Tensiyonadong mga Estudyante

ANG 17-anyos nga si Jennifer maoy usa sa kinahaworan sa ilang klase. Daghan siyag giapilan nga ekstrakurikular nga mga kalihokan ug dinayeg siya sa iyang mga magtutudlo ug mga magtatambag. Apan sa tuig nga siya mograduwar, labdan na siya pag-ayo sa iyang ulo ug pirme siyang kasukaon. Gibati niya nga ang pagsigeg himo ug homwork ug kakulang sa tulog nakapaluya kaniya.

Dili ra si Jennifer ang mibati niana. Morag nagkadaghan ang mga estudyante nga tensiyonado kaayo, ug ang uban moadto pa gani sa mga sikyatrista. Tungod niana, ang usa ka grupo sa Amerikanong mga magtutudlo naghikay ug programa nga gitawag ug Challenge Success aron mamenosan ang tensiyon diha sa eskuylahan.

Kon estudyante ka, tingali tensiyonado ka sab sama ni Jennifer. O kon ginikanan ka, imo tingaling nakita ang grabeng kapit-os nga giatubang sa imong anak aron molampos sa iyang pag-eskuyla. Aduna bay epektibong tuboran sa giya nga kadangpan sa mga estudyante ug sa ilang mga ginikanan?