohanong mga tigom.

Nganong gilisod-lisod man nako ang akong kaugalingon sa pagtuon ug laing pinulongan nga duna man unta koy diperensiya? Simple lang ang tubag niana​—tungod sa akong gugma sa mga tawo, dili lang kay gusto ko nga magtuon ug ubang pinulongan. Dako kaayong pribilehiyo ang pagtabang ug usa ka tawo nga makaila sa matuod nga Diyos, si Jehova, ug makabaton ug suod nga relasyon Kaniya. Ug sama sa naamgohan sa daghang misyonaryo, mas epektibo kon ang usa makigsulti sa uban diha sa ilang lumad nga pinulongan​—ang pinulongan nga ilang gimahal.

Sulod sa daghang tuig, kami sa akong asawa nakatabang ug ubay-ubayng tawo sa pagkakat-on sa tukmang kahibalo sa kamatuoran sa Bibliya. Apan ang kadungganan iya ni Jehova. Busa kami mapasalamaton kaniya sa maayong mga resulta nga among nakita. Kon buot hunahunaon, igo ra kaming nagtanom ug nagbisibis sa binhi sa kamatuoran sa Bibliya; ang Diyos maoy nagpatubo niini.​—1 Corinto 3:6.

Nakatabang ang Babag

Bisan tuod babag kanako ang dyslexia, kini nakatabang hinuon kanako. Sa unsang paagi? Sa dihang mohatag kog pakigpulong sa kongregasyon, dili ko magsalig sa akong nota, busa makatan-aw ko kanunay sa akong mamiminaw. Dugang pa, naggamit kog mga ilustrasyon, nga mas daling mahinumdoman. Busa sa pipila ka bahin, ang akong diperensiya nakatabang kanako sa pag-ugmad sa akong kahanas sa pagtudlo.

Ang Kristohanong si apostol Pablo nagsulat: “Gipili sa Diyos ang mahuyang nga mga butang sa kalibotan, aron iyang mapakaulawan ang kusganong mga butang.” (1 Corinto 1:27) Ang akong diperensiya ‘nakapahuyang’ kanako sa pipila ka paagi. Apan sama sa akong nakat-onan ug sa uban pa, si Jehova mopuno sa kon unsay kulang kanato. Kinahanglan lang nga magtakda kita ug mga tumong nga makab-ot, dili kita maglaom ug dako, mangayo kitag tabang sa balaang espiritu sa Diyos pinaagi sa pag-ampo, ug himoon ang atong maarangan.

[Footnote]

[Kahon sa panid 22]

IMPORMASYON BAHIN SA DYSLEXIA

Unsa ang dyslexia? Ang dyslexia maoy tibuok-kinabuhi nga diperensiya may kalabotan sa pagkat-on, ilabina sa pagbasa. Ang mga tawo nga dunay dyslexia maglisod sa paglitok sa mga letra. Apan lainlain ang mga simtoma sa matag tawo.

Unsay hinungdan sa dyslexia? Wala pa mahibaloi kon unsa gayoy hinungdan sa dyslexia, pero mahimong tungod kini sa kaliwat. Bisan pag ang mga panukiduki nagpakita nga dili normal ang pag-ugmad ug pag-obra sa utok niadtong dunay dyslexia, wala kiniy kalabotan sa ilang panabot o interes sa pagkat-on. Gani, ang mga tawo nga dunay dyslexia kasagaran hawod sa ubang butang nga wala magkinahanglag kahanas sa pagbasa.

Sa unsang paagi masagubang ang dyslexia? Importante nga madayagnos dayon kini. Ang epektibong pagbansay sa pagbasa ug pagsulat naglakip sa paggamit sa mga sentido sama sa pandungog, panan-aw, ug paghikap. Aron sila mouswag, daghang estudyante nagkinahanglan ug personal nga pagtudlo. Mahimong nagkinahanglan usab sila ug tabang sa emosyon tungod sa mga problema diha sa eskuylahan. Pinaagi sa personal nga pagtudlo ug paningkamot, ang mga estudyante nga dunay dyslexia makakat-on ra sa pagbasa ug pagsulat ug maayo. b

[Footnote]

[Hulagway sa panid 23]

Kauban sa usa ka Saksi sa Sri Lanka

[Hulagway sa panid 23]

Uban kang Camilla sa Latvia