Ang Hunahuna sa Bibliya

Supak Ka ba sa “Cremation”?

Ang uban nagtuo nga ang “cremation,” o pagsunog sa patayng lawas, nagpasipala sa lawas ug sa pagkatawo sa tawong namatay. Tingali sila mangatarongan nga ‘ang mga pagano maoy nagpasiugda niini ug busa dili kini angayng himoon sa mga magsisimba sa Diyos.’ Apan ang uban nagtuo nga ang pagsunog sa patayng lawas maoy usa ka dalawaton ug dungganong paagi sa paghipos sa patayng lawas. Unsay imong hunahuna bahin niini?

SA PANAHON sa Bibliya, ang paglubong sa patayng lawas maoy naandan. Pananglitan, gilubong ni Abraham ang iyang asawa nga si Sara diha sa langob. Si Jesus gilubong diha sa langob nga kinubkob sa bato. (Genesis 23:9; Mateo 27:60) Naghatag ba ang Bibliya ug espesipikong paagi sa paghipos sa patayng lawas sa tawo? Kini ba nagpakita nga ang mga alagad sa Diyos kaniadto supak sa pagsunog sa patayng lawas?

Supak ba ang Diyos sa Pagsunog sa Patayng Lawas?

Dunay pipila ka teksto sa Bibliya nga daw nagpaila nga ang pagsunog sa patayng lawas maoy dangatan niadtong nawad-ag pabor sa Diyos. Pananglitan, ang Balaod ni Moises nag-ingon nga kon ang anak nga babaye sa usa ka saserdote ni Jehova mahimong pampam, siya kinahanglang patyon ug dayon ang iyang patayng lawas sunogon. (Levitico 20:10; 21:9) Sa susama, dihang napildi ang Israel sa Ai tungod sa pagkadili-matinumanon ni Acan ug sa iyang pamilya, sila gibato sa ilang mga isigka-Israelinhon ug dayon ang ilang mga patayng lawas gisunog. (Josue 7:25) Ang ubang mga eskolar nag-ingon nga kini ang ipahamtang sa mga nangamatay nga daotag dungog ug ang pagsunog sa patayng lawas sa mga mamumuhat ug daotan maoy timailhan nga sila gihikawan ug dungganong paglubong.

 Dugang pa, sa dihang gihinloan ni Haring Josias ang Juda sa idolatriya, iyang gibungkag ang mga lubnganan sa mga saserdote nga naghalad kang Baal ug ang ilang mga bukog gisunog diha sa ilang mga halaran. (2 Cronicas 34:4, 5) Kini ba nga mga pananglitan nagpakita nga wala mahimuot ang Diyos kanila? Wala, sumala sa gipakita sa laing asoy sa Bibliya.

Dihang gipildi sa mga Filistehanon si Haring Saul sa Israel diha sa gubat, sa kawalay pagtahod ilang gilansang ang iyang patayng lawas ug ang mga patayng lawas sa iyang tulo ka anak didto sa kuta sa Bet-san. Apan sa pagkadungog sa mga Israelinhon nga nagpuyo sa Jabes-gilead nga ang mga patayng lawas gipasipalahan, ilang gikuha kini ug gisunog, ug dayon ilang gilubong ang mga bukog. (1 Samuel 31:2, 8-13) Kon imong basahon kini nga asoy nga walay popamalandong, kini daw nagpakita nga dunay negatibong kahulogan ang pagsunog sa patayng lawas. Kon buot hunahunaon, si Saul daotan ug nakig-away kang David nga dinihogan ni Jehova, ug si Saul namatay nga wala kahimut-i sa Diyos.

Apan matikdi kon kinsa ang nangamatay uban kang Saul. Ang usa sa iyang mga anak, kansang patayng lawas gisunog usab, mao si Jonatan. Dili siya daotan. Hinunoa, si Jonatan suod nga higala ug tigpaluyo ni David. Ang mga Israelinhon miingon nga si Jonatan nagalihok uban sa Diyos. (1 Samuel 14:45) Sa dihang nahibaloan ni David ang gihimo sa mga taga-Jabes-gilead, iya silang gidayeg ug gipasalamatan sa ilang gihimo: ‘Panalanginan unta kamo ni Jehova, tungod kay inyong gipakita kining mahigugmaong-kalulot ngadto sa inyong ginoo, nga si Saul.’ Sa ato pa, wala matugaw si David sa pagsunog sa mga patayng lawas ni Saul ug Jonatan.​—2 Samuel 2:4-6.

Dili Babag sa Pagkabanhaw

Ang Bibliya tin-awng nagtudlo nga banhawon ni Jehova nga Diyos ang kadaghanan sa mga nangamatay. (Ecclesiastes 9:5, 10; Juan 5:28, 29) Sa paghisgot bahin sa panahon dihang banhawon ang mga patay, ang basahong Pinadayag sa Bibliya nagtagna: “Ang dagat mitugyan sa mga patay nga diha niini, ug ang kamatayon ug ang Hades mitugyan sa mga patay nga diha kanila.” (Pinadayag 20:13) Sa pagtuman niini, dili igsapayan sa Diyos nga Labing Gamhanan kon ang patayng lawas gilubong man, gisunog, namatay diha sa dagat, gikaon sa mapintas nga mga mananap, o nabungkag sa bomba.

Ang Bibliya wala maghatag ug espesipikong lagda kon unsay himoon bahin sa patayng lawas. Dili supak si Jehova sa pagsunog sa patayng lawas. Apan tin-aw nga ang mga kahikayan sa paglubong kinahanglang ligdong ug dungganon.

Hinunoa, may mga butang tingali nga makaimpluwensiya sa mga desisyon sa usa bahin sa mga kahikayan sa paglubong, sama sa mga kostumbre sa komunidad. Kadtong nagsunod sa mga prinsipyo sa Bibliya dili gayod mohimog bisan unsa nga makapandol sa ilang mga silingan. Dili usab angayng sundon ang mga batasan nga nagpasundayag ug pagtuo sa bakak nga mga doktrina, sama sa pagkadili-mamatay sa kalag. Bisan tuod maayong tagdon kining mga butanga, ang namatay o ang iyang pamilya maoy modesisyon kon unsaon paghipos ang patayng lawas.

NAKAPAMALANDONG KA BA?

◼ Kinsa ang matinumanong magsisimba nga gihisgotan sa Bibliya nga gisunog ang patayng lawas?​—1 Samuel 31:2, 12.

◼ Unsa may gihimo ni David sa mga tawong naghipos sa patayng lawas ni Saul?​—2 Samuel 2:4-6.

◼ Unsay nagpakita nga banhawon gihapon ang usa kansang patayng lawas gisunog?​—Pinadayag 20:13.

[Blurb sa panid 11]

Ang Bibliya wala maghatag ug espesipikong lagda kon unsay himoon bahin sa patayng lawas