Mga Batan-on Nangutana

Nagkinahanglan ba Akog Mas Maayong mga Higala?

“Kon masuko ko, kinahanglang duna akoy kapahungawan sa akong kasuko. Kon maguol ko, gusto kong dunay mohupay kanako. Kon malipayon ko, gusto kong malipay usab ang uban. Para nako hinungdanon kaayo nga duna kay mga higala.”​—Brittany.

ANG mga bata nagkinahanglag mga kadula, samtang ang mga batan-on nagkinahanglag mga higala. Unsa may kalainan sa kadula ug sa higala?

Ang kadula maoy usa nga imong ikauban-uban.

Ang higala maoy usa nga dunay mga prinsipyo nga sama sa imoha.

Dugang pa, ang Bibliya nag-ingon nga “ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.” (Proverbio 17:17) Tingali naghubit kana sa usa ka suod nga higala, dili lang sa usa ka kadula!

Ang tinuod: Sa magkadako ka, nagkinahanglan kag mga higala nga

(1) Dunay dalayegong mga kinaiya.

(2) Nagkinabuhi sa mga sukdanan nga gibase sa Bibliya.

(3) Makahatag ug maayong impluwensiya kanimo.

Pangutana: Unsaon nimo pagkasayod nga ingon niana ang imong mga higala? Usa-usahon natog susi kining mga hiyasa.

Hiyas sa Tinuod nga Higala #1​—Dalayegong mga Kinaiya

Kon unsay angay nimong mahibaloan. Dili tanan mahimong usa ka tinuod nga higala. Nag-ingon pa gani ang Bibliya nga “adunay mga higala nga mahiligon sa pagdaot sa usag usa.” (Proverbio 18:24) Daw sobra ra kanang pamation. Apan hunahunaa: Duna ka bay “higala” nga mapahimuslanon kanimo? Unsa may imong ikasulti sa usa ka higala nga manglibak o mamutangbutang kanimo? Makawala kana sa imong pagsalig kanila. a Hinumdomi nga mas  maayong magbaton ug pipila ka maayong mga higala kay sa magbaton ug daghang higala nga walay mga pulos!

Kon unsay imong mahimo. Pagpilig mga higala nga sulondan ug mga kinaiya.

“Ang tanan maayog komento sa akong higala nga si Fiona. Gusto kong maayo usab silag komento nako. Gusto kong makabatog dungog nga sama niya. Para nako, dalayegon kana.”​—Yvette, 17.

Sulayi kini.

1. Basaha ang Galacia 5:22, 23.

2. Pangutan-a ang imong kaugalingon, ‘Ang ako bang mga higala nagpakitag mga kinaiya nga sama nianang naglangkob sa “bunga sa espiritu”?’

3. Isulat ang mga ngalan sa imong kinasuorang mga higala. Ug isulat ang gidungog niyang kinaiya tapad sa iyang ngalan.

Ngalan Kinaiya

․․․․․ ․․․․․

․․․․․ ․․․․․

․․․․․ ․․․․․

Sugyot: Kon pulos dili maayong kinaiya ang imong mahunahunaan, maayo pag mangita ka na lag laing higala!

Hiyas sa Tinuod nga Higala #2​—Mga Sukdanan nga Gibase sa Bibliya

Kon unsay angay nimong mahibaloan. Kon gusto kaayo ka nga makakitag mga higala, lagmit makighigala ka na lang kang bisan kinsa. Ang Bibliya nag-ingon: “Siya nga may pakiglabot sa mga hungog mahisugamak sa kadaot.” (Proverbio 13:20) Ang terminong “mga hungog” wala magtumong sa mga tawo nga walay hibangkaagan. Hinunoa kini nagtumong sa mga tawong dili mamatig katarongan ug dili maayog moralidad​—kining mga tawhana ang angay nimong likayan!

Kon unsay imong mahimo. Imbes makighigala lang niadtong modawat nimo, magmapilion. (Salmo 26:4) Wala kini magpasabot nga magmapihigon ka. Ang gipasabot sa pagkamapilion dinhi mao nga kita ‘makakita sa kalainan sa usa nga matarong ug sa usa nga daotan, sa usa nga nag-alagad sa Diyos ug sa usa nga wala mag-alagad kaniya.’​—Malaquias 3:18.

Ang Diyos walay pinalabi, apan siya mapilion kon kinsay iyang imbitahon ingong ‘dinapit sa iyang tolda.’ (Salmo 15:1-5) Makahimo ka usab niini. Sunda ang mga sukdanan sa Diyos, ug ang uban nga naningkamot usab sa pagsunod sa mga sukdanan sa Diyos makighigala kanimo. Ug sila ang mahimong suod nimong mga higala!

“Mapasalamaton ako nga gitabangan ako sa akong mga ginikanan sa pagpangitag tinuod nga mga higala​—mga batan-on nga sama nako nga nagsunod sa mga sukdanan sa Diyos.”​—Christopher, 13.

 Tubaga kining mga pangutanaha:

◼ Kon kauban ako sa akong mga higala, mahadlok ba ako nga ila akong pugson sa pagbuhat ug butang nga nahibalo ako nga dili maayo?

□ Oo □ Dili

◼ Mahadlok ba akong mopailaila sa akong mga higala ngadto sa akong ginikanan kay basig dili sila makaangay kanila?

□ Oo □ Dili

Sugyot: Kon oo ang imong tubag niining mga pangutanaha, pangitag mga higala nga dunay taas nga mga sukdanan. Nganong dili ka mangitag mas magulang kanimo nga nagpakitag maayong panig-ingnan sa pagkinabuhi ingong Kristohanon?

Hiyas sa Tinuod nga Higala #3​—Maayong Impluwensiya

Kon unsay angay nimong mahibaloan. Ang Bibliya nag-ingon: “Ang dili maayong kauban makadaot sa maayong pamatasan.” (1 Corinto 15:33, Today’s English Version) Ang batan-on nga ginganlag Lauren miingon: “Dawaton ako sa akong mga kauban sa klase basta motuman ko sa ilang isulti nako. Kay wala man akoy higala, nagsunod-sunod na lang ko nila aron ila akong dawaton.” Napamatud-an ni Lauren nga kon mosunod ka sa mga sukdanan sa ubang tawo, mora kag piyon nga pasunod-sunoron sa ilang gusto. Ayaw pagminantinil ug mga higala!

Kon unsay imong mahimo. Ayaw na pakighigala niadtong mamugos kanimo sa pagsunod sa ilang paagi sa pagkinabuhi. Kon dili ka na makighigala niining matanga sa mga tawo, mas hayahay kag bation ug makapangita ka pag mas maayong mga higala​—mga higala nga makahatag ug maayong impluwensiya kanimo.​—Roma 12:2.

“Ang akong suod nga higalang si Clint makataronganon ug makasabot sa pagbati sa uban, ug nadasig kaayo ko niya.”​—Jason, 21.

Pangutan-a ang imong kaugalingon:

◼ Nagbag-o ba ako sa akong paagi sa pagpamesti, pagpanulti, o paggawi aron mapahimut-an ang akong mga higala?

□ Oo □ Wala

◼ Tig-adtoan ba ako sa kuwestiyonableng mga lugar nga dili gayod ako moadto kon dili pa tungod sa akong mga higala?

□ Oo □ Dili

Sugyot: Kon oo ang imong tubag sa mga pangutana sa ibabaw, pangayog tambag sa imong mga ginikanan o sa laing hamtong nga tawo. Kon ikaw Saksi ni Jehova, makaduol ka sa usa ka ansiyano ug sultihi siya nga gusto kang magpatambag kaniya bahin sa pagpilig mga higala nga makahatag ug maayong impluwensiya kanimo.

Ang ubang mga artikulo gikan sa seryeng “Mga Batan-on Nangutana” makita diha sa Web site nga www.watchtower.org/​ype

[Footnote]

ANGAYNG PALANDONGON

◼ Unsang mga kinaiya ang imong gipabilhan sa imong higala, ug ngano?

◼ Unsang mga kinaiya ang kinahanglan nimong pauswagon aron mahimo kang mas maayong higala?

[Kahon/Mga hulagway sa panid 19]

KON UNSAY GISULTI SA IMONG MGA ISIGKABATAN-ON

“Dihang gidid-an ako sa akong mga ginikanan sa pagpakigsuod sa usa ka pundok sa mga higala, akong gisultihan ang akong kaugalingon nga sila lang ang akong gustong ikauban. Apan husto ang tambag sa akong mga ginikanan, ug dihang akong gipamalandong ang ilang tambag, ako nakaamgo nga makakita pa akog daghang mas maayong mga higala.”​—Cole.

“Para nako, ang pagpakigbahin sa ministeryo mao ang kinamaayohang paagi aron masuod ang uban diha sa kongregasyon. Sa ingon niining paagiha makapakig-uban ako sa lainlaing matang sa mga tawo, bata ug tigulang. Ug ang akong panahon akong gigugol uban sa mga tawong nahigugma kang Jehova.”​—Yvette.

“Nag-ampo ako nga makabatog mga higala, apan akong naamgohan nga wala akoy gihimo alang niini. Busa ako ang unang miduol ug nakigsulti sa uban diha sa Kristohanong mga tigom. Wala madugay daghan na akog bag-ong mga higala. Dili na ako mamingawon.”​—Sam.

[Kahon sa panid 20]

SULAYI KINI NGA MGA SUGYOT

Pakigsulti sa imong mga ginikanan bahin sa panaghigalaay. Pangutan-a sila kon kinsay ilang mga higala sa batan-on pa sila. Nagmahay ba sila sa ilang gipiling mga higala? Kon mao, ngano? Pangutan-a sila kon sa unsang paagi makalikay ka sa mga problema nga ilang naeksperyensiyahan.

Ipailaila ang imong mga higala sa imong mga ginikanan. Kon magpanuko ka sa pagpailaila kanila, pangutan-a ang imong kaugalingon, ‘Nganong nagpanuko man ko?’ Duna bay apan ang imong mga higala nga nahibalo kang dili maangayan sa imong mga ginikanan? Kon duna, angay kang mag-amping sa pagpilig mga higala.

[Kahon sa panid 20]

TULO KA PAAGI SA PAGHUPOT UG MAAYONG MGA HIGALA

◼ Mahimong maayong tigpaminaw. Pakitag interes sa kaayohan ug sa mga kabalaka sa imong mga higala.​—Filipos 2:4.

◼ Magmapinasayloon. Ayaw pagdahom ug kahingpitan. “Kitang tanan mangapandol sa makadaghan.”​—Santiago 3:2.

◼ Hatagi silag panahon sa ilang kaugalingon. Dili kinahanglang magdepende ka kanunay kanila. Ang tinuod nga mga higala anaa kanunay kon nagkinahanglan ka kanila.​—Ecclesiastes 4:9, 10.

[Hulagway sa panid 18, 19]

Kon mosunod ka sa mga sukdanan sa ubang tawo, mora kag piyon nga pasunod-sunoron sa ilang gusto