Nabag-o ang Hunahuna sa Maestra

◼ Sa di pa dugayng katuigan, gisugo sa usa ka maestra sa Batumi, sa nasod sa Georgia, ang iyang mga estudyante sa paglista sa Napulo ka Sugo. Sa iyang kahibulong, nasulti kining tanan sa iyang estudyante nga si Anna. Tukma usab ang iyang pagkatubag sa mga pangutana may kalabotan sa Bibliya. Kay naikag, gipangutana siya sa maestra kon nganong daghan kaayo siyag nahibaloan. Dihang mitubag si Anna nga siya nagtuon ug Bibliya uban sa mga Saksi ni Jehova, gipakgang dayon siya sa maestra, nga nag-ingon nga ang mga Saksi panatiko.

Usa ka higayon niana, gisugo sa maestra ang mga estudyante sa pagsulat ug mubong sugilanon bahin sa kinabuhi diha sa Georgia ug sa nagkalainlaing problema nga giatubang sa nasod. Sa kataposang bahin sa iyang sugilanon, si Anna misulat: “Bisag unsaon pag paningkamot sa tawo sa pagtul-id sa katilingban, kini dili gayod molampos kay ang Jeremias 10:23 nag-ingon: ‘Dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.’ Ang tanang problema masulbad pinaagi lamang sa Gingharian sa Diyos.”

Pagkasunod adlaw gidayeg sa maestra ang sugilanon ni Anna atubangan sa klase ug miingon: “Nalingaw ko sa talagsaong sugilanon nga gisulat ni Anna sa iyang kaugalingong mga pulong. Iyang gisaysay diha niana kon sa unsang paagi mabag-o ang mga kahimtang sa kalibotan.” Nakadayeg usab ang maestra sa panggawi ni Anna, nga nagdayeg kaniya atubangan sa klase tungod sa iyang maayong pamatasan ug ligdong nga pamesti.

Dihang giduaw sa mga Saksi ni Jehova ang maestra diha sa iyang balay, iyang giingnan sila nga kaniadto nagtuo siya nga mga panatiko ang mga Saksi apan nabag-o ang iyang hunahuna tungod sa iyang estudyante nga si Anna. Sa 2007, ang maestra mitambong sa Memoryal sa kamatayon ni Jesu-Kristo uban sa mga Saksi ni Jehova ug namati pag-ayo sa programa.

Human sa Memoryal, miingon ang maestra ni Anna nga nakadayeg kaayo siya nga daghag nahibaloan ang mga Saksi ni Jehova bahin sa Bibliya. Karon regular na siyang nagtuon ug Bibliya uban sa mga Saksi. Sama niini nga maestra, tingali bukas usab ang imong hunahuna nga makapukaw kanimo sa pagsusi kon nganong lahi ang mga pagtulon-an ug panggawi sa uban. Palihog kontaka ang mga Saksi ni Jehova alang sa libreng pagtuon sa Bibliya diha sa balay.

[Hulagway sa panid 21]

Si Anna nga nagsulat sa iyang mubong sugilanon