Ang Hunahuna sa Bibliya

Angay Ka Bang Mahadlok sa Patay?

Ang mga membro sa tribong Annang sa Nigeria nagtuo nga kon ang patay ilubong nga dili pasidunggan, ang ilang kalag mangdaot ug mopahinabog kamatayon sa mga membro sa pamilya. Ang ubang mga Insek nagtuo usab nga kon dili sila mohimog mga rituwal sa paglubong, ang kalag sa namatay moatake ug mopatay pa gani sa uban.

KADAGHANAN sa mga kultura sa tibuok kalibotan nagtuo sa doktrina nga dunay kalag o espiritu nga mobulag sa lawas inigkamatay. Daghan usab ang nagtuo nga ang kalag o espiritu makapanghilabot sa mga membro sa pamilya o mga higala.

Apan duna ba gayoy bahin sa lawas nga magpabiling buhi inigkamatay sa tawo? Ug kana nga “bahin” makadaot ba gayod sa mga buhi? Unsay hunahuna sa Bibliya?

Duna bay Mahibaloan ang mga Patay?

Ang Bibliya nag-ingon nga ang patay “walay nahibaloan nga bisan unsa.” Kini nag-ingon usab nga ang patay “walay gahom sa kamatayon.” (Ecclesiastes 9:5; Isaias 26:14) Bahin sa unang tawo nga si Adan, ang Pulong sa Diyos nag-ingon: “Giumol ni Jehova nga Diyos ang tawo gikan sa abog sa yuta ug gihuypan ang mga buho sa iyang ilong sa gininhawa sa kinabuhi, ug ang tawo nahimong buhing kalag.”—Genesis 2:7.

Matikdi nga si Adan gilalang nga usa ka kalag, nga mao, usa ka buhi nga tawo. Sumala sa Bibliya, si Adan wala hatagi ug kalag nga mabuhi nga bulag sa iyang lawas. Busa sa dihang nakasala si Adan, siya namatay. Siya nahimong “patay nga kalag.” (Numeros 6:6) Ang Bibliya nag-ingon usab: “Ang kalag nga makasala—kini mismo mamatay.” (Ezequiel 18:4) Kitang tanan nakapanunod sa sala, o pagkadili-hingpit, gikan sa unang tawo nga si Adan. Busa kon kita mamatay, ang kalag mamatay.—Roma 5:12.

Dihang gihubit sa Bibliya ang kahimtang sa patay, kini wala mogamit ug mga termino nga dili masabtan, kondili naggamit kini ug mga pulong nga masabtan, sama sa ‘natulog diha sa kamatayon.’ (Salmo 13:3) Si Jesus miingon bahin sa 12-anyos nga batang babaye: “Siya wala mamatay kondili natulog lamang.” Si Jesus mayubitong gikataw-an sa mga tawo kay nahibalo sila nga ang bata namatay. Apan ang Bibliya nag-ingon nga gipukaw ni Jesus ang batang babaye gikan sa pagkatulog diha sa kamatayon.—Lucas 8:51-54.

Ingon usab niini ang giingon ni Jesus dihang namatay si Lazaro. Giingnan ni Jesus ang iyang mga tinun-an nga iyang adtoon si Lazaro “aron pukawon siya gikan sa pagkatulog.” Ang mga tinun-an wala makaagpas sa giingon ni Jesus, busa “si Jesus miingon kanila sa walay lipudlipod: ‘Namatay si Lazaro.’” Si apostol Pablo naghisgot usab bahin niadtong “nangatulog sa kamatayon” ug miingon nga sa gitakdang panahon sa Diyos, sila pagabanhawon.—Juan 11:11-14; 1 Tesalonica 4:13-15.

Ang Bibliya wala gayod magtudlo nga dunay kalag nga magpabiling buhi inigkamatay sa tawo. Busa walay katarongan nga kita mahadlok sa patay. Nan, nganong daghan man ang nagtuo nga dunay usa ka bahin sa lawas nga magpabiling buhi inigkamatay? Ug nganong nagtuo man ang mga tawo nga ang patay makadaot sa mga buhi?

Ang Bakak—Ang Limbong

Gipatuo sa bakak nga mga relihiyon nga inigkamatay sa tawo, sila wala gayod mamatay. Sa sinugdanan pa sa kasaysayan sa tawo, daghang tawo sa tibuok kalibotan nagtuo sa doktrina nga ang kalag dili mamatay. Busa inigkamatay sa ubang mga magmamando—sama sa mga Paraon sa karaang Ehipto—sila magpatayg mga ulipon nga mosilbi kanila didto sa laing kalibotan.

 Daghang tawo gihasi sa ilang gituohan nga mga kalag kono, o mga espiritu, sa mga nangamatay. Nagtuo sila nga ang maong pagpanghasi maoy tungod sa wala mapahimut-i nga mga kalag sa mga paryente ug sa uban. Bisan pa niana, ang Kasulatan tin-awng nag-ingon nga dili kana tinuod. Ang dili makitang espirituhanong mga puwersa nga gitawag ug mga demonyo mao ang nagpahinabo sa maong mga pag-atake, ug sila malipay sa pagpanghasi ug pagpanghadlok sa mga tawo.—Lucas 9:37-43; Efeso 6:11, 12.

Ang Kasulatan nag-ingon nga si Satanas mao “ang amahan sa bakak,” kinsa “kanunayng naghimo sa iyang kaugalingon nga usa ka manulonda sa kahayag.” Siya ug ang iyang mga demonyo “nagpahisalaag sa tibuok gipuy-ang yuta.” (Juan 8:44; 2 Corinto 11:14; Pinadayag 12:9) Sa pagkatinuod, si Satanas maoy nagpatuo nga ang kalag dili mamatay ug makadaot sa mga buhi.

Apan ang mga nagtuo sa Bibliya dili malimbongan niana nga kabakakan. Sila nahibalo bahin sa pagpaningkamot ni Satanas sa pagpatuo sa mga tawo nga ang patay makakomunikar sa mga buhi. Sa pagkatinuod, ang Bibliya nag-ingon: “Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa.” (Ecclesiastes 9:5) Ang Pulong sa Diyos naundan ug mga kamatuoran nga makapahigawas kanato gikan sa mga kabakakan bahin sa kahimtang sa patay!—Juan 8:32.

NAKAPAMALANDONG KA BA?

◼ Aduna bay nahibaloan ang mga patay?—Ecclesiastes 9:5; Isaias 26:14.

◼ Nganong daghan ang nagtuo nga dunay bahin sa tawo nga magpabiling buhi inigkamatay?—Juan 8:44.

◼ Asa nato mahibaloan ang kamatuoran bahin sa kahimtang sa mga patay? —Juan 8:32; 17:17.

[Blurb sa panid 23]

Ang daotang mga espiritu, dili ang mga patay, ang malipay sa pagpanghasi sa mga tawo