Ang Hunahuna sa Bibliya

Sayop ba Kon Mobalhin Kag Laing Relihiyon?

Sa dihang si Avtar nagtuon ug Bibliya, nasuko ang iyang pamilya nga Sikh ug relihiyon. “Sa among nasod, kon mobalhin gani kag relihiyon likayan ka sa mga tawo,” siya miingon. Bisan ang among mga ngalan dunay relihiyosong kahulogan. Busa ang pagbalhin ug relihiyon giisip nga pagsalikway sa imong pagkatawo ug kawalay pagtahod sa pamilya.”

SI Avtar nahimong usa sa mga Saksi ni Jehova. Sayop ba nga mibalhin siyag relihiyon? Tingali para nimo ang imong relihiyon maoy permanenteng bahin sa kasaysayan ug kultura sa pamilya, busa dili ka angayng mobalhin ug laing relihiyon.

Importante ang pagtahod sa atong pamilya. Ang Bibliya nag-ingon: “Pamati sa imong amahan nga nanganak kanimo.” (Proverbio 23:22) Apan mas importante ang pagtinguha sa pagkahibalo sa kamatuoran maylabot sa atong Maglalang ug sa iyang mga katuyoan. (Isaias 55:6) Posible ba ang maong pagsusi? Kon mao, unsa ka importante para nimo ang pagpangita sa kamatuoran?

Pagpangita sa Kamatuoran

Ang mga relihiyon sa kalibotan nagtudlog nagkasumpaki nga mga pagtulon-an. Siyempre dili mahimong tinuod kining tanan. Tungod niini, sama sa giingon sa Bibliya, daghang tawo “may kasibot sa Diyos; apan dili sumala sa tukmang kahibalo.” (Roma 10:2) Apan si apostol Pablo nag-ingon diha sa 1 Timoteo 2:4 nga kabubut-on sa Diyos nga “ang tanang matang sa mga tawo . . . makadangat sa tukmang kahibalo sa kamatuoran.” Sa unsang paagi makaplagan ang tukmang kahibalo?

Tagda ang mga rason sa pagsusi sa Bibliya. Si Pablo, nga usa ka inspiradong magsusulat sa Bibliya, miingon: “Ang tibuok Kasulatan inspirado sa Diyos ug mapuslanon sa pagpanudlo.” (2 Timoteo 3:16) Sa imong pagpangita sa kamatuoran, susiha kon tinuod ba ang giingon sa Bibliya. Ug susiha mismo sa imong kaugalingon ang dili hitupngang kaalam niini, ang pagkatukma niini kon bahin sa kasaysayan, ug ang natuman nga mga tagna niini.

Ang Bibliya wala magtudlo nga ang tanang relihiyon dalawaton sa Diyos. Hinunoa, kini nagsugo sa mga magbabasa niini sa dili pagtuo sa tanang ilang madunggan kondili sa “[pagsusi sa] inspiradong mga pahayag aron masuta kon kini nagagikan ba gayod sa Diyos.” (1 Juan 4:1) Pananglitan, ang bisan unsang doktrina nga tinuod nga nagagikan sa Diyos kinahanglang nahiuyon sa iyang personalidad, lakip sa iyang kinalabwang hiyas nga gugma.—1 Juan 4:8.

Ang Bibliya nagpasalig kanato nga ang Diyos buot nga kita “makakaplag gayod kaniya.” (Buhat 17:26, 27) Sanglit gusto sa atong Maglalalang nga atong pangitaon ang kamatuoran, dili gayod sayop kon atong ipadapat ang atong nakat-onan—bisan kon kini nagkahulogan sa pagbalhin ug laing relihiyon.  Apan komosta kon may motunghang mga suliran?

Balanseng Panglantaw sa Pagkamaunongon sa Pamilya

Kon ang usa mag-usab sa iyang mga tinuohan, siya mahimong dili na makigbahin sa pipila ka relihiyosong mga rituwal o kasaulogan nga kanhi iyang ginasaulog. Natural mahimo kining moresulta sa kayugot sa pamilya. Si Jesus nahibalo niini. Iyang giingnan ang iyang mga sumusunod: “Ako mianhi sa pagpahinabog panagkabahin, sa lalaki batok sa iyang amahan, ug sa anak nga babaye batok sa iyang inahan, ug sa batan-ong asawa batok sa iyang ugangang babaye.” (Mateo 10:35) Gipasabot ba ni Jesus nga ang mga pagtulon-an sa Bibliya gituyo aron magpahinabog mga panagbangi? Dili. Iya lang napanan-aw kon unsay mahitabo dihang ang mga membro sa pamilya mosupak kon ang usa mobarog dapig sa iyang mga tinuohan nga lahi sa mga tinuohan sa iyang pamilya.

Angay bang likayan gayod ang mga panagbangi sa pamilya? Ang Bibliya nagtudlo nga ang mga anak kinahanglang magmasinugtanon sa ilang mga ginikanan ug ang mga asawa kinahanglang magpasakop sa ilang mga bana. (Efeso 5:22; 6:1) Apan kini usab nagsugo niadtong nahigugma sa Diyos sa ‘pagsugot sa Diyos ingong magmamando inay sa mga tawo.’ (Buhat 5:29) Busa usahay ang atong pagkamaunongon sa Diyos mahimong moresulta sa paghimog desisyon nga dili maangayan sa ubang membro sa pamilya.

Bisan pag tin-awng gipakita sa Bibliya ang kalainan sa matuod ug bakak nga mga pagtulon-an, ang matag tawo gihatagan sa Diyos ug kagawasan kon unsay iyang pilion. (Deuteronomio 30:19, 20) Dili angay pugson si bisan kinsa sa pagsimba sa paagi nga dili dalawaton kaniya ni papilion ang usa tali sa iyang tinuohan ug sa iyang pamilya. Ang pagtuon ba sa Bibliya moresultag pagkabungkag sa pamilya? Dili. Gani ang Bibliya nagdasig sa mga bana ug asawa nga dili samag relihiyon nga dili magbulag.—1 Corinto 7:12, 13.

Pagbuntog sa Kahadlok

Tingali mahadlok ka sa reaksiyon sa imong mga silingan kon magtuon kag Bibliya uban sa mga Saksi ni Jehova. Si Mariamma nag-ingon: “Ang akong pamilya nabalaka nga dili ako makakaplag ug bana nga makatagana sa akong mga panginahanglan. Busa supak sila sa akong pagtuon sa Bibliya.” Si Mariamma misalig kang Jehova nga Diyos ug nagpadayon sa pagtuon. (Salmo 37:3, 4) Makahimo ka usab niana. Imbes mahadlok sa ipahinabo niini, hunahunaa ang mga kaayohan niini. Ang mensahe sa Bibliya makapahimo sa kinabuhi ug sa kinaiya sa usa nga mas maayo. Ang mga tawo makakat-on sa pagpakitag di-mahakogong gugma sa ilang pamilya. Ang daotang mga batasan, sama sa sakit nga sinultihan ug pagdagmal ug pag-abuso sa alkoholikong ilimnon ug droga, mahimong mabuntog. (2 Corinto 7:1) Ang Bibliya nagdasig sa pag-ugmad ug maayong mga kinaiya sama sa pagkamaunongon, pagkamatinud-anon, ug pagkakugihan. (Proverbio 31:10-31; Efeso 4:24, 28) Nganong dili ka magtuon sa Bibliya aron imong makita ang mga kaayohan sa pagpadapat sa mga pagtulon-an niini?

NAKAPAMALANDONG KA BA?

◼ Nganong angay nimong susihon ang imong relihiyosong mga tinuohan?—Proverbio 23:23; 1 Timoteo 2:3, 4.

◼ Sa unsang paagi imong mailhan ang matuod nga mga pagtulon-an?—2 Timoteo 3:16; 1 Juan 4:1.

◼ Ang pagsupak ba sa pamilya angay mopugong kanimo sa pagtuon sa Bibliya?—Buhat 5:29.

[Blurb sa panid 29]

Ang mensahe sa Bibliya makapahimo sa kinabuhi ug sa kinaiya sa usa nga mas maayo

[Hulagway sa panid 29]

Si Mariamma ug iyang bana