Gikan sa Among mga Magbabasa

Karaang mga Manuskrito​—Giunsa Pagtino ang Petsa sa Pagsulat Niini? (Pebrero 2008) Natugaw ako niining artikuloha. Ako nakasabot nga ang C.E. nagtumong sa “Common Era” ug ang B.C.E. sa “Before the Common Era.” Setenta anyos na ako karon, ug B.C. ug A.D. ra ang akong nakitang mga termino nga gigamit sa pagtumong sa panahon sa wala pa ug human matawo si Jesus. Para nako ang B.C.E. o C.E. wala magpaila sa pagkatawo ni Jesus.

R. W., Amerika

Ang “Pagmata!” nagtubag: Bisan pag A.D. (Anno Domini, nga nagkahulogang “adlaw sa atong Ginoo”) ug B.C. (Before Christ o sa wala pa si Kristo) ang gigamit sa kadaghanang tawo diha sa kayutaang nag-angkong mga Kristohanon, kami nakahukom sa paggamit sa mga terminong C.E. (Common Era) ug B.C.E. (Before the Common Era). Ngano? Una, dunay daghang ebidensiya nga nagpunting sa tuig 2 B.C.E. nga maoy petsa sa pagkatawo ni Jesus. Ikaduha, ang mga basahong gipatik sa mga Saksi ni Jehova kaylap nga gipanagtag diha sa mga pinulongang gigamit sa mga dili-Kristohanon. Ikatulo, ang titulong “Kristo” nagkahulogan nga “Usa nga Dinihogan.” Si Jesus nahimong Mesiyas, o Kristo, sa dihang siya gidihogan sa espiritu sa Diyos panahon sa iyang bawtismo niadtong 29 C.E. (Mateo 3:13-17) Busa si Jesus wala matawong Kristo; siya nahimong Kristo sa tuig sa iyang bawtismo. Gawas pa, nagkadaghan na ang naggamit sa mga terminong C.E. ug B.C.E., ug kini makita sa halos tanang modernong mga diksiyonaryo ug mga basahon. Makasalig ka nga giisip sa mga Saksi ni Jehova nga si Jesus ug ang iyang halad hinungdanon kaayo alang sa katumanan sa mga katuyoan sa Diyos ug alang sa atong kaluwasan.

Mga Batan-on Nangutana . . . Sa Unsang Paagi Maantos Nako ang Akong Kahimtang? (Pebrero 2008) Mapasalamaton kaayo ako nga miabot sa hustong panahon kini nga artikulo! Nasakit ako ug kinahanglang maospital ug tulo ka semana. Mao pay akong paggawas sa ospital dihang akong nadawat kining magasina. Nakasabot kaayo ako sa gibati sa mga batan-on nga gihisgotan sa artikulo. Salamat sa mga pananglitan ug mga tambag nga inyong gihatag.

K. P., Canada

Natandog gayod ako nga si Jehova nga Diyos nagahupay bisan sa mga may depekto nga sama nako. Sa bata pa ako, nadayagnos ako nga may cerebral palsy. Bisag dili ako makalakaw, ako nag-oksilyare payunir. Naglaom ako nga sa Paraisong yuta ang tanang may depekto sa lawas ‘mokatkat sama sa laking osa.’​—Isaias 35:5, 6.

J. J., Republic of Korea

Gibalik-balik nakog basa kining artikuloha. Nakahilak gayod ako sa pagkasayod nga si Jehova nahigugma gayod kanako. Si Jehova nahingawa gayod kanato. Daghan kaayong salamat.

M. T., Japan

Kamatayon​—Kini na ba Gayod ang Kataposan? (Disyembre 2007) Namatay ang akong inahan pipila ka bulan nang milabay, ug ang gihisgotan niini nga serye, ilabina ang mga saad bahin sa pagkabanhaw, nakatandog gayod sa akong kasingkasing. Daghan kaayong salamat. Nahupay ug nadasig gayod ako niini.

M. R., Madagascar