Bisikleta nga Bairan ug Kutsilyo

TINAMPO SA MAGSUSULAT SA PAGMATA! SA TANZANIA

◼ Unsay imong hunahuna kon makakita kag tawo nga nagsakayg bisikleta nga nagtalikod ug kusog kaayong nagtindak apan ang bisikleta wala magdagan? Sa ubang bahin sa kalibotan, sama sa Silangang Aprika, ikaw tingali nagtan-aw ug tawo nga ang panginabuhi mao ang pagbaid ug kutsilyo.

Ordinaryo lang ang iyang bisikleta apan inusab kini. Ang kargahanan sa likod gitaoran ug lapad nga pagkalingin nga bairan. Dayon, usa ka pising naylon ang gitaod sa ehe sa bairan nga gikonektar sa ekstrang yantas nga gitunga ug giwelding sa luyo nga ligid.

Walay nahibalo kon sa unsang paagi nakaabot sa Aprika kining matanga sa bairan. “May nagsulti nako nga kini gigamit sa Dar es Salaam, ang kaulohan sa Tanzania, sa wala pa kini makaabot sa siyudad sa Moshi, diin ako nagpuyo,” miingon si Andrea, usa ka lalaking tigbaid ug kutsilyo sukad pa sa 1985. “Gigamit kini dinhi sa among dapit niadtong 1982,” matod pa niya.

Sa unsang paagi ang bisikleta kataoran ug bairan? Sumala pa ni Andrea, moadto sila sa usa ka tigtaod niini ug ilang ipausab ang bisikleta sumala sa ilang gustong ipahimo. Kasagaran mahuman kini sa usa o duha ka adlaw.

Mga Siga-siga ug mga Singot!

Si Andrea mosugod pagtrabaho mga alas siyete sa buntag sakay sa iyang bisikleta ug mopaingon sa lugar nga daghag tawo. Pag-abot didto, siya mosinggit: “Baid! Baid mo diha!” Bagtingon usab niya ang kampanilya nga gitaod diha sa bisikleta. Dayon dunay modungaw nga ginang sa panimalay ug tawgon si Andrea kay magpabaid ug habol nga mga kutsilyo. Unya may magdalag atsa; ug ang barbero magdalag mga gunting. Si Andrea magbaid usab ug mga guna, barina, ug uban pa basta may sulab.

Dihang ipahiluna ni Andrea ang iyang bisikleta, mangita siyag patag nga luna ug ipaubos ang stand sa iyang bisikleta nga magpaisa sa ligid sa luyo. Dayon iyang itaod ang pising naylon nga mopatuyok sa bairan, molingkod sa ikaduhang lingkoranan nga nag-atubang sa luyo, ug dayon motindak. Magkadusingot intawon siya samtang magsiga-siga ang gibaid nga mga kutsilyo. Hangtod alas sayis ra sa gabii motrabaho si Andrea ug dayon mopauli.

Ang nagbisikleta nga tigbaid ug kutsilyo maoy usa lamang ka pananglitan kon sa unsang paagi gigamit sa “mga kugihan” ang ilang pagkamamugnaon aron makakitag kuwarta sa tarong nga paagi, bisag lisod ang kinabuhi.​—Proverbio 13:4.