Ang Akong Gamayng Pink nga Libro

SUMALA SA GIASOY NI CYNTHIA NEWELL

SA SIYETE ANYOS pa ako, gitanyagan ako sa usa ka batang babaye diha sa among school bus sa Shreveport, Louisiana, U.S.A., ug usa ka gamayng pink nga libro nga Pagpatalinghog sa Dakong Magtutudlo. Siya miingon nga tag-50 cents kadto. Busa miuban siya sa among balay ug nag-ihap kami ug 50 cents.

Ganahan kaayo ako sa maong pink nga libro. Wala madugay human makabaton niana, ako nasakit ug naospital. Aron malingaw, basahan ako sa akong pamilya ug estorya gikan nianang paborito nakong libro. Sa midako ako, wala na kaayo ako mobasa nianang libroha kay para man kana sa mga bata. Daghan kaayo akog nakat-onan nianang libroha, apan kulang pa akog kahibalo. Midesisyon ako sa pag-adto sa lainlaing simbahan kada semana kay nagapangita akog tubag sa akong mga pangutana bahin sa Bibliya. Apan wala gayod akoy nadunggan nga makapatagbawng tubag.

Sa naghayskul ako, dili na kaayo ko interesado sa relihiyon, apan nangandoy gihapon akong makakat-on bahin sa Bibliya ug regular akong nagbasa niini. Usa ka adlaw niana, ako nakamatikod nga wala makigbahin ang akong klasmet sa seremonyas diha sa eskuylahan may kalabotan sa pagpanumpa nga magmaunongon sa nasod. Ako siyang gipangutana kon nganong wala siya makigbahin, ug siya mitubag, “Ako nakapanumpa na nga magmaunongon kang Jehova, busa dili mahimong magmaunongon ako sa Diyos ug magmaunongon usab sa bandera.” May katarongan siya! ‘Apan kinsa man si Jehova?’ nangutana ako.

Ang tanan nakong pangutana gitubag sa akong klasmet pinaagig Bibliya. Nakapangutana ako sa akong kaugalingon: ‘Nganong nakahibalo man siya niining tanan? Parehas ra kamig edad; apan daghan kaayo siyag nakat-onan sa Bibliya!’ Ang akong klasmet miingon, “Sa Kingdom Hall ako nakakat-on bahin sa Bibliya.” Iya akong gidapit sa pagtambong sa tigom pagka-Dominggo ug misugot dayon ako. Nakaadto na ako halos sa tanang simbahan sa lungsod, apan ang Kingdom Hall lang sa mga Saksi ni Jehova ang wala nako maadtoi. Nianang maong Dominggo, nakaingon ako nga nia ra man diay ning dapit nga nagtudlo gyod ug kamatuoran sa Bibliya!

Pagkahuman sa tigom, ako miadto sa literature counter, ug didto sa kinaibabwan sa estante nakita nako ang akong gamayng pink nga libro! Napulo ka tuig nang milabay sukad nadawat nako ang libro gikan sa batang babaye diha sa bus, busa nakalimot na ako kaniya. Apan karon nahinumdom na ako​—si Nancy diay kadto, nga maoy nagdapit kanako sa pagtambong niining tigoma!

Human niana, nagtuon ako ug Bibliya kada semana ug kusog ako nga miuswag. Daghan akog nakat-onan gikan sa akong gamayng pink nga libro sa miagi mao nga ang kahibalo nga akong nakat-onan sa pagtuon sa Bibliya natisok dayon sa akong kaisipan. Wala madugay akong gipahinungod  ang akong kinabuhi kang Jehova ug nagpabawtismo niadtong 1985 sa edad nga 18. Niining higayona, si Nancy nakabalhin na sa Florida, ug wala na kami magkita.

Paglabay sa pipila ka tuig, ako naminyo. Sa 1991, ako ug ang akong bana nga si Drew nagpayunir​—bug-os panahong mga ministro—​sa gamayng lungsod sa silangan sa Texas. Komosta man si Nancy? Wala akoy balita niya. Dayon usa ka gabii niana, samtang nagbasa sa Disyembre 1, 1992, nga gula sa Bantayanang Torre, ako misinggit: “Si Nancy! Si Nancy!” Anaa siya sa kinabag-ohang letrato sa migraduwar sa Gilead. Siya ug ang iyang bana nga si Nick Simonelli giasayn ngadto sa Ecuador, Amerika del Sur.

Sa 2006, ako ug ang akong bana miaplay ingong mga boluntaryo sa tibuok kalibotan nga proyekto sa pagpanukod sa mga Saksi ni Jehova. Nalipay kaayo kami sa pagkahibalo nga ang among unang asaynment mao ang proyekto sa pagpadako sa sangang buhatan sa Ecuador! Sa akong unang adlaw sa sangang buhatan sa Ecuador, akong nakita si Nancy nga misulod! Siya miduaw sa sangang buhatan nianang adlawa. Nagkita kami ug naghalog​—nagkauban ra kami pag-usab paglabay sa 32 ka tuig human nako madawat ang akong gamayng pink nga libro! Mapasalamaton ako kang Jehova alang sa maong libro ug sa batang babaye nga nagtanyag niini kanako!

[Kahon/Mga hulagway sa panid 23]

NAKAIMPLUWENSIYA KINI UG MINILYONG KINABUHI

Sa 2003, human sa 32 ka tuig nga pagkaimprenta sa Pagpatalinghog sa Dakong Magtutudlo, usa ka rebisadong edisyon ang gipatik. Kini nag-ulohan ug Pagkakat-on Gikan sa Dakong Magtutudlo. Sa pagkakaron, duna nay kapin sa 65 milyones ka kopya niining libroha nga naghisgot bahin sa mga pagtulon-an ni Jesus ang napatik diha sa kapig 100 ka pinulongan. Makabaton kag kopya sa Pagkakat-on Gikan sa Dakong Magtutudlo gikan sa mga Saksi ni Jehova sa imong dapit.

[Mga hulagway sa panid 23]

Gisal-ot nga mga letrato: Sa nagkaila kami sa bata pa

Si Cynthia

Si Nancy

Dakong letrato: Paglabay sa daghang tuig, diha sa sangang buhatan sa Ecuador