Ang Harpy Eagle—Mananagit sa Lasang

TINAMPO SA MAGSUSULAT SA PAGMATA! SA ECUADOR

◼ Ang unang mga eksplorador sa Amerika del Sur nakurat tingali sa pagkakita niining dakong langgam. Tungod niini ila kining ginganlag harpy, ang makalilisang nga katunga-langgam, katunga-babaye nga mangtas sa sugilanon sa Gresya.

Ang gidak-on niining matanga sa agila makapahingangha gihapon karon. Kini makita didto sa Sentral Amerika ug Amerika del Sur. Kini may gitas-ong mga usa ka metros ug ang bukhad sa pako niini maoy mga dos metros, ug usa kini sa kinadak-an ug kinakusgang langgam sa kalibotan. Mas dako ang baye ug motimbang ug mga nuybe kilos.

Gawas sa gidak-on niini, ang harpy eagle lig-on kaayog mga kuko nga moabot ug mga lima ka pulgada, doble ka taas kon itandi sa mga kuko sa bald eagle. Dugang pa, sumala sa National Geographic Today, ang mga kuko sa harpy eagle kusgan kaayo nga madugmok niini “ang mga bukog sa sloth, unggoy, ug ubang mga mananap nga dagiton sa agila, ug sagad ang biktima niini mamatay dihadiha.” Apan bisan pa sa kadako niini ug sa kusgang mga kuko niini, kini hilom kaayong molupad nga dili gani mamatikdan dihang molupad kini sa ibabaw nimo.

Nameligrong Mapuo

Bisag dili angayng kahadlokan sa tawo ang harpy eagle, kini may katarongang mahadlok ug tawo. Talagsa na lang makita kining langgama ug nameligrong mapuo tungod sa ilegal nga pagpangayam ug pagpuril sa kalasangan. Aron dili mapuo ang harpy eagle, gihimo kini sa Panama ingong nasodnong langgam, ug kadtong mangayam niini pahamtangan ug bug-at nga silot.

Dunay gihimo usab ang Ecuador aron dili mapuo ang harpy eagle. Sa usa ka interbiyo sa Pagmata!, ang beterinaryong si Dr. Yara Pesantes sa Guayaquil Historic Park miingon nga ang mga harpy eagle dili makasanay hangtod mag-edad silag upat o lima ka tuig. Bisan pa niana, sila makasanay matag duha lang ka tuig ug ang baye maglumlom lang ug usa o duha ka itlog sa usa ka panahon. Kay hinay mang mosanay, peligro nga mapuo sila. Apan miingon si Dr. Pesantes nga nakapatungha na silag himsog nga piso kay nanakop silag mga agila nga ilang gipasanay sa parke.

Sa dili madugay, dili na unya problema ang pagtipig kanila aron dili mapuo. Sa unsang paagi? Ang Maglalalang, si Jehova nga Diyos, mao nay magpalakaw sa kalihokan sa yuta ug unya iyang bug-os pamatud-an nga wala niya lalanga ang atong planeta ug ang katingalahang mga linalang niini nga walay kapuslanan.—Salmo 104:5; Isaias 45:18.

[Hulagway sa panid 25]

Nangandam sa pagbutang ug timaan sa agila

[Credit Line]

Pete Oxford/Minden Pictures

[Picture Credit Line sa panid 25]

Tui De Roy/Roving Tortoise Photos