Mga Panalangin nga Labaw Pa kay sa Bahandi

SI Jon maayo kaayo ug trabaho sa Amerika. Sa batan-on pa, tigbiyahe siya sa tibuok kalibotan ug dakog kita. Siya ug ang iyang asawa nindot kaayog balay ug haruhay ug kinabuhi. Sa tan-aw sa kadaghanan, bulahan kaayo sila.

Tagda ang laing pananglitan. Sa kapin sa 5,000 ka aplikante, si Kostas a napili nga usa sa 80 nga mahimong aprentis sa usa ka iladong bangko sa Uropa. Sa pipila lang ka tuig, kadaghan na siyang napromot sa trabaho, hangtod nga gihimo siyang dako-dako sa dakong departamento sa usa ka bangko. Sa mibiya siya sa iyang trabaho aron magtukod ug kaugalingong kompaniya, ang iyang kita sa tibuok tuig mas dako pa kay sa kita sa ubang mga tawo sa tibuok nilang kinabuhi. Mibati siya nga bulahan kaayo.

Apan kombinsido kining duha ka lalaki nga duna pay mga panalangin nga labaw pa kay sa materyal nga mga bahandi. Pananglitan, si Jon karon nagboluntaryo ingong magtutudlo sa Bibliya sa pagtabang sa uban nga masuod sa Diyos. “Ako gayong nakita ug naeksperyensiyahan nga ang materyal nga bahandi dili makahatag ug kalipay,” matod ni Jon. “Mahurot lang ang imong panahon sa pagpangitag kuwarta. Sa laing bahin, ang pagkinabuhi  subay sa mga prinsipyo sa Bibliya daghan kaayog panalangin, sama sa mas malipayong kaminyoon, malinawong hunahuna, ug hinlong konsensiya.”

Susama usab niana ang giingon ni Kostas: “Dili gusto ang Diyos nga magmaluho kita. Nagtuo ako nga kon unsay iyang ihatag kanato nga sobra sa atong adlaw-adlaw nga panginahanglan obligado kita sa paggamit niini sumala sa iyang kabubut-on.” Dili pa dugay, si Kostas ug ang iyang pamilya nagtuon ug laing pinulongan aron makatudlo sila ug daghan pang mga tawo bahin sa mga prinsipyo sa Bibliya. Siya miingon, “Among napamatud-an nga mas malipayon ang paghatag kay sa pagdawat.”​—Buhat 20:35.

Sa pagkatinuod, napamatud-an ni Jon ug Kostas nga ang mga panalangin gikan sa Diyos mas bililhon kay sa materyal nga mga butang. Si Daniel Gilbert, usa ka propesor sa Harvard, nag-ingon nga ang mga espesyalista may kalabotan sa utok “nagtuon ug daghang tuig bahin sa kalangkitan sa bahandi ug kalipay, ug sila nakaingon nga makapalipay ang bahandi kon mahaw-as ka gikan sa tumang kawalad-on.” Apan siya midugang, “Ang bahandi dili makahatag ug dugang kalipay kon mahaw-as ka na sa kakabos.”

Naleksiyon

“Kon mahaw-as ka na sa kakabos,” miingon ang usa ka mapanid-on nga tawo, “ang pagtaas sa kinitaan wala gayoy kalabotan sa kalipay.” Sa unang bahin sa ika-20ng siglo, kana ang leksiyon nga napupo sa usa ka reporter dihang iyang giinterbiyo si Andrew Carnegie, nga nanguna sa industriya ug puthaw ug usa sa kinadatoang tawo sa kalibotan. Giingnan siya ni Carnegie, “Dili ako angay kasinahan. Unsa pa may mahimo sa akong bahandi? Saysenta anyos na ako, ug dili na ako makahilis sa akong pagkaon. Akong ihatag ang akong milyones kon may makapabalik kanako sa akong pagkabatan-on ug makahatag kanakog maayong panglawas.”

 Dayon ang reporter miingon: “Si Mr. Carnegie miliso, ug sa hagawhaw nga tingog nga punog kasubo, miingon, ‘Kon pwede pa nakong mabaligya ang akong kalag sa Yawa, ako ning ibaligya. Dili gyod ko managana sa pagbaligya sa tanan kong kabtangan, mapasig-uli lang ang akong kahimsog.’” Ang laing milyonaryo, nga tag-iyag kompaniya sa krudo nga si J. Paul Getty, miingon sa ulahi diha sa usa ka kasabotan: “Ang kuwarta wala gayoy koneksiyon sa kalipay. Kaguol hinuon.”

Tingali mouyon ka sa magsusulat sa Bibliya kinsa mihangyo: “Ayaw ako hatagi ug kakabos ni mga bahandi. Pakan-a ako sa pagkaon nga maoy gikinahanglan lamang alang kanako, tingali unya ako mabusog ug magalimod kanimo ug magaingon: ‘Kinsa ba si Jehova?’ ug aron dili ako mahimong kabos ug mangawat ug magapasipala sa ngalan sa akong Diyos.”​—Proverbio 30:8, 9.

Si Haring Solomon sa karaang Israel nag-ingon nga siya nahimong bantogan ug naadunahan labaw kang bisan kinsa nga nahauna kaniya. Bisan pa niana siya miingon: “Ang tanan kakawangan ug usa ka paggukod sa hangin.” Si Solomon miingon usab: “Ang panalangin ni Jehova​—mao kana ang makapadato, ug dili niya kana dugangan ug kasakit.”​—Ecclesiastes 2:9-11; 5:12, 13; Proverbio 10:22.

Kon sa Unsang Paagi Mabatonan ang Walay Kataposang mga Panalangin

Dayag nga makaplagan lang nato ang matuod ug walay kataposang kalipay kon atong matagan-an sa hustong paagi ang atong espirituwal nga mga panginahanglan. Kon atong unahon ang Diyos, ang atong kinabuhi mas makahuloganon ug mas daghan kitag panalangin.

Maayo na lang kay ang kuwarta dili na unya mahimong problema. Ang Bibliya nagpasalig kanato nga sa umaabot ang hakog ug mapahimudsanon nga komersiyo mahanaw sa bug-os. (1 Juan 2:15-17) Ang umaabot nga bag-ong sistema sa Diyos gamhan sa iyang matarong nga mga prinsipyo. Ang yuta mahimong paraiso sumala sa orihinal nga katuyoan sa Diyos niini dihang iyang gipahiluna ang unang magtiayon diha niana. Pagkadako nga panalangin nga makita ang tibuok yuta nga matugob sa kalipay, pakigdait, ug gugma!​—Isaias 2:2-4; 2 Pedro 3:13; 1 Juan 4:8-11.

Ang kinabuhi unya nianang panahona dili gayod makapuol. Sa dihang tumanon sa Diyos ang iyang orihinal nga katuyoan para sa tawo nga mabuhing walay kataposan sa paraisong yuta, kita makabaton ug suod nga relasyon uban kaniya ug kita makadawat usab ug materyal nga mga panalangin. Makasalig kita nga adunay dagayang pagkaon, nindot nga puy-anan, ug makapatagbaw nga trabaho para sa tanan. Wala na unyay mga kabos.​—Salmo 72:16; Isaias 65:21-23; Miqueas 4:4.

Ang tanang tim-os nga nagpasundayag ug pagtuo kang Jehova, ang Diyos sa Bibliya, dili gayod mahigawad. (Roma 10:11-13) Busa maalamong pangagpason karon ang mga panalangin nga labaw pa kay sa bahandi!​—1 Timoteo 6:6-10.

[Footnote]

[Blurb sa panid 8]

Kon atong unahon ang Diyos, mas daghan kitag panalangin

[Hulagway sa panid 8]

Ang maayong pagdumala sa kuwarta mahimong mas makapalipay sa kinabuhi