Girekomendar sa Iyang Maestra

◼ Asa makakaplag ang mga batan-on ug kasaligang tambag ug giya? Nalipay kaayo ang 13-anyos nga si Cheren, nga taga-Italya, sa librong Mga Pangutanang Gisukna sa mga Batan-on—Mga Tubag nga Mosaler. Di pa dugay, nakahigayon siya sa pagpaambit sa iyang kalipay ngadto sa iyang mga klasmet.

“Nag-eskuyla ako sa ikawalong grado,” matod niya, “ug diha sa klase kami maghisgot bahin sa mga problema nga kasagarang giatubang sa mga batan-on. Usa ka adlaw niana giduol ako sa akong maestra ug miingon nga nakadungog kono siya bahin sa atong publikasyon nga gipatik alang sa mga batan-on. Busa gihangyo ko niya sa pagdala kaniyag kopya, mao nga ako siyang gidad-an ug librong Gisukna sa mga Batan-on.

“Paglabay sa pipila ka adlaw, iyang gigamit ang maong libro diha sa klase, nga naghisgot sa kapitulo 10, nga nag-ulohang ‘Unsa ka Hinungdanon ang Panagway?’ Naghatag pa gani siyag homwork nga gipasukad sa ‘Mga Pangutana nga Mahisgotan’ sa kataposan sa kapitulo. Siya miingon, ‘Nindot kaayo ning libroha, anugon kon wala moy kopya niini.’

“Ako miingon nga makadala kog kopya para kang bisan kinsa nga interesado niini, ug 16 nako ka klasmet ang nag-order. Dihang ako nang gidala ang mga libro, ang mga estudyante nga sa sinugdan dili interesado nanag-order usab!”

Ang librong Gisukna sa mga Batan-on may mga kapitulo usab nga nag-ulohang “Nganong Gibati Ko ang Depresyon?,” “Unsaon Nako Pagkaila Kon Kini Tinuod nga Gugma?,” “Nganong Moingong Dili sa mga Droga?,” ug “Unsaon Nako Pagsumpo ang Akong Bisyo sa Pagtan-awg TV?” Makahangyo kag kopya pinaagi sa pagpil-ap sa kupon ug sa pagpadala niini ngadto sa adres nga makita diha sa kupon o sa nahiangayng adres nga nalista sa panid 5 niining magasina.

□ Interesado akong makadawat ug kopya sa libro nga gipakita dinhi.

□ Palihog kontaka ako bahin sa usa ka libreng pagtuon sa Bibliya sa balay.