Mas Maayong Solusyon Kay sa Tambal

SA DIHANG 32 anyos pa si Lena, nga gihisgotan sa unang artikulo, siya “gitulisok sa konsensiya, nawad-ag paglaom, ug gusto nang mamatay,” tungod sa iyang pagkaadik sa tambal. “Gusto kong mahimong tarong nga asawa ug inahan,” siya misulat, “apan ang tanang butang sa akong kinabuhi ug sa kalibotan makaguol kaayo ug makaluluoy nga daw wala nay rason pa nga magtinarong. Ug misulay ko nga magtinarong apan napakyas ako.”

Dayon si Lena nagtuon ug Bibliya uban sa mga Saksi ni Jehova. Wala magdugay, ang kamatuoran sa Bibliya nakahatag kaniyag kahupayan ug kalinaw sa hunahuna nga tungod niana siya nakaingon, “Karon pa lang ko mibatig sama niini.” Ang pagkasabot sa mga prinsipyo sa Bibliya ug ang maanindot nga paglaom sa umaabot nakadasig kaniya sa paghinlo sa iyang kinabuhi ug sa pagdaog sa iyang pagkaadik ug tambal.

 Mga Prinsipyo sa Kinabuhi

Ang mga balaod ug mga prinsipyo nga makita diha sa Bibliya gipasulat sa atong Maglalalang, nga si Jehova nga Diyos, para gayod kanato. Ang Salmo 9:7, 8 nag-ingon: “Ang balaod ni Jehova hingpit, nga nagapahiuli sa kalag. . . . Ang mga sugo ni Jehova matul-id, nga makapalipay sa kasingkasing; ang kasugoan ni Jehova hinlo, nga nagapadan-ag sa mga mata.”

Pananglitan, ang 2 Corinto 7:1 nagtambag kanato sa ‘paghinlo sa atong kaugalingon sa tanang kahugawan sa unod ug espiritu.’ Gipabilhan ni Lena kanang tekstoha sa Bibliya, ug kini nakatabang kaniya sa paghunong sa iyang makadaot nga batasan. Ingon usab niini si Myra, nga gihisgotan sa unang artikulo niini nga seryal. Tingali nahinumdom ka nga naadik siya sa rinesetang tambal nga para sa labad sa ulo. Unsay gihimo ni Myra aron masulbad ang iyang problema? Walay lipodlipod nga gisultihan niya ang iyang doktor bahin niini, kinsa mitabang kaniya sa pagpangitag laing paagi sa pagtambal. a Dugang pa, iyang gisunod ang tambag nga gihatag sa iyang mga igsoon sa pagtuo.

Si Lena ug Myra nangayo usab ug tabang pinaagig pag-ampo. Ang Filipos 4:6, 7 nag-ingon: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip.” Usa ka alagad sa Diyos sa karaang panahon nga nakabatog kalinaw sa hunahuna misulat nga sa dihang ang iyang “makapatugaw nga mga hunahuna midaghan,” ang makapadasig nga mga pulong sa Diyos nakahatag kaniyag kalinaw sa hunahuna, kahupayan, ug kalipay. (Salmo 94:19) Ang makapahupayng mga pulong nga sama niini makaplagan diha sa Bibliya ug sa mga pagdasig ug pagpaluyo sa maayong Kristohanong mga kauban, lakip sa mga ansiyano sa kongregasyon.

Apan usahay ang usa mobati nga dili takos tungod kay adik siya sa tambal. Si Janice, nga usa ka Kristohanon nga kaniadto adik sa rinesetang tambal sa daghang tuig, misulat: “Ang mga adik sa tambal tingali walay maayong relasyon sa Diyos ug nagdumot sa kaugalingon, busa kon dili tabangan maglisod sila o dili gayod mangayog tabang kang Jehova.” Kon kini ang ilang kahimtang,  importante nga mangayo silag tabang sa hamtong nga mga Kristohanon. Ang ilang mahigugmaon, mapailobong pagdasig ug mga pag-ampo “mag-ayo sa usa nga maluya.” (Santiago 5:15) Siyempre, kon bata ang adik, kinahanglang tabangan gayod sa mga ginikanan ang ilang anak aron maulian siya sa panglawas ug makabaton pag-usab ug maayong relasyon kang Jehova, sa ingon dili siya mobalik pagkaadik.

Si Janice nagpatambal ug siya naayo, ug wala na gayod siya mahulog pag-usab sa pagkaadik sukad niadto. “Misalig ako kang Jehova aron makalahutay ako sa malisod nga panahon,” siya misulat. “Karon linaw na ang akong hunahuna, ug mibalik ang akong malipayong kinaiya.”

Sa Dihang Mawala na ang Atong mga Problema

Duol na ang adlaw sa dihang ang tanang matang sa tambal o droga mangahanaw na. Ngano? Ang Pinadayag 21:3, 4 nag-ingon: “Ang tolda sa Diyos anaa uban sa mga tawo . . . Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang [lakip sa atong mga problema karon] nangagi na.”

Sumala sa Bibliya, ang Kristohanong paglaom samag “angkla sa kalag, nga seguro ug malig-on.” (Hebreohanon 6:18, 19) Kon maabtan ug bagyo, ihulog sa mga manakayan sa karaang panahon ang angkla sa barko. Kon ang angkla makahawid ug maayo sa salog sa dagat, ang barko dili mapadpad ug masangad sa kabatoan. Sa susama ang “seguro ug malig-on” nga paglaom nga gipadayag sa Bibliya makatabang gayod kanato aron makapabiling timbang ang atong emosyon, kaisipan, ug ang atong relasyon sa Diyos dihang may moabot nga bagyo sa atong kinabuhi!

Susiha ang Bibliya ug tan-awa kon unsa ka hinungdanon ug makapadasig ang mga tambag ug ang mga pagtulon-an niini. Ang mga Saksi ni Jehova malipay sa pagtabang kanimo, ug dili ka gayod mahigawad.

[Footnote]

[Blurb sa panid 9]

“Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo . . . , ipahibalo ang inyong mga pangaliya sa Diyos; ug ang kalinaw sa Diyos . . . magbantay sa inyong mga kasingkasing ug sa inyong mga gahom sa pangisip.”—Filipos 4:6, 7

[Kahon/Hulagway sa panid 10]

PRAKTIKAL NGA MGA PAAGI SA PAGPAUSWAG SA MAAYONG PANGLAWAS

Ang ehersisyo “temporaryong makapalipay nimo ug makahatag ug kahupayan sa kaguol,” nag-ingon ang librong Managing Your Mind—The Mental Fitness Guide. Ang pagbag-o sa matang sa pagkaon ug imong batasan—pisikal ug mental—makatabang usab. Pananglitan, tagda si Valerie, kinsa dinagmalan sa bata pa. Siya naadik sa labing menos 12 ka lainlaing rinesetang mga tambal. Bisan pa niana, nakabuntog ra siya sa iyang batasan ug normal nag kinabuhi. Unsay iyang sekreto?

Imbes magtan-awg TV ug magbasag kuwestiyonableng mga nobela, naghimo si Valerie ug maayong rutina sa pagtuon sa Bibliya ug naggahin ug panahon sa pagbasa sa mga giya sa pagtuon sa Bibliya nga gipatik sa mga Saksi ni Jehova, lakip niining magasina. Dugang pa, siya nag-ampo kanunay sa Diyos nga hatagan siyag kusog, midawat sa tabang sa Kristohanong kongregasyon, ug okupado sa maayong mga kalihokan sama sa pagpaambit sa makahupayng mga mensahe sa Bibliya ngadto sa uban. Gawas pa niana, mihunong na siya sa pagkaon ug dili sustansiyadong mga kalan-on. Natingala gayod ang iyang mga doktor nga naayo siya sa pagkaadik. Nakalingkawas na siya sa pagkaadik sa rinesetang tambal. b

[Footnote]