Usa ka Espesyal nga Tagana Alang sa Katawhan

DILI lang hangin, pagkaon, ug tubig ang gikinahanglan sa tawo. Kinahanglang atong tagan-an ang atong espirituwal nga panginahanglan aron kita magmalipayon. Kinahanglang mahibalo kita sa katuyoan sa kinabuhi, kon nganong ania kita dinhi. Busa si Jesu-Kristo miingon: “Malipayon kadtong mahunahunaon sa ilang espirituwal nga mga panginahanglan.”​—Mateo 5:3.

Gitagan-an kita sa Diyos sa atong espirituwal nga panginahanglan pinaagi sa labing kaylap nga pagkaapod-apod nga sagradong libro sa kalibotan, ang Balaang Bibliya, nga karon mabatonan nga kompleto o sa bahin sa duolan sa 2,400 ka pinulongan. (2 Timoteo 3:16) Ang Bibliya nag-asoy kanato nga gilalang sa Diyos ang uniberso ug ang tanang kinabuhi sa Yuta. (Genesis, kapitulo 1 ug 2) Giasoy pa gani niini kanato nga iyang gibahin ang iyang mga adlaw sa paglalang ngadto sa unom ka mahulagwayong “mga adlaw” o mga yugto sa panahon diin ang pagkasunod-sunod niini motakdo sa mga yugto sa panahon nga nalangkit sa pagporma ug pag-ugmad sa Yuta, nga gipamatud-an sa mga siyentipiko.

Gipadayag usab sa Bibliya ang katuyoan sa Diyos alang sa katawhan. Kanang maong katuyoan gipakita diha sa Salmo 37:29: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” Matikdi nga ang mga matarong​—mga tawo nga nagkinabuhi  sa moral nga mga sukdanan ug mga prinsipyo sa Bibliya—​mabuhi sa walay kataposan, dili sa langit, kondili sa yuta. Siyempre, ang Yuta dili na unya hugaw. Hinunoa, kini mahimong paraiso.​—Salmo 104:5; Lucas 23:43.

Kahibalo nga Makahatag ug Kinabuhi

Duha ka matang kana nga Paraiso​—pisikal ug espirituwal. Ang Isaias 11:9 nag-ingon: “Ang yuta mapuno sa kahibalo kang Jehova ingon sa katubigan nga nagtabon sa dagat mismo.” Kay nasilsil man diha sa kasingkasing sa tawo, kana nga kahibalo nakapalihok karon sa matuod nga mga Kristohanon sa pagkinabuhi nga malinawon. Dugang pa, importante kaayo kanila ang giingon ni Jesus diha sa pag-ampo: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

Kon gusto kang makakat-on ug dugang pa bahin sa paglaom nga gipadayag sa Bibliya, ang mga Saksi ni Jehova malipay sa pagtabang kanimo nga walay bayad. a

[Footnote]