Mga Batan-on Nangutana

Nganong Dili man Ganahan Nako ang mga Babaye?

Nagpabilib ko niya. Ako siyang gisultihan bahin sa akong kinabuhi—sa mga butang nga akong nabatonan, sa mga lugar nga akong naadtoan, sa akong mga kaila. Seguro naghulat na lang siya nga mohangyo ko nga makigdeyt ko niya!

Naglagot ko! Wala ba siya makasabot? Unsaon man nako pagsulti niya nga dili na ko gustong magpadayon pa mig estorya nga dili pod siya malain?

PWEDE ka nang makigtrato. Gusto unta kang makakitag babaye nga imong maibgan ug sama nimog tinuohan. (1 Corinto 7:39) Apan maguol ka kay inigsugod nimog pangulitawo balibaran man dayon ka.

Kon gusto kang makaila pa gayod sa babaye, unsay angay nimong himoon? Ug unsang mga prinsipyo sa Bibliya ang angay nimong ipadapat?

Kon Unsay Imong Unang Himoon

Sa dili ka pa mangulitawo, kinahanglang mahibalo ka kon unsay imong himoon, ug kini makatabang kanimo aron mahimo kang higala ni bisan kinsa. Tagda kini.

◼ Pagpakitag maayong pamatasan. Ang Bibliya nag-ingon nga ‘ang gugma dili bastos.’ (1 Corinto 13:5) Ang maayong pamatasan nagpakita nga may pagtahod ka sa uban ug nga ginaugmad mo ang hamtong, samag-Kristo nga personalidad. Apan ang maayong pamatasan dili samag sinina nga imong isul-ob aron magpabilib sa uban apan hukason inig-abot na nimo sa balay. Pangutan-a ang imong kaugalingon, ‘Maayo ba akog pamatasan sa mga membro sa akong pamilya?’ Kon dili, maglisod ka sa pagpakitag maayong pamatasan ngadto sa uban. Hinumdomi, aron mahibalo ang usa ka maalamong babaye kon kinsa ka gayod, maniid siya sa imong pagtratar sa mga membro sa imong pamilya.—Efeso 6:1, 2.

Kon unsay giingon sa mga babaye: “Ganahan ko kon magpakita ang usa ka lalaki ug maayong pamatasan sa gagmayng mga butang, sama sa pagbukas  sa pultahan para nako, ug sa dagkong mga butang sama sa pagkabuotan ug pagkamahunahunaon dili lang kanako kondili sa akong pamilya usab.”—Tina, 20. a

“Lainan gyod ko kon ang usa ka lalaki nga mao pa gani among pagkaila mangutana dayon ug personal nga mga butang, sama sa ‘Nakigdeyt ka na ba?’ ug ‘Unsa may imong mga tumong?’ Para nako bastos na!”—Kathy, 19.

◼ Magmahinlo. Kon hinlo ka, nagpakita kag pagtahod dili lamang sa uban kondili sa imong kaugalingon usab. (Mateo 7:12) Kon may pagtahod ka sa uban, lagmit ang uban motahod sab nimo. Sa laing bahin, kon maglago ka lang, ang imong pagpabilib sa babaye dili magsilbi.

Kon unsay giingon sa mga babaye: “Ang usa ka lalaki nga naibog nako bahog baba. Dili gyod ko niya!”—Kelly, 24.

◼ Pauswaga ang imong katakos sa pagpakig-estorya. Ang malungtarong relasyon nagdepende sa maayong komunikasyon. Dili angay nga puro imong kaayohan lang ang imong hisgotan kondili ang kaayohan usab sa imong higala.—Filipos 2:3, 4.

Kon unsay giingon sa mga babaye: “Ganahan ko kon ang lalaki dili maulaw makig-estorya nako, kon makahinumdom siya sa mga butang nga akong gisulti kaniya ug makamaong mangutana aron magpadayon ang among panag-estoryahanay.”—Christine, 20.

“Sa akong tan-aw ang mga lalaki madani sa ilang makita, apan ang mga babaye madani sa ilang madungog.”—Laura, 22.

“Nindot nga hatagan kag mga regalo. Apan kon ang lalaki makamaong makig-estorya, kon ang iyang mga pulong makapalipay ug makapadasig . . . Kinsa bay dili madani ana? Siyempre madani gyod ka!”—Amy, 21.

“Gusto kong mas masuod ang usa ka tawo kon siya makamaong mopakatawa ug makamao usab nga magseneryoso.”—Kelly, 24.

Ang pagpadapat niining mga sugyota makatabang kanimo sa pagpahimulos ug maayong mga panaghigalaay. Apan kon sa imong tan-aw andam ka nang mangulitawo sa usa ka dalaga, unsay angay nimong himoon?

Ang Sunod nga Lakang

◼ Ipadayag ang imong gibati. Kon sa imong hunahuna ang usa ka higala nga imong naibgan mahimong maayong kapikas sa kaminyoon, pangulitawhi siya. Ayaw pag-ukon-ukon, isulti kaniya ang imong gibati. Tinuod, makanerbiyos ang pagpangulitawo. Mahadlok ka nga basig dili ka sugton. Apan ang imong pagkaandam sa paghimo niana maoy ilhanan nga hamtong ka na.

Kon unsay giingon sa mga babaye: “Dili ko makabasa ug hunahuna. Busa kon dunay lalaki nga gustong mas makaila pa kanako, mas maayong magmatinud-anon siya ug dili mag-ulaw-ulaw sa pagsulti sa iyang gibati.”—Nina, 23.

“Bakikaw pamation kon dugay-dugay na mo nga managhigala unya siya diay naibog nimo. Apan mobilib ko niya kon moprangka siya nga gusto niyang mas makaila pa kanako dili lamang ingong usa ka higala.”—Helen, 25.

◼ Tahora ang desisyon sa babaye. Komosta kon dili ka sugton sa imong higala? Ipakita nga may pagtahod ka niya pinaagi sa pagtuo nga ang iyang dili, tinuod gayod nga dili. Lantawon kang dili hamtong kon magpadayon kag pangulitawo. Sa pagkatinuod, kon magsige gihapon kag pangulitawo sa babaye bisag gibalibaran ka na—ug masuko pa kay wala sugta—naghunahuna ka ba sa iyang kaayohan o sa imo rang kaayohan?—1 Corinto 13:11.

Kon unsay giingon sa mga babaye: “Makalagot kaayo kon magsige lang gihapon ug pangulitawo ang lalaki nga ako nang gibalibaran.”—Colleen, 20.

“Akong gisultihan ang usa ka lalaki nga wala koy interes niya, apan nagsige gyod siyag pangayo sa numero sa akong telepono. Dili ko gustong magminaldita. Dili baya pod intawon lalim nang  mangulitawo. Apan giprangkahan gyod nako siya.”—Sarah, 23.

Kon Unsay Dili Angayng Himoon

Ang ubang mga batan-ong lalaki nagtuo nga sila walay problema sa pagdanig mga dalaga. Makigkompetensiya pa gani sila sa ubang mga batan-on kon kinsay makakuha sa atensiyon sa kadaghanang babaye. Apan ang pagpakigkompetensiya dili maayo ug makadaot sa imong dungog. (Proverbio 20:11) Dili madaot ang imong dungog kon imong sundon kini:

◼ Ayaw pag-ibid-ibid. Ang tawong tig-ibid-ibid maayong mobulada ug kilas ug linihokan. Wala siyay tuyo nga mangulitawo. Kini nga linihokan ug tinamdan walay pagtahod sa tambag sa Bibliya sa pagtratar sa “batan-ong mga babaye ingong igsoong mga babaye uban sa bug-os nga kaputli.” (1 Timoteo 5:2) Ang mga tig-ibid-ibid mahimong walay nadang mga higala ug walay nadang kapikas sa kaminyoon. Ang babayeng maalamon dili mailad niana.

Kon unsay giingon sa mga babaye: “Lain kaayo kon buladahan ka sa usa ka lalaki nga nahibalo ka nga namulada sab siya sa imong higala sa miagi lang nga bulan.”—Helen, 25.

“Kining guwapo nga lalaki nag-ibid-ibid nako niadto, nga walay laing gihisgotan kondili ang iyang kaugalingon. Sa dihang miduol namo ang usa ka babaye, iya usab siyang giibid-ibiran. Dayon dihay ikatulong babaye nga miduol, ug mao gihapoy iyang gihimo. Gilainan gyod ko niya!”—Tina, 20.

◼ Ayawg duladulai ang pagbati sa babaye. Ayaw paghunahuna nga ang panaghigalaay sa kaatbang nga sekso parehas ra sa panaghigalaay sa sama nimog sekso. Ngano? Tagda kini: Kon imong dayegon ang imong amigo nga angayan siya sa iyang sinina o kanunay kang makig-estorya kaniya ug mosulti sa imong pagbati, dili gayod siya maghunahuna nga nakagusto ka kaniya. Apan kon imong dayegon ang babaye sa iyang hitsura o makig-estorya kanunay ug mosulti sa imong pagbati, siya lagmit maghunahuna nga nakagusto ka kaniya.

Kon unsay giingon sa mga babaye: “Sa akong hunahuna, ang mga lalaki wala mahibalo nga dili nila angayng tagdon ang mga babaye sama sa ilang pagtagad sa ilang mga amigo.”—Sheryl, 26.

“Pangayoon sa usa ka lalaki ang numero sa akong cell phone, ug dayon magtext siya nako. Unsa may iyang tuyo? Usahay magkasuod mo sa text ug mahulog ang imong pagbati, apan pila ra man goy imong masulti sa text?”—Mallory, 19.

“Sa akong hunahuna, ang mga lalaki wala mahibalo nga mahulog dayon ang pagbati sa mga babaye, labi na gyod kon mahunahunaon kaayo sila ug nindot nga ikaestorya. Dili usab buot ingnon nga desperada kaayo ang mga babaye. Sa akong hunahuna ang kadaghanang babaye gustong mahigugma ug mangita gyod silag lalaki nga angay gayod kanila.”—Alison, 25.

Magmarealistiko

Sayop ug hinambog pa gani ang paghunahuna nga ang tanang babaye makagusto nimo. Apan aduna gayoy makagusto nimo kon imong hinumdoman kini: Mas hinungdanon ang imong personalidad kay sa imong panagway. Busa ang Bibliya nagtambag nga kinahanglang imong ugmaron ang bag-ong personalidad.—Efeso 4:24.

Si Kate, nga 21 anyos, miingon: “Naghunahuna ang mga lalaki nga magustohan sila sa mga babaye sa ilang paagi sa pagsinina o sa ilang dagway. Usahay tinuod kana, apan para nako, mas importante sa mga babaye ang maayong mga hiyas.” b

Ang ubang mga artikulo gikan sa seryeng “Mga Batan-on Nangutana” makita diha sa Web site nga www.watchtower.org/ype

[Mga footnote]

ANGAYNG PALANDONGON

◼ Unsaon nimo pagpakita nga may pagtahod ka sa imong kaugalingon?

◼ Unsaon nimo pagpakita nga imong gitahod ang hunahuna ug pagbati sa usa ka babaye?

[Hulagway sa panid 19]

Ang maayong pamatasan dili samag sinina nga imong isul-ob aron magpabilib sa uban apan hukason inig-abot na nimo sa balay