Tensiyonadong Kabataan

◼ “Wala man god koy panahon. Gikapoy ko,” miingon ang otso anyos nga si Pablo sa gipangutana siya sa iyang maestra bahin sa iyang homwork. Sama niining nagduka nga bata nga taga-Espanya, daghang kabataan natensiyon sa pagsigeg tuon adlaw-adlaw nga mogugol ug 12 ka oras o kapin pa sa ilang mga leksiyon ug homwork. Ngano man?

Gipaenrol sa ubang mga ginikanan ang ilang mga anak sa mga klase gawas pa nianang klase sa eskuylahan aron dili sila maglaay samtang naghulat sa pag-uli sa ilang mga ginikanan. Gusto usab sa ubang mga ginikanan nga maningkamot pag-ayo ang ilang mga anak sa eskuylahan aron sila mohawod sa klase ug makabatog malamposong mga karera. Busa gipaenrol sa daghang ginikanan sa South Korea ang ilang mga anak sa mga klase nga magpapasar kanila sa eksaminasyon alang sa kolehiyo, sa ingon madawat sila sa iladong mga unibersidad. Higpit kaayo ang ilang mga eskedyul sa pagtuon adlaw-adlaw, usahay gikan sa alas 7:30 sa buntag hangtod sa tungang gabii o hangtod pa gani sa kaadlawon. Ang New York Times nag-ingon nga “ang mga ginikanan naninguha pag-ayo nga makatungha ang ilang mga anak sa iladong mga unibersidad.”

Ang senemanang basahon sa Espanya nga Mujer hoy nag-ingon: “Gustong ihatag sa ‘mapugsanong mga ginikanan’ ang labing maayo alang sa ilang mga anak, pero gusto nila nga manghawod ang ilang mga anak.” Aron matuman ang gusto sa mga ginikanan, ang mga anak maningkamot pag-ayo, nga makapatensiyon kanila. “Sa among obserbasyon, ang mga bata nabug-atan gayod,” matod ni Antonio Cano, presidente sa Spanish Society for the Study of Anxiety and Stress. Sumala sa usa ka propesora, 40 porsiyento sa mga bata sa Espanya nga wala pay 15 anyos nag-antos sa sobrang tensiyon. Makadaot kana kanila, nga moresulta pa gani ug paghikog. Pananglitan, sa South Korea, “ang paghikog maoy ikaduha sa labing komon nga hinungdan sa kamatayon sa mga bata nga nag-edad ug 10 ngadto sa 19, sunod sa mga aksidente sa trapiko,” nag-ingon ang The New York Times.

Siyempre, ang mga bata kinahanglang maningkamot pag-ayo sa eskuylahan, ug kinahanglang tabangan sila sa ilang mga ginikanan kutob sa mahimo kay dili na ikabalik ang maong mga tuig. Apan “ang mga bata dili mga hamtong. Sila dili makalahutay sa pagsigeg tuon adlaw-adlaw,” nag-ingon si Irene Arrimadas, nga usa ka maestra. Busa tinoon sa mahigugmaong mga ginikanan nga ang ilang mga anak makapahulayg maayo ug makalulinghayaw uban sa pamilya. Bahin sa pagkahinungdanon sa pagkatimbang, ang maalamong si Haring Solomon misulat: “Mas maayo pa ang usa ka hakop nga pahulay kay sa duha ka hakop nga kahago ug paggukod sa hangin.”—Ecclesiastes 4:6. a

[Footnote]