Mga Batan-on Nangutana

Unsaon Nako Paghimong Makalingaw ang Pagbasa sa Bibliya?

Unsa ka subsob ang imong pagbasa sa Bibliya? (Tseke ang imong napiling tubag)

□ Kada adlaw

□ Kada semana

□ Uban pa ․․․․․

Kompletoha ang mosunod.

Dili ko ganahang mobasa sa Bibliya kon ako . . . (Tseke kon unsay rason)

□ Gilaay

□ Naglibog

□ Nalinga

□ Uban pa ․․․․․

DILI ka ba kaayo ganahang mobasa sa Bibliya? Kon mao kanay imong gibati, mouyon ka tingali sa giingon sa 18-anyos nga si Will: “Ang Bibliya morag laay basahon.” Apan, siya midugang: “Kana kon wala ka mahibalo kon unsaon pagbasa ang Bibliya.”

Nganong angay nimong tun-an kon unsaon pagbasa ang Bibliya? Buweno, gusto ka bang masayod kon sa unsang paagi

◼ makahimog maayong mga desisyon?

◼ makabaton ug tinuod nga mga higala?

◼ makasagubang sa tensiyon?

Ang Bibliya naundan ug mga mutya sa kaalam bahin nianang mga ulohana ug sa uban pa. Tinuod, nagkinahanglag paningkamot aron makita ang maong mga mutya. Apan ang maong pagpaningkamot sama rag pagpangitag bahandi: Kon mas dako ang kahago, mas dako usab ang kalipay nga bation sa pagkakaplag ug bahandi!​—Proverbio 2:1-6.

Sa unsang paagi nimo makaplagan ang mga bahandi diha sa Bibliya? Ang kahon sa tuo nga mahimong guntingon maghatag kanimog ideya kon unsaon pagbasa ang Bibliya ug​—sa likod—​kon unsa nga han-ay ang imong sundon sa pagbasa niini. Sulayi usab ang nagustohan nimong mga sugyot nga makita diha sa sunod nga mga panid.

Ang ubang mga artikulo gikan sa seryeng “Mga Batan-on Nangutana” makita diha sa Web site nga www.watchtower.org/​ype

Kon makagamit ka sa Internet, makabasa ka sa Bibliya diha sa www.watchtower.org/​e/​bible

MGA BUTANG NGA ANGAYNG PALANDONGON

Gikaingon nga ang mga kaayohan nga imong makuha nagdepende sa gidak-on sa imong paningkamot.

◼ Sa unsang paagi kana tinuod maylabot sa pagbasa sa Bibliya?

◼ Kanus-a ka makagahin ug panahon sa pagbasa sa Bibliya?

[Kahon/​Hulagway sa panid 23]

KON UNSAON PAGBASA ANG BIBLIYA

Sa dili ka pa mobasa . . .

◼ Seguradoha nga hilom ang imong palibot aron dili ka mabalda.

◼ Pag-ampo nga imo kanang masabtan.

Samtang nagbasa ka . . .

◼ Paggamit ug mga mapa ug mga hulagway sa mga asoy sa Bibliya aron imong mahanduraw ang mga esena sa Bibliya.

◼ Tagda ang kahimtang, ug susiha ang mga detalye.

◼ Tan-awa ang mga potnot ug mga cross-reference.

◼ Suknaa ang imong kaugalingon ug mga pangutana nga sama niini:

IMPORMASYON: Kanus-a kini nahitabo? Kinsay nagsulti niini? Kang kinsa kini gisulti?

KAHULOGAN: Unsaon nako kini pagpatin-aw sa uban?

KAAYOHAN: Nganong gilakip ni Jehova nga Diyos kining maong asoy diha sa iyang Pulong? Unsay gipadayag niini bahin sa iyang personalidad o paagi sa pagbuhat sa mga butang? Unsang mga leksiyon ang akong ikapadapat?

Human sa imong pagbasa . . .

◼ Paghimog dugang panukiduki. Gamita ang mga basahon nga gipatik sa mga Saksi ni Jehova, sama sa Insight on the Scriptures ug “Ang Tibuok Kasulatan Dinasig sa Diyos ug Mapuslanon,” kon mabatonan kana sa imong pinulongan.

◼ Pag-ampo pag-usab. Sultii si Jehova sa imong nakat-onan ug kon unsaon nimo kini paggamit. Pasalamati siya sa iyang Pulong, ang Bibliya.

 [Kahon/​Hulagway sa panid 24]

 UNSANG HAN-AY ANG IMONG SUNDON SA PAGBASA SA BIBLIYA?

Kapilian . . .

□ Basaha kini sumala sa pagkasunodsunod niini diha sa Bibliya.

□ Basaha kini base sa petsa sa pagsulat o sa pagkahitabo niini.

□ Kada adlaw, pagbasa ug laing bahin sa Kasulatan.

Lunes: Tugob-sa-aksiyon nga kasaysayan (Genesis hangtod Ester)

Martes: Kinabuhi ug pagpanudlo ni Jesus (Mateo hangtod Juan)

Miyerkoles: Unang mga Kristohanon (Buhat)

Huwebes: Tagna ug moral nga giya (Isaias hangtod Malaquias, Pinadayag)

Biyernes: Makapatandog nga mga balak ug awit (Job, Salmo, Awit ni Solomon)

Sabado: Maalamong mga tambag (Proverbio, Ecclesiastes)

Dominggo: Mga sulat ngadto sa mga kongregasyon (Roma hangtod Judas)

Bisag unsay imong pilion, seguradoa nga matiman-an nimo ang imong sunod nga basahon! Butangig ✔ ang matag kapitulo nga imong nabasa, o isulat ang mga kapitulo nga imo nang nabasa.

Guntinga kini ug isukip sa imong Bibliya!

[Kahon/Diagram sa panid 24]

HIMOANG BUHI ANG KASULATAN!

Pangitag paagi nga malingaw ka sa imong gibasa. Pananglitan:

□ Paghimog family tree o tsart sa mga kaliwat sa matag pamilya.

□ Paghimog dayagram. Pananglitan, samtang nagbasa ka bahin sa usa ka matinumanong alagad sa Diyos, matikdi kon unsang mga panalangin ang iyang nadawat tungod sa iyang mga hiyas ug binuhatan.​—Proverbio 28:20.

[Diagram]

Higala sa Diyos

↑ Masinugtanon

↑ Matinumanon

↑ ↑

Abraham

□ Pagdrowing ug hulagway aron iilustrar ang asoy.

□ Paghimog storyboard o serye sa mga hulagway nga nagpakita sa sunodsunod nga hitabo. Isaysay kon unsay nahitabo sa matag hulagway.

□ Paghimog scale model, o hulad, sa mga butang nga gihisgotan sa Bibliya, sama sa arka ni Noe.​—Pananglitan, tan-awa ang Pagmata! sa Enero 2007, panid 22.

□ Basahag kusog uban sa imong mga higala o mga membro sa pamilya. Sugyot: Pagtudlog usa ka tawo nga magsilbing narrator o tig-asoy. Ang uban mahimong mobasa sa gisulti sa mga karakter sa Bibliya.

□ Pagpilig usa ka asoy, ug himoa kanang samag balita. Ibalita ang maong panghitabo gikan sa lainlaing anggulo pinaagi sa pag-interbiyo konohay sa pangunang mga karakter ug sa nakasaksi sa panghitabo.

□ Pagpilig asoy diin ang usa ka karakter mihimog dili maayong desisyon ug paghanduraw ug laing sangpotanan! Pananglitan, tagda ang asoy bahin sa paglimod ni Pedro kang Jesus. (Marcos 14:66-72) Unsa untay angayng himoon ni Pedro niining situwasyona?

□ Tan-aw o paminaw sa rekording sa mga drama sa Bibliya.

□ Pagsulat ug imong drama. Iapil ang mga leksiyon nga makat-onan gikan sa maong asoy. (Roma 15:4)

SUGYOT: Dramaha kini uban sa imong mga higala.

 [Kahon/Hulagway sa panid 25]

ARON GANAHAN KANG MOBASA

◼ Paghimog tumong! Isulat sa ubos ang petsa kon kanus-a ka gustong magsugod pagbasa sa Bibliya.

․․․․․

◼ Pagpilig usa ka bahin sa Bibliya nga nakapainteres kanimo. (Tan-awa ang kahong  “Unsang Han-ay ang Imong Sundon sa Pagbasa sa Bibliya.”) Dayon isulat sa ubos kon unsang bahina sa Bibliya ang imong unahon pagbasa.

․․․․․

◼ Sa sinugdan, mubo lang una nga panahon ang igugol sa pagbasa. Ang 15 minutos nga pagbasa sa Bibliya mas maayo kay sa wala ka gayod maggahin ug panahon niana. Isulat sa ubos kon unsa ka taas ang panahon nga imong ikagahin alang niini.

․․․․․

Sugyot: Paglain ug Bibliya nga gamiton lamang sa pagtuon. Sulati kanag mga nota. Butangig timaan ang mga bersikulo nga hinungdanon kaayo kanimo.

[Kahon/​Mga hulagway sa panid 25]

KON UNSAY GIINGON SA UBANG MGA BATAN-ON

“Matag gabii mobasa kog kadiyot sa Bibliya aron dunay maayong butang nga akong palandongon sa dili pa matulog.”​—Megan.

“Akong hinuktokan ang usa ka bersikulo sulod sa 15 minutos. Akong basahon ang tanang potnot, tan-awon ang matag cross-reference, ug mohimo kog dugang panukiduki. Usahay dili nako mahuman ang usa ka bersikulo, apan daghan kaayo kog nakat-onan niining paagiha!”​—Corey.

“Kas-a, nahuman nakog basa ang Bibliya sulod sa 10 ka bulan. Pinaagi niana akong nakita ang kalambigitan sa lainlaing bahin sa Bibliya nga wala gyod nako mamatikdi kaniadto.”​—John.

[Kahon sa panid 25]

MAKAPILI KA!

□ Pagpilig hitabo. Ang Bibliya daghag tinuod nga mga sugilanon sa kinabuhi. Pagpilig asoy nga nakapainteres kanimo, ug basaha kini hangtod matapos.

Sugyot: Alang sa dugang impormasyon kon sa unsang paagi makakat-on ug dugang gikan sa maong asoy, tan-awa ang panid 292 sa librong Mga Pangutanang Gisukna sa mga Batan-on​—Mga Tubag nga Mosaler, Tomo 2, nga gipatik sa mga Saksi ni Jehova.

□ Pagpilig Ebanghelyo. Basaha ang Mateo (ang unang Ebanghelyo nga gisulat), Marcos (nga nailhan ingong tugob-sa-aksiyon nga basahon), Lucas (nga naghatag ug linaing pagtagad sa pag-ampo ug sa mga babaye), o ang Juan (nga kasagaran sa mga impormasyon wala sa ubang mga Ebanghelyo).

Sugyot: Sa dili pa mobasa, tan-awa una sa makadiyot ang impormasyon bahin niana nga Ebanghelyo ug sa nagsulat niana aron mas masabtan nimo kon nganong lahi kana sa uban.

□ Pagpilig salmo. Pananglitan:

Kon gibati nimong nag-inusara ug walay higala, basaha ang Salmo 142.

Kon ikaw nahigawad tungod sa imong kahuyangan, basaha ang Salmo 51.

Kon ikaw nagduhaduha sa kahinungdanon sa mga sukdanan sa Diyos, basaha ang Salmo 73.

Sugyot: Isulat ang mga salmo nga nakapadasig kaayo kanimo.

 [Kahon sa panid 26]

SUSIHA PA PAG-AYO

◼ Tagda ang kahimtang. Tan-awa kon kanus-a kini nahitabo, diin nahitabo, ug kon unsay mga sirkumstansiya nga nalangkit niini.

Pananglitan: Basaha ang Ezequiel 14:14. Unsa kahay edad ni Daniel sa dihang gihisgotan siya ni Jehova ingon nga maayong ehemplo kauban ni Noe ug Job?

Ilhanan: Gisulat ang Ezequiel kapitulo 14 lima pa lang ka tuig human si Daniel mabihag sa Babilonya—lagmit tin-edyer pa siya.

Natago nga mutya: Nakita na kaha ni Jehova ang pagkamatinumanon ni Daniel bisag bata pa kini? Tungod sa unsang maayong mga desisyon nga siya gipanalanginan? (Daniel 1:8-17) Sa unsang paagi ang panig-ingnan ni Daniel makatabang kanimo sa paghimog maayong mga desisyon?

◼ Susiha ang mga detalye. Usahay dunay usa o duha ka pulong nga hinungdanon.

Pananglitan: Itandi ang Mateo 28:7 sa Marcos 16:7. Nganong gilakip ni Marcos ang detalye nga si Jesus magpakita sa iyang mga disipulo ‘ug kang Pedro’?

Ilhanan: Si Marcos wala makakita sa maong mga hitabo; dayag nga nasayran niya kini kang Pedro.

Natago nga mutya: Nganong lagmit gayong nadasig si Pedro sa pagkadungog nga si Jesus gustong makigkita kaniya pag-usab? (Marcos 14:66-72) Sa unsang paagi gipamatud-an ni Jesus nga siya usa ka tinuod nga higala ni Pedro? Sa unsang paagi nimo masundog si Jesus ug sa ingon mahimong tinuod nga higala sa uban?

◼ Paghimog dugang panukiduki. Susiha ang mga basahon sa Bibliya alang sa katin-awan.

Pananglitan: Basaha ang Mateo 2:7-15. Kanus-a giduaw sa mga astrologo si Jesus?

Ilhanan: Tan-awa Ang Bantayanang Torre sa Enero 1, 2008, panid 31, nga gipatik sa mga Saksi ni Jehova.

Natago nga mutya: Sa unsang paagi kaha si Jehova nagtagana sa materyal nga panginahanglan sa pamilya ni Jesus samtang didto sila sa Ehipto? Sa unsang paagi ang pagsalig sa Diyos motabang kanimo sa pagsagubang sa kalisdanan?​—Mateo 6:33, 34.